༄༅། ། ཕ་རན་སིའི་གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པས་ཕྱི་ལོ་ ༢༠༢༤ ཟླ་ ༣ ཚེས་ ༡༠ ཉིན་བོད་ཁམས་སྡེ་དགེ་ཁུལ་དུ་རྒྱ་ནག་གཞུང་གིས་ཆུ་མཛོད་གསར་རྒྱག་གི་ལས་གཞིར་ཞི་རྒོལ་གནང་མཁན་བོད་མི་རྣམས་ལ་དྲག་གནོན་བྱས་པའི་ཡ་ང་བའི་ཛ་དྲག་གནས་ཚུལ་ལ་ཐུགས་འཚབ་དང་སྦྲགས་བོད་མི་ཞི་རྒོལ་བ་རྣམས་འཕྲལ་དུ་གློད་བཀྲོལ་དགོས་པའི་བསྒྲགས་སྤེལ་ཡོད།

བསྒྲགས་གཏམ་འདིའི་ནང་ཕ་རན་སིའི་གྲོས་ཚོགས་གོང་མའི་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལེན་ཨུ་ས་ཊ་ཆི་བྷི་རི་ནའོ་ (Jacqueline Eustache-Brinio) ལགས་ཀྱིས་རྒྱ་ནག་གཞུང་ནས་ཆུ་མཛོད་ཀྱི་ལས་གཞིའི་རྐྱེན་པས་ཁོར་ཡུག་ལ་དོ་ཕོག་དང་ཡུལ་མི་མང་ཚོགས་བཙན་ཤེད་ཀྱི་གནས་སྤོ། གནའ་ཤུལ་རྩ་ཆེའི་རིག་གཞུང་ལྡན་པའི་དགོན་སྡེ་ཁག་གཏོར་བཤིག་འགྲོ་ཉེན་ལ་བསམ་གཞིག་དང་དོ་ཁུར་དགོས་པའི་སྐུལ་འདེད་གཏང་འདུག་པ་བཅས།།