༄༅། །ཕྱི་ལོ་ ༢༠༢༤ཟླ་བ་ ༣ ཚེས་ ༡༠ ཉིན་འཛམ་གླིང་གི་ས་གནས་གང་སར་བོད་མི་དང་བོད་དོན་རྒྱབ་སྐྱོར་བ་ཚོས་བོད་ཀྱི་རྒྱལ་ས་ལྷ་ས་རུ་བོད་མི་ཚོས་རྒྱ་ནག་གི་བཙན་འཛུལ་ལ་སྒེར་ལངས་བྱས་ནས་མི་ལོ་ ༦༥ འཁོར་བའི་དུས་དྲན་སྲུང་བརྩི་ཞུ་བཞིན་པར་ལྟར། ཨོ་གླིང་རི་སྔོན་པོ་རུ་བོད་མི་ཚོས་ས་གནས་གྲོང་སྡེ་ལས་ཁུངས་མདུན་དུ་དུས་དྲན་སྲུང་བརྩི་དང་།  ས་གནས་གྲོང་སྡེ་ལས་ཁུངས་ཀྱིས་གཞུང་འབྲེལ་ཐོག་བོད་ཀྱི་རྒྱལ་དར་སྒྲེང་འཛུགས་གནང་ཡོད།འདི་ལོར་གཞུང་འབྲེལ་ཐོག་རྒྱལ་དར་སྒྲེང་འཛུགས་ཐེངས་དྲུག་པ་ཡིན་ཞིང་། རྒྱལ་དར་དེ་བཞིན་གྲོང་སྡེ་ལྷན་ཁང་མདུན་དུ་དུས་ཡུན་བདུན་ཕྲག་གཅིག་ཙམ་གྱི་རིང་སྒྲེང་འཛུགས་གནང་གི་ཡོད་པ་དང་། ཨོ་སྟྲེ་ལི་ཡའི་ནང་གཞུང་འབྲེལ་ཐོག་བོད་ཀྱི་རྒྱལ་དར་སྒྲེང་འཛུགས་གནང་མཁན་ས་གནས་གཅིག་པུ་དེ་ཆགས་ཡོད་པ་རེད།དེ་རིང་གི་མཛད་སྒོ་ཐོག་སྐུ་མགྲོན་གཙོ་བོ་བྷིལ་ཀི་རི་ཡུ་ཐེབས་རྩའི་ (Rev Bill Crews Foundation) དགེ་རྩ་ཁང་གི་འགན་འཛིན་བྷིལ་ཀི་རི་ཡུ་ (Rev Bill Crews) ལགས་དང་། སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་ལྷ་དབང་རྒྱལ་པོ་ལགས།  དེ་བཞིན་ཆབ་སྲིད་ཚོགས་པ་ཁག་གི་སྐུ་ཚབ་དང་ས་གནས་ཚོགས་པ་ཁག་གི་སྐུ་ཚབ་སོགས་བོད་དོན་རྒྱབ་སྐྱོར་བ་དང་བོད་མི་སོགས་མི་གྲངས་བརྒྱད་ཅུ་ལྷག་འདུ་འཛོམས་གནང་ཡོད། ས་གནས་རི་སྔོན་པོ་བོད་རིགས་མཐུན་ཚོགས་ཀྱི་ཚོགས་གཙོ་ཡ་ལོ་ངག་དབང་ལགས་ཀྱིས་སྐུ་མགྲོན་རྣམ་པར་འཚམས་འདྲི་གནང་སྟེ་བོད་ནང་གི་ཛ་དྲག་གནས་སྟངས་དང་། གསུམ་བཅུའི་དུས་དྲན་གྱི་བྱུང་རིམ་སོགས་ངོ་སྤྲོད་ཀྱིས་མཛད་སྒོ་དབུ་འཛུགས་གནང་། སྐུ་མགྲོན་གཙོ་བོ་བྷིལ་ཀི་རི་ཡུ་ལགས་ཀྱིས་གསུང་བཤད་གནང་དོན། རྒྱ་ནག་གིས་སྟབས་མ་ལེགས་པར་འཛམ་གླིང་ལ་ལེགས་སྐྱེས་ཤིག་ཕུལ་ཡོད་པ་དེ་ནི་བོད་མི་རེད།  རྒྱ་ནག་གིས་བོད་ལ་བཙན་འཛུལ་བྱས་མེད་ན་འཛམ་གླིང་གིས་ཅིག་བྱས་ན་ད་དུང་ཡང་བོད་ཟེར་བ་དེ་ངོ་ཤེས་མེད་སྲིད།   རྒྱ་ནག་གིས་བོད་ལ་བཙན་འཛུལ་བྱས་པར་བརྟེན་ང་ཚོ་འཛམ་གླིང་ཧྲིལ་པོ་ནས་བོད་ཟེར་བའི་རིག་གཞུང་ཕུན་སུམ་ཚོགས་པ་འཛོམས་པའི་མི་རིགས་ཤིག་ངོ་ཤེས་པ་དང་།  ཁོ་ཅག་གི་གོམས་སྲོལ་བཟང་པོ་སོགས་ང་ཚོས་མཉམ་དུ་སྤྱོད་ཐུབ་པ་བྱུང་ཡོད་ཚུལ་དང་།  དེ་བཞིན་རང་དབང་ནི་འགྲོ་བ་མི་ཚང་མར་དབང་བ་ཞིག་ཡིན་པས་སུ་ཞིག་གིས་རང་དབང་ཤོར་ན་དེས་རང་དབང་རྩོད་ལེན་བྱེད་པའི་ཐོབ་ཐང་ཡོད་པ་དང་། བོད་མི་རྣམས་ཀྱིས་འཛམ་གླིང་སྤྱི་ལ་ཡ་རབས་སྤྱོད་བཟང་གི་མིག་དཔེ་དང་རིག་གཞུང་གི་ཕྱུག་པའི་འཚོ་གནས་ཀྱི་གོམས་སྲོལ་སོགས་ཀྱིས་ང་ཚོར་ལག་སྐྱེས་ཕུན་སུམ་ཚོགས་པ་སྤྲོད་ཐུབ་ཀྱི་ཡོད་ཚུལ་གྱིས་གསུང་བཤད་གནང་།དེ་བཞིན་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་ལྷ་དབང་རྒྱལ་ལགས་ཀྱིས་བཀའ་ཤག་གི་གསུམ་བཅུའི་དུས་དྲན་ཐེངས་༦༥ པའི་གསུང་འཕྲིན་སྒྲོགས་སྦྱང་དང་། གྲོང་སྡེ་ལས་ཁུངས་ནས་བོད་ཀྱི་རྒྱལ་དར་སྒྲེང་འཛུགས་གནང་བར་ཐུགས་རྗེ་ཆེ་ཞུས་པ་དང་ལྗང་ཁུ་ཚོགས་པའི་གྲོང་སྡེ་འཐུས་མི་ཟུར་བ་བོད་དོན་རྒྱབ་སྐྱོར་བ་་ཀི་རི་ (Kerry Brown) ལགས་ཀྱིས་བོད་དོན་གསུང་བཤད་གནང་སྟེ་རྒྱ་ནག་དམར་གཞུང་གིས་འཛམ་གླིང་དམག་ཆེན་གཉིས་པ་མཇུག་རྫོགས་ཙམ་དང་། ཉི་ཧོང་གི་གྲོང་ཁྱེར་ཧི་རོ་ཤི་མ་དང་ན་ག་ས་ཀི་ (Atomic bombings of Hiroshima and Nagasaki) ཡིས་གནོད་སྐྱོན་འོག་འཛམ་གླིང་ཧྲིལ་པོ་དཀའ་ཚེགས་ཀྱི་སྐབས་ཤིག་སླེབས་པའི་དུས་མཚུངས་སུ་བོད་དུ་བཙན་འཛུལ་བྱེད་འགོ་བཙུགས་ཏེ་འཛམ་གླིང་གིས་མི་མཐོང་སར་བཙན་འཛུལ་བྱས་ཡོད་ཚུལ་གྱིས་གསུང་བཤད་གནང་བ་དང་། གཞུང་འཛིན་ཆབ་སྲིད་ཚོགས་པའི་འཐུས་མི་སུ་ཛི་ཝན་ཨོབ་ཊོར་བ་ (Suzie van Opdorp) ལགས་ཀྱིས་གྲོང་སྡེ་སྤྱི་ཁྱབ་པ་ མག་གྷི་རིན་ཧིལ་ (Mark Greenhill) ལགས་ཀྱི་སྐུ་ཚབ་ཀྱིས་གསུང་བཤད་གནང་སྟེ་རི་སྔོན་པོ་གྲོང་སྡེ་ལྷན་ཁུངས་ཀྱི་ཁྱབ་ཁོངས་སུ་བོད་མི་སྐྱབས་བཅོལ་བ་ཡོད་པ་ནི་ང་ཚོའི་སྤོབས་པ་སྐྱེས་འོས་ཚུལ་དང་། ས་གནས་བོད་མི་རྣམས་ཀྱིས་རང་འགོ་རང་ཐོན་དང་སྣེ་ཁྲིད་ཀྱི་ཕྱག་ལས་གནང་ཚུལ་སོགས་ལ་ཚོགས་པ་གཞན་གྱིས་མིག་དཔེ་བལྟ་འོས་ཚུལ་གྱིས་གསུང་བཤད་གནང་བ་དང་། བོད་རིགས་མཐུན་ཚོགས་ཀྱི་ལས་འགུལ་འགན་འཛིན་དཀོན་མཆོག་རྒྱལ་མཚན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་མཇུག་བསྡུས། །