༄༅། །དེ་རིང་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་གྲོས་ཚོགས་འཐུས་མི་རྣམས་ལ་བོད་ཀྱི་གནད་དོན་ངོ་སྤྲོད་ཞུ་རྒྱུ་དང ། ལྷག་པར་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ལྕམ་སྐུ་ཇེ་ནི་ཊི་ར་ཧི་སི་ལགས་གྲོས་ཚོགས་གོང་མའི་འཐུས་མི་ནས་བགྲེས་ཡོལ་ཞུ་གི་ཡོད་པར་ཆེ་བསྟོད་ཞུ་རྒྱུའི་མཛད་སྒོ་ཞིག་འཚོག་ཡོད། མཛད་སྒོ་གོ་སྒྲིག་ཞུ་རྒྱུར་ཨོསྟྲེ་ལི་ཡཱ་བོད་དོན་ལྷན་ཚོགས་དང་། ཨོསྟྲེ་ལི་ཡཱ་སྐུ་ཚབ་དོན་ཁང་ནས་མཐུན་འགྱུར་གནང་ཡོད་པ་རེད།
ཚོགས་འདུ་དེར་གྲོས་ཚོགས་འཐུས་མི་སུ་སན་ཊེམ་པལ་མེན་ལགས་དང་། ཌིན་སི་མེ་ཐི་ལགས། ཇ་ནེཊ་རའི་སོན་ལགས། བྷར་བྷ་ར་ཕོ་ཁོ་ཁུན་སོན་ལགས། ཌེ་ཝིཌ་སི་མེ་ཐི་ལགས། སོ་ཧྥི་ཁེམ་ཕ་སི་ལགས་སོགས་གྲོས་ཚོགས་འཐུས་མི་བརྒྱད་ཅུ་ལྷག་དང་། ཁོ་ཚོའི་ལས་བྱེད་རྣམ་པ། བོད་དོན་ལ་རྒྱབ་སྐྱོར་བ་ཁག་ཅིག་མཉམ་ཞུགས་གནང་ཡོད། སྐབས་དེར་ཨོསྟྲེ་ལི་ཡཱའི་བོད་དོན་ལྷན་ཁང་གི་འགན་འཛིན་ཛོ་ཨི་བྷེ་ཌི་ཧྥོར་ཌོན་ལགས་ཀྱིས་དམིགས་བསལ་མཛད་སྒོ་འདིར་ཕེབས་པའི་སྐུ་མགྲོན་ཡོངས་ལ་དགའ་བསུ་ཞུས་ཏེ། ཉེ་ཆར་རྒྱ་ནག་གཞུང་གིས་བོད་ཁམས་སྡེ་དགེར་ཆུ་མཛོད་གསར་རྒྱག་གི་ལས་གཞི་སྤེལ་བར་ས་གནས་བོད་མི་རྣམས་ནས་ངོ་རྒོལ་གནང་བར་རྒྱ་གཞུང་ནས་བོད་མི་རྣམས་ལ་དྲག་གནོན་འཛིན་བཟུང་བྱས་པའི་གནས་ཚུལ་འགྲེལ་བརྗོད་དང་། རྒྱ་ནག་གཞུང་ནས་བོད་མིའི་འཚོ་བར་དོ་ཕོག་འགྲོ་གཞིའི་ཆུ་མཛོད་གསར་རྒྱག་གི་ལས་གཞི་མཚམས་འཇོག་དགོས་པའི་འབོད་སྐུལ་ཞུས།
ཚོགས་འདུའི་ནང་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་གྲོས་ཚོགས་འཐུས་མི་ཇེ་ནེ་ཊི་ར་ཧི་སི་ལགས་ཀྱིས་བོད་དོན་ལ་རྒྱབ་སྐྱོར་གཡོ་མེད་གནང་བར་ཐུགས་རྗེ་ཆེ་ཞུས་པ་དང་སྦྲགས། ཁོང་མོས་བོད་ཀྱི་ལོ་རྒྱུས་ཁྲོད་ཆེས་དཀའ་ངལ་ཆེ་བའི་དུས་སྐབས་འདིར་རྒྱབ་སྐྱོར་གནང་བ་དེ་བོད་མི་ཚོས་ནམ་ཡང་དྲན་ངེས་ཡིན་པ་གསུངས་པ་མ་ཟད། དེ་བཞིན་ཁོང་གིས། ཁྱེད་ཀྱི་མཛད་རྗེས་གཅིག་ནི། མ་འོངས་པར་ཨོསྟྲེ་ལི་ཡཱའི་གྲོས་ཚོགས་ནང་བོད་མིའི་རང་དབང་དང་དྲང་བདེན་གྱི་ཆེད་དུ་བོད་དོན་ལ་རྒྱབ་སྐྱོར་གནང་མཁན་གྱི་འགོ་ཁྲིད་ཚོར་མིག་དཔེ་བཟང་པོ་ཞིག་བསྟན་རྒྱུ་དང་། འཛམ་གླིང་གི་ཡུལ་གྲུ་གང་སར་སྐད་ཆ་ཤོད་མཁན་མེད་པ་ཚོའི་མགྲིན་ཚབ་པ་བྱེད་རྒྱུ་དེ་རེད། ཅེས་གསུངས་རྗེས་སྐུ་ཚབ་དོན་གཅོད་ནས་གྲོས་ཚོགས་འཐུས་མི་ཇེ་ནེ་ཊི་ར་ཧི་སོ་ལགས་ནས་འཛམ་གླིང་ཁྱོན་ཡོངས་ཀྱི་གཉའ་གནོན་འོག་གི་མི་མང་ལ་རང་དབང་དང་། འདྲ་མཉམ། དྲང་བདེན་བཅས་ཀྱི་ཆེད་དུ་མིག་དཔེ་འོས་པའི་ཞབས་འདེགས་ཞུས་པ་དང་། བོད་མི་ཡོངས་ལ་གཡོ་བ་མེད་པའི་རྒྱབ་སྐྱོར་ཕན་གྲོགས་གནང་བར་བཀའ་དྲིན་རྗེས་དྲན་མཚོན་སླད་ཕྱག་རྟགས་མཆོད་རྟེན་རིན་པོ་ཆེ་ཞིག་ཕུལ་ཡོད།
སྐབས་དེར་གྲོས་ཚོགས་འཐུས་མི་ཇེ་ནི་ཊི་ར་ཧི་སི་ལགས་ཀྱིས། ངས་མུ་མཐུད་ནས་བོད་རང་དབང་གི་ཆེད་དུ་འཐབ་རྩོད་བྱ་རྒྱུ་ཡིན། རང་དབང་ཁང་པའི་སྙན་ཐོ་ལྟར་ན། བོད་ནི་འཛམ་གླིང་གི་རང་དབང་ཆེས་ཞན་པའི་རྒྱལ་ཁབ་ཅིག་ཡིན། ན་ནིང་ང་ཚོའི་གྲོས་ཚོགས་འཐུས་མི་གྲོགས་པོ་ཚོ་དང་ལྷན་དུ་དྷ་རམ་ས་ལར་བསྐྱོད་རྒྱུ་བྱུང་བ་སྐལ་པ་བཟང་པོ་བྱུང་། དོན་དངོས་སུ་བཤད་ན། ང་རང་ད་ལྟ་ཨོསྟྲེ་ལི་ཡཱའི་བོད་དོན་ལྷན་ཚོགས་ཀྱི་འགན་འཛིན་ལྷན་ཚོགས་ཁོངས་སུ་ཞུགས་རྒྱུར་མགྲོན་བརྡ་གནང་བར་དང་ལེན་བྱེད་གྲབས་ཡོད། དེ་རིང་འདིར་ཕེབས་པའི་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་གཙོས་པའི་ངའི་གྲོགས་པོ་གྲོགས་མོ་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཀྱང་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་གསར་པ་གྲོས་ཚོགས་གོང་མའི་འཐུས་མི་བྷར་བྷ་ར་ཕོ་ཁོ་ཁུན་སོན་ལགས་ལ་དགའ་བསུ་ཞུས་ཡོད་པ་རེད།
ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ལྕམ་སྐུ་ཇེ་ནེ་ཊི་ར་ཧི་སོ་ལགས་བགྲེས་ཡོལ་དུ་ཕེབས་ཀྱི་ཡོད་པ་དང་བསྟུན། བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གྲོས་ཚོགས་འཐུས་མི་ར་ཧི་སི་ལགས་ལ་སྤྲིངས་པའི་གསུང་འཕྲིན་ནང་། ངས་བོད་མི་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁྱེད་ཀྱིས་བོད་མི་མང་ཆེད་ཞུ་གཏུག་འཐབ་རྩོད་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཀྱིས་དྲང་བདེན་ཆེད་སྐུ་ངལ་ལ་མ་འཛེམས་པར་དབང་ཚད་ལྡན་པའི་སྒྲིག་འཛུགས་ལ་གདོང་ལེན་གནང་བ་དེ་ནི་ཁྱེད་ཀྱི་གཞུང་དྲང་དང་སྙིང་སྟོབས་ཀྱི་དཔང་རྟགས་རེད། དེ་བཞིན་འགྲོ་བ་མི་རིགས་ཀྱི་བདེ་དོན་ཆེད་ཁྱེད་ཀྱིས་མཐུན་ཕྱོགས་ཆིག་སྒྲིལ་དང་། ཕྱོགས་འགལ་བ་ཕན་ཚུན་བར་འཆམ་མཐུན་གྱི་ཟམ་པ་བཟོ་ཐུབ་པ་དེ་ནི་ཀུན་གྱི་མིག་དཔེར་འོས་ཤིང་ནུས་པ་ལྡན་པའི་འཛིན་སྐྱོང་བྱེད་ཐབས་ཀྱི་དཔེ་བཟང་ཞིག་རེད། ཅེས་གསུངས།
དེ་བཞིན་སྐབས་དེར་ཉེ་ཆར་དྷ་རམ་ས་ལར་ཕེབས་པའི་གྲོས་ཚོགས་འཐུས་མི་ཌིན་སི་མེ་ཐི་ནིན་ལགས་ཀྱིས་བཙན་བྱོལ་བོད་མིའི་དབུ་ཁྲིད་ཚོ་དང་མཇལ་འཕྲད་གནང་བའི་ཉམས་མྱོང་དང་། བོད་ཀྱི་གནད་དོན་ལ་གོ་བ་ཇེ་ཟབ་ཏུ་སོང་བ། དེ་བཞིན་བཙན་བྱོལ་བོད་མིའི་འཚོ་བ་ལ་ངེས་ཤེས་རྙེད་པའི་སྐོར་གསུངས་རྗེས་མཐར་ཚོགས་བཅར་བ་རྣམས་ལ་བོད་ཟས་འདེགས་འབུལ་ཞུས་ཏེ་མཛད་རིམ་ལེགས་པར་མཇུག་སྒྲིལ་ཡོད་པ་བཅས།།
