༄༅། །ཨོ་སྟྲེ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབསཊིན་སི་མིཊ་(Dean Smith) ལགས་ཀྱིས་སྣེ་འཁྲིད་པའི་གྲོས་ཚོགས་འཐུས་མི་དང་ཨོ་གླིང་གི་སྲིད་བློན་གཞོན་པ་ཟུར་པ་སྐུ་ཞབས་མ་ཧི་ཀལ་མེག་ཀོར་མེག་ (Michael McCormack) ལགས།  དེ་བཞིན་གྲོས་ཚོགས་འཐུས་མི་ལྕམ་སྐུ་དི་བུ་ར་ཨོ་ནིལ་ (Deborah O’ Nell) ལགས། གྲོས་ཚོགས་འཐུས་མི་སྐུ་ཞབས་ཊེ་ཝིཊ་ཨི་སི་མིཊ་ (David Smith) ལགས་བཅས་ལས་གྲུབ་པའི་ཨོ་སྟྲེ་ལི་ཡའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༤ ཟླ་བ་ ༣ ཚེས  ༩ ཉིན་བཞུགས་སྒར་རྡ་སར་ཆེད་ཕེབས་གནང་གཏན་ཁེལ་ཡོད།

ཨོ་སྟྲེ་ལི་ཡའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་ནས་བཞུགས་སྒར་དུ་ཉིན་གྲངས་བཞིའི་རིང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་མཇལ་འཕྲད། དེ་བཞིན་བཞུགས་སྒར་དུ་རྟེན་གཞི་བྱས་པའི་ཤེས་ཡོན་དང་རིག་གཞུང་བསྟི་གནས་ཁག་ལ་འཚམས་གཟིགས། གཞུང་ཁོངས་མ་ཡིན་པའི་ཚོགས་པ་ཁག་གི་ལས་སྣེ་སྐུ་ཚབ་རྣམ་པ་དང་ཐུག་འཕྲད་གནང་རྒྱུའི་ལས་རིམ་ཡོད་པ་རེད། ལྷག་པར་བོད་མིའི་རང་དབང་འཐབ་རྩོད་ལ་གདུང་སེམས་མཉམ་སྐྱེད་དང་རྒྱབ་སྐྱོར་མཚོན་སླད་ཕྱི་ཟླ་ ༣ ཚེས་ ༡༠ ཉིན་ཏེ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་གྱི་གཞུང་འབྲེལ་མཛད་སྒོར་ཕེབས་ཞུགས་གནང་རྒྱུ་རེད་འདུག

གོང་འཁོད་སྐུ་མགྲོན་རྣམ་པ་དང་ལྷན་དུ་ཨོ་སྟྲེ་ལི་ཡའི་སྐུ་ཚབ་དོན་གཅོད་ཀརྨ་སེངྒེ་ལགས་དང་ཨོ་སྟྲེ་ལི་ཡའི་བོད་དོན་ལྷན་ཚོགས་ཀྱི་ཚོགས་མི་ལྕམ་སྐུ་ཛའོ་བྷེ་ཌི་ཕོར་ཌི་ (Dr. Zoe Bedford) ལགས་ལྷན་བཅར་ཞུ་རྒྱུ་རེད་འདུག