༄༅། །ཕྱི་ལོ་ ༢༠༢༤ ཟླ་ ༣ ཚེས་ ༢༠ ཉིན་བཞུགས་སྒར་རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཏཱ་ལའི་བླ་མ་ཧྥུ་ལོ་ཞེས་པའི་ལས་གཞིའི་སློབ་ཕྲུག་རྣམས་དང་ལྷན་དུ་བྱམས་སྙིང་རྗེའི་སྤྱོད་པ་ལ་འཇུག་པ་ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད་པ་རེད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་ནས་མཇལ་འཕྲད་ཚོགས་ཁང་དུ་ཆིབས་བསྒྱུར་གྱིས་༸ཞབས་སྟེགས་སུ་འཁོད་མཚམས་འབུམ་རམས་པ་ཕི་ལིཔ་ (Philip P.Distefano) ལགས་ཀྱིས་ཕེབས་བསུའི་གསུང་བཤད་གནང་བ་དང་། བགྲོ་གླེང་མདོ་འཛིན་པ་འབུམ་རམས་པ་སོ་ནཱ་ (sona Dimidjian) ལགས་ཀྱིས་བགྲོ་གླེང་དབུ་འཛུགས་ཀྱི་གསུང་བཤད་གནང་མཚམས་༸གོང་ས་མཆོག་གིས་འགྲོ་བ་མིའི་རིགས་ནི་གཞི་རྩའི་ཆ་ནས་གཅིག་མཚུངས་ཡིན་པ་དང་། མའི་མངལ་ལས་སྐྱེས་རྗེས་ཨ་མའི་བྱམས་བརྩེ་ལ་བརྟེན་ནས་འཚར་ལོངས་བྱུང་ཡོད་པ་དང་། ཆུང་བྱིས་པའི་དུས་སུ་ཆོས་ལུགས་དང་མི་རིགས། རྒྱལ་ཁབ་སོགས་ཀྱི་དབྱེ་འབྱེད་མེད་པར་སེམས་ཧ་ཅང་གཙང་མ་ཡིན་པ་མ་ཟད། ཆོས་ལུགས་དང་རིགས་རྒྱུད་མི་གཅིག་པའི་ཕྲུ་གུ་ཚོ་མཉམ་དུ་རྩེད་མོ་རྩེས་ནས་ཧ་ཅང་ལྷད་མེད་དང་བྱམས་བརྩེ་ལྡན་པ་ཡིན་པའི་སྐོར་བཀའ་གནང་བ་དང་།གཞན་ཡང་མི་རྣམས་འཚར་ལོངས་ཀྱི་རིམ་པའི་ནང་དུ་མི་རིགས་དང་ཆོས་ལུགས་ཀྱི་དབྱེ་འབྱེད་ཀྱི་ཚོར་བ་སླེབས་པ་ནས་དཀའ་རྙོག་མང་པོ་ཞིག་དང་འཕྲད་བཞིན་ཡོད་སྐོར་སོགས་འགྲོ་བ་མིར་གཅིག་མཚུངས་ཀྱི་འདུ་ཤེས་འཛིན་རྒྱུ་ཧ་ཅང་གལ་ཆེན་པོ་ཡིན་པའི་སྐོར་ལ་བཀའ་སློབ་སྩལ་བ་དང་། དྲི་བ་དྲིས་ལན་གྱི་སྐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ན་ཕྲ་མོའི་སྐབས་བོད་ལ་དཀའ་ངལ་ཧ་ཅང་ཆེན་པོ་འཕྲད་སྐབས་བྱམས་བརྩེའི་ཉམས་ལེན་རྒྱུན་སྐྱོང་ཇི་ལྟར་མཛད་པའི་སྐོར་སོགས་དྲི་བ་ཁག་ལ་བཀའ་ལན་སྩལ་རྗེས་ཉིན་དང་པོའི་བགྲོ་གླེང་གནང་སྒོ་ལེགས་པར་གྲུབ་ཡོད། ཚེས་ ༢༡ ཉིན་སྤྱི་ཚོགས་ཀྱི་སྣེ་ཁྲིད་འགན་ཁུར་ལེན་མཁན་ལ་བྱམས་བརྩེས་ཕན་ནུས་གང་ཡོད་ཀྱི་སྐོར་སོགས་ལ་བཀའ་སློབ་དང་དྲི་བར་བཀའ་ལན་སྩལ་རྒྱུ་ཡིན་པ་རེད། ཏཱ་ལའི་བླ་མ་ཧྥུ་ལོ་ཞེས་པའི་ལས་གཞི་ནི་ཕྱི་ལོ་ ༢༠༡༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱབ་སྐྱོར་མཛད་ནས་གསར་གཏོད་བྱས་པ་ཞིག་ཡིན་པ་དང་། ལས་གཞི་འདིར་རྒྱལ་ཁབ་ ༥༦ ནས་སློབ་ཕྲུག་ ༢༠༠ ཙམ་གྱིས་མཉམ་ཞུགས་གནང་སྟེ། རྒྱལ་སྤྱིའི་སྟེང་སྣེ་ཁྲིད་ཀྱི་ནུས་པ་ལྡན་པའི་མི་སྣ་བསྡུ་རུབ་དང་། འབྲེལ་བ་དམ་ཟབ་དང་སྤྱོད་བཟང་གོང་སྤེལ་གྱི་ཐད་འབད་བརྩོན་ཞུ་བཞིན་པ་ཞིག་ཡིན་པ་རེད། །