༄༅། །འདི་གར་རྡོར་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༣ ཚེས་ ༡༩༌༌༌༢༥ བར་དཔལ་ས་སྐྱ་༸སྐྱབས་མགོན་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དབུ་བཞུགས་ཐོག་རྡོ་རྗེ་གླིང་གུམ་ས་སྐྱ་གུ་རུ་དགོན་མདོ་སྔགས་ནོར་བུའི་གླིང་དུ་༸སྐྱབས་མཆོག་འཁོན་གདུང་ཨ་སངྒ་བཛྲ་རིན་པོ་ཆེ་མཆོག་དགོན་བདག་ཏུ་མངའ་གསོལ་གྱི་རྟེན་འབྲེལ་མཛད་སྒོ་ཚོགས་པ་དང་། དེ་བཞིན་ཆོས་འབྲེལ་དང་བརྟན་བཞུགས་སོགས་ཆོས་ཕྱོགས་ཀྱི་མཛད་འཕྲིན་རིམ་པ་བསྐྱངས་ཡོད་པ་བཞིན། དགོན་བདག་མངའ་གསོལ་གྱི་མཛད་སྒོར་ཇི་ལྟར་མགྲོན་འབོད་གནང་དོན་བཞིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ཏུ་རྡོར་གླིང་ས་གནས་འགོ་འཛིན་འདན་མ་ཚང་པདྨ་ཚེ་རིང་ལགས་ཆེད་བཅར་གྱིས་མཉམ་ཞུགས་གནང་ཡོད།
དེ་ཡང་དཔལ་ས་སྐྱ་༸སྐྱབས་མགོན་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་སྟོན་འཁོར་དང་བཅས་ཕྱི་ལོ་ ༢༠༢༤ ཟླ་ ༣ ཚེས་ ༡༨ ཉིན་རྡོར་གླིང་གུམ་དགོན་པར་༸ཞབས་སོར་འཁོད་རྗེས་མཛད་འཕྲིན་གྱི་གཙོ་བོར་ཕྱི་ལོ་ ༢༠༢༤ ཟླ་ ༣ ཚེས་ ༢༡ ཉིན་སྟེ་དགོན་བདག་མངའ་གསོལ་གྱི་མཛད་སྒོ་སྔ་དྲོའི་མཛད་རིམ་དུ་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་བཞུགས་ཁྲིར་༸ཞབས་སོར་འཁོད་བསྟུན། ཚེ་ལྷ་རྣམ་གསུམ་གྱི་གསུང་ཆོག་གནང་བ་དང་། དེ་ནས་༸སྐྱབས་མཆོག་འཁོན་གདུང་ཨ་སངྒ་བཛྲ་རིན་པོ་ཆེ་གདན་འདྲེན་ཞུས་སྟེ། དགོན་བདག་མངའ་གསོལ་གྱི་མཛད་སྒོ་དངོས་གཞི་དབུ་འཛུགས་གནང་། དེ་རྗེས་གྲྭ་ཚང་ནས་༸སྐྱབས་མཆོག་འཁོན་གདུང་ཨ་སངྒ་རིན་པོ་ཆེར་མཎྜལ་རྟེན་འབུལ་ཞུས་ཤིང་། རིམ་པས་སྒྲོལ་ཕུན་ཕོ་བྲང་སོ་སོ་དང་། བླ་བྲང་ཁག བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ། དགོན་སྡེ་ཁག་དང་ཆོས་ཚོགས་སོགས་ནས་མཎྜལ་རྟེན་འབུལ་དང་རྟེན་འབྲེལ་མཇལ་དར་སྒྲོན་འབུལ་ཞུས། ཕྱོགས་མཚུངས་བོད་མིས་གཙོས་ས་གནས་ཀྱི་ཕྱི་ནང་དད་ལྡན་ཚོགས་པ་སྐྱིད་སྡུག་ཁག་དང་མི་མང་ནས་རིམ་བཞིན་རྟེན་འབྱུང་མཇལ་དར་སྒྲོལ་འབུལ་དང་མཇལ་ཁ་ཞུས་ཡོད།
སྔ་དྲོའི་ཆོས་ཕྱོགས་ཀྱི་མཛད་རིམ་གྲུབ་རྗེས་ཉིན་རྒྱབ་ཀྱི་མཛད་སྒོར་དགོན་པའི་མཁན་པོ་མཆོག་ནས་ཕེབས་བསུའི་གསུང་བཤད་དང་། འགན་འཛིན་མཆོག་གིས་དགོན་པའི་བྱུང་རིམ་ལོ་རྒྱུས་དང་ལས་བསྡོམས་སྙན་སྒྲོན་ཞུས། ལྷག་པར་མཛད་སྒོའི་ཐོག་༸སྐྱབས་མགོན་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། ༸སྐྱབས་མཆོག་འཁོན་གདུང་ཨ་སངྒ་རིན་པོ་ཆེ་མཆོག་རྣམ་གཉིས་ནས་བཀའ་སློབ་བཀའ་དྲིན་སྩལ་བ་དང་། ཕྱོགས་མཚུངས་རྡོ་རྗེ་གླིང་དང་། བསུ་ན་མདའ། ཀ་ལོན་སྦུག་སོགས་ཀྱི་བོད་མིའི་ཚོགས་སྒེར་ཁག་དང་། སློབ་གྲྭ དེ་བཞིན་ཡོལ་མོ་བ་དང་། ཞིང་ས་བ། གོར་ཁ་སོགས་ས་གནས་ཀྱི་སྐྱིད་སྡུག་ཁག་ནས་གཞས་སྣ་གཟིགས་འབུལ་བཅས་ཀྱི་ལམ་ནས་དགོན་བདག་མངའ་གསོལ་གྱི་མཛད་སྒོ་གཟབ་རྒྱས་ཚོགས་ཡོད།
ཕྱི་ལོ་ ༢༠༢༤ ཟླ་ ༣ ཚེས་ ༢༣ ཉིན་༸སྐྱབས་མཆོག་འཁོན་གདུང་ཨངྒ་བཛྲ་རིན་པོ་ཆེ་མཆོག་ནས་སེར་སྐྱ་མང་ཚོགས་ལ་ཆོས་འབྲེལ་སྩལ་བ་དང་། ཕྱི་ཉིན་ཚེས་ ༢༤ ཉིན་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ནས་སེར་སྐྱ་མང་ཚོགས་ལ་རིག་གཞུང་རྗེས་གནང་བཀའ་དྲིན་སྩལ། མཛད་འཕྲིན་གྱི་མཐའ་མར་ཕྱི་ཚེས་ ༢༥ ཉིན་སྒྲོལ་དཀར་ཡིད་བཞིན་འཁོར་ལོའི་སྒྲུབ་བཞག་སྔོན་སོང་གིས་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་སྐུ་ཚེ་ཞབས་པད་བརྟན་པའི་ཆེད་རྡོར་གླིང་གུམ་ས་སྐྱ་གུ་རུ་དགོན་དང་། གུམ་སྐྱིད་སྡུག་ཁག་མཐུན་མོང་ནས་བརྟན་བཞུགས་བསྟར་འབུལ་ཞུས།
ཕྱི་ལོ་ ༢༠༢༤ ཟླ་ ༣ ཚེས་ ༢༦ ཉིན་དཔལ་ས་སྐྱའི་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་རྡོར་གླིང་གུམ་ས་སྐྱ་གུ་རུ་དགོན་པའི་མཛད་འཕྲིན་མཐའ་དག་རེ་ཞིག་ལེགས་པར་གྲུབ་ནས་ཕྱིར་ཀ་སྦུག་ཏུ་ཆིབས་བསྒྱུར་བསྐྱངས་སྐབས་རྡོར་གླིང་གུམ་ས་སྐྱའི་གུ་རུ་དགོན་དང་། རྡོར་གླིང་ས་གནས་འགོ་འཛིན་པདྨ་ཚེ་རིང་ལགས། རྡོར་གླིང་རང་ཚོགས་ཚོགས་གཙོ་འགྱུར་མེད་བརྩོན་འགྲུས་ལགས། དེ་བཞིན་ས་གནས་བོད་མིའི་ཚོགས་སྐྱིད་ཁག་བཅས་ནས་ཀ་སྦུག་ས་སྐྱའི་དགོན་བར་ཕེབས་སྐྱེལ་ཞུས་ཡོད།
སྤྱིར་རྡོ་རྗེ་གླིང་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་སུ་ཆོས་བརྒྱུད་འདྲ་མིན་གྱི་དགོན་སྡེ་ཁག་ ༡༢ ཙམ་ཡོད་ཁོངས་རྡོར་གླིང་གུམ་ས་སྐྱ་གུ་རུ་དགོན་པའམ་གུམ་དགོན་པ་ནི་རྒྱ་གར་ནང་རྟེན་གཞི་བྱས་པའི་དཔལ་ས་སྐྱ་པའི་དགོན་སྡེ་རྙིང་ཤོས་དེ་ཡིན་པ་བཅས། །
