༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༢༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྭཱ་མཱི་སྨརཎཱ་ནནྡ་མ་ཧཱ་རཱཇ་ (Swami Smarananda Maharaj) མཆོག་དགོངས་པ་རྫོགས་པར་ཐུགས་གསོའི་གསུང་འཕྲིན་སྩལ་ཡོད།

དེ་ཡང་གསུང་འཕྲིན་ནང་མགོན་པོ་མཆོག་གིས། ངོས་ཀྱིས་ཞིང་གཤེགས་དམ་པ་ཁོང་གི་ཆེད་བསྔོ་སྨོན་དང་། རཱ་མ་ཀྲྀཥྞ་ཚོགས་པའི་འབྲེལ་ཡོད་རྣམ་པ་གཙོས་པའི་ཁོང་གིས་རྗེས་འཇུག་གདུལ་བྱ་རྣམས་ལ་ཐུགས་གསོ་ཞུ་རྒྱུ་ཡིན།

ཞིང་གཤེགས་དམ་པ་ཁོང་གིས་གཞན་ཕན་གྱི་ཞབས་ཞུ་བསྒྲུབས་ཏེ་སྐུ་ཚེ་དོན་དང་ལྡན་པ་སྐྱེལ་བ་ནི་ངོ་མཚར་སྐྱེ་འོས་པ་ཞིག་རེད། ངོས་ཀྱིས་ཞིང་གཤེགས་ཁོང་གི་རྗེས་འཇུག་རྣམས་དང་ལྷན་དུ་ཁོང་ལ་བསྔོ་སྨོན་ཞུ་རྒྱུ་ཡིན། ཞེས་བཀའ་སྩལ་ཡོད་པ་བཅས།།