༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༡༠ བོད་མིའི་རང་དབང་སྒེར་ལངས་ཐེངས་ ༦༥ པའི་ཉིན་ཨ་རིའི་གྲོས་ཚོགས་ཀྱི་སྲིད་དོན་ཚོགས་པ་ཟུང་སྦྲེལ་གྱིས་བོད་དོན་ལ་རྒྱབ་སྐྱོར་མཚོན་ཆེད་ཨ་རིའི་གྲོས་ཚོགས་འཐུས་མི་མེག་གོ་ཧན་ལགས་དང་། ཡོང་ཀིམ་ལགས་ཀྱིས་གྲོས་ཚོགས་འོག་མའི་ནང་གྲོས་ཆོད་གལ་ཆེན་ཞིག་བཏོན་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པར་སྐྱོན་བརྗོད་གནང་ཡོད།
གྲོས་ཆོད་ཨང་ ༡༠༧༢ པས་བོད་མི་མང་གིས་རྒྱུན་རིང་འཐབ་རྩོད་བྱས་པར་ངོས་འཛིན་དང་། རྒྱ་ནག་གཞུང་གི་དམག་གི་བཙན་འཛུལ་ལ་བརྟེན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནས་བཙན་བྱོལ་དུ་ཕེབས་ནས་ལོ་དྲུག་ཅུ་རེ་ལྔ་འཁོར་བའི་རྗེས་དྲན་ལ་ངོས་འཛིན་གནང་བའི་ཐོག བོད་མིའི་རང་ཐག་རང་གཅོད་ལ་རྒྱབ་སྐྱོར་བསྐྱར་ནན་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་སྟངས་འཛིན་བྱེད་པའི་མི་སེར་སྤེལ་ཡུལ་གཏན་འཇགས་སློབ་གྲྭར་བོད་ཕྲུག་བཙན་འཇུག་དང་། བོད་རིགས་འབྲོག་པ་རྣམས་གནས་སྤོ་བྱེད་དུ་འཇུག་པ། ཆོས་ལུགས་ཀྱི་ཉམས་ལེན་ཁག་ལ་ཐེ་བྱུས་བྱེད་པ་སོགས་བརྒྱུད་བོད་མིའི་ཆོས་དད་དང་། རིག་གཞུང་། སྐད་ཡིག་ལོ་རྒྱུས་བཅས་ཀྱི་ངོ་བོ་ཐ་དད་པ་རྣམས་གོ་རིམ་ལྡན་པའི་སྒོ་ནས་རྩ་མེད་བཟོ་བཞིན་པར་སྐྱོན་བརྗོད་གནང་ཡོད།
དེ་བཞིན་གྲོས་ཆོད་འདིས་བོད་ཁམས་སྡེ་དགེར་རྒྱ་ནག་གཞུང་གིས་ཆུ་མཛོད་གསར་རྒྱག་གི་ལས་གཞི་སྤེལ་བར་ས་གནས་བོད་མི་རྣམས་ནས་ངོ་རྒོལ་གནང་བར་བོད་མི་གྲངས་ ༡༠༠༠ ལྷག་འཛིན་བཟུང་བཙོན་འཇུག་བྱས་པར་སྐྱོན་བརྗོད་གནང་ཡོད་པ་མ་ཟད། ཆུ་མཛོད་ཀྱི་ལས་གཞི་དེས་རྐྱེན་པས་བོད་མི་རྣམས་གནས་སྤོ་དང་། ལོ་རྒྱུས་རང་བཞིན་ལྡན་པའི་དགོན་པ་རྣམས་གཏོར་བཤིག་གཏོང་བ། དེ་བཞིན་ངོ་རྒོལ་བྱེད་མཁན་རྣམས་རང་དགར་བཙོན་འཇུག་བྱས་པ་བཅས་ལ་ཡང་ཐུགས་འཚབ་བསྟན་ཡོད། ཆུ་མཛོད་ཀྱི་ལས་གཞི་དེ་ལ་བརྟེན་ནས་ས་གནས་ཀྱི་སྤྱི་ཚོགས་དང་། ལོ་རྒྱུས་ཀྱི་གནས་ཆེན་ཁག་ལ་གནོད་སྐྱོན་ཚབས་ཆེན་འཕོག་གི་ཡོད་པ་རེད།
གྲོས་ཆོད་འདིས་བོད་ཁམས་སྡེ་དགེར་ཆུ་མཛོད་ལས་གཞིར་ངོ་རྒོལ་གནང་མཁན་བོད་མི་ཐེ་བའི་ཆབ་སྲིད་བཙོན་པ་ཚང་མ་འཕྲལ་དུ་གློད་བཀྲོལ་གཏོང་དགོས་པའི་རེ་སྐུལ་དང་། ཨ་རིའི་སྲིད་འཛིན་ཇོ་བྷེ་ཌེན་མཆོག་ལ་རྒྱ་ནག་གིས་ཆུ་མཛོད་བཟོ་བའི་ལས་འཆར་མཚམས་འཇོག་བྱེད་དགོས་པའི་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད། གྲོས་ཚོགས་འཐུས་མི་མེག་གོ་ཧན་ལགས་ཀྱིས་གྲོས་ཆོད་དེའི་གལ་གནད་ནན་བརྗོད་གནང་དོན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་བཙན་བཟུང་བྱས་རྗེས་༸གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་བཙན་བྱོལ་དུ་ཕེབས་དགོས་བྱུང་བ་ནས་བཟུང་ད་ལྟའི་བར་དུ་ལོ་ངོ་དྲུག་ཅུ་རེ་ལྔ་ཕྱིན་པ་རེད། དུས་དེ་ནས་བཟུང་བོད་མི་མང་གིས་རང་ཐག་རང་གཅོད་དང་འགྲོ་བ་མིའི་ཐོབ་ཐང་ཆེད་དུ་ཉིན་རེ་བཞིན་འཐབ་རྩོད་བྱས་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ངེས་པར་དུ་རང་ཁྲིམས་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་བརྩི་སྲུང་བྱས་ཏེ་བོད་མིར་གཉའ་གནོན་མཚམས་འཇོག་བྱེད་དགོས། ཞེས་གསུངས།
གྲོས་ཚོགས་འཐུས་མི་ཀུམ་ལགས་ཀྱིས་གྲོས་ཆོད་འདིར་སྲིད་དོན་ཚོགས་པ་ཟུང་སྦྲེལ་གྱིས་རྒྱབ་སྐྱོར་ཡོད་སྐོར་དང་། བོད་མིའི་རང་དབང་དང་ཆེ་མཐོང་ཆེད་ཨ་རི་གཞུང་གིས་རྒྱབ་སྐྱོར་གནང་གི་ཡོད་སྐོར་གསལ་བཤད་གནང་བཞིན་ཁོང་གིས། བོད་མི་ཚོས་ལོ་ངོ་བཅུ་ཕྲག་མང་པོའི་རིང་རྒྱ་དམར་གུང་ཁྲན་གཞུང་གི་བཙན་གནོན་དང་སྡུག་སྦྱོང་མནར་གཅོད་མྱངས་ཡོད་པར་བརྟེན། ང་ཚོས་བོད་མི་ཚོ་དང་ལྷན་དུ་ལངས་ནས་རྒྱ་དམར་གུང་ཁྲན་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བའི་འགན་འཁྲི་རྒྱ་ནག་དམར་གཞུང་ལ་ངེས་པར་དུ་འཁུར་འཇུག་དགོས། ཞེས་གསུངས་ཡོད།
ཨ་རིའི་གྲོས་ཚོགས་འོག་མའི་ནང་བོད་དོན་དང་འབྲེལ་བའི་གྲོས་ཆོད་ཅིག་བཞག་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། གྲོས་ཚོགས་འཐུས་མི་ཇིམ་མེག་གོ་ཡན་ལགས་དང་། གྲོས་ཚོགས་འཐུས་མི་ཀིམ་ཡོང་ལགས་ཀྱིས་བོད་མིའི་རང་དབང་སྒེར་ལངས་ཐེངས་ ༦༥ དང་བསྟུན་བོད་མི་རྣམས་ནས་རྒྱ་གཞུང་གི་དྲག་གནོན་ལ་གདོང་ལེན་བྱེད་བཞིན་པར་རྒྱབ་སྐྱོར་གྱི་གྲོས་ཆོད་འདི་བཏོན་པར་ངས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཡོང་འགྱུར་ང་ཚོ་མཉམ་རུབ་ཀྱིས་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་འཆར་དེ་ཁྲིམས་ཡིག་ཏུ་གཏན་འབེབས་བྱེད་ཐུབ་པའི་རེ་བ་རྒྱག་གི་ཡོད། ཅེས་གསུངས་ཡོད་པ་བཅས།།
