༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་བོད་མིའི་སྐུ་ཚབ་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་བློ་འཚབ་དང་། དེ་དོན་ཡར་རྒྱས་གཏོང་དགོས་པའི་འབོད་སྐུལ་ཞུས་ཡོད།
དེ་ཡང་ཕྱི་ལོ་ ༢༠༢༤ ཟླ་བ་ ༠༣ ཚེས་ ༢༠ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༥ འཚོག་བཞིན་པའི་སྐབས་སུད་སི་སྐུ་ཚབ་དོན་ཁང་གི་རྒྱལ་ཚོགས་ཞུ་གཏུག་འབྲེལ་ལས་ཕུན་ཚོགས་སྟོབས་རྒྱལ་ལགས་ཀྱིས་བསྒྲགས་གཏམ་སྒྲོགས་སྦྱང་གནང་བའི་ནང་བོད་ཐེ་བའི་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། ལྷག་པར་བོད་ཀྱི་ཆོས་དང་རིག་གཞུང་ངོ་བོ་བཅས་པ་རྒྱ་ནག་གཞུང་གིས་ནག་བསུབ་གཏོང་བྱུས་བྱེད་བཞིན་པར་བློ་འཚབ་ཆེན་པོ་བསྟན་ཡོད། བསྒྲགས་གཏམ་ནང་དུ་བོད་མིའི་རང་དབང་སྒེར་ལངས་ཐེངས་ ༦༥ པའི་གལ་གནད་དང་འབྲེལ་ཏེ། འདས་པའི་མི་ལོ་བཅུ་ཕྲག་དྲུག་གི་རིང་བོད་མིའི་ཐོབ་ཐང་ལ་རྒྱ་ནག་གིས་བཙན་གནོན་ཚབས་ཆེན་བྱས་དང་བྱེད་མུས་ཡིན་པས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ངོས་ནས་བཙན་གནོན་དང་བརྙས་བཅོས་དེ་རིགས་མཚམས་འཇོག་བྱེད་དགོས་པའི་འབོད་སྐུལ་ཞུས་ཡོད། དེ་མ་ཟད་ཕུན་ཚོགས་སྟོབས་རྒྱལ་ལགས་ཀྱིས་རྒྱ་ནག་གཞུང་གི་སྟངས་འཛིན་འོག་བོད་ཕྲུག་ས་ཡ་གཅིག་ཙམ་མི་སེར་སྤེལ་ཡུལ་གཏན་སློབ་ཁག་ཏུ་བཙན་འཇུག་བྱེད་ཚུལ་དང་། བོད་མི་ཚོའི་སྐྱི་ལྤགས་བརྟག་དཔྱད་དང་། རིགས་རྫས་དཔེ་མཚོན་བསྡུ་རུབ་བྱས་ཏེ་བོད་མིར་བྱ་ར་སོ་ཉུལ་བྱེད་སྟངས། ད་དུང་འདི་ལོར་དགུང་གྲངས་སོ་ལྔ་ལ་སོན་རྒྱུའི་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གར་སོང་ཆ་མེད་དུ་གྱུར་པ་སོགས་ཀྱི་ཛ་དྲག་གནས་སྟངས་སྐོར་གསལ་བཤད་གནང་ཡོད།
དེ་མཚུངས་ཁོང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༥ པ་འགོ་མ་འཛུགས་པའི་ཉིན་བཞིའི་སྔོན་རྒྱ་ནག་གཞུང་གིས་བོད་ཁམས་སྡེ་དགེ་རུ་ཆུ་མཛོད་གསར་རྒྱག་གི་ལས་གཞི་ཞིག་སྤེལ་བར་བོད་མི་རྣམས་ནས་ངོ་རྒོལ་གནང་བར་རྒྱ་གཞུང་ནས་ཞི་བའི་ངོ་རྒོལ་བ་མང་དག་ཅིག་འཛིན་བཟུང་བྱས་ཡོད་པ་གསལ་སྟོན་གནང་། ཆུ་མཛོད་གསར་རྒྱག་གི་ལས་གཞི་དེ་ལ་བརྟེན་ནས་བོད་མིའི་གྲོང་གསེབ་གཉིས་གནས་སྤོ་བྱེད་རྒྱུ་དང་། དགོན་རྙིང་གཏོར་བཤིག གནའ་བོའི་ལྡེབས་རིས་རྣམས་རྩ་མེད་འགྲོ་རྒྱུའི་ཉེན་ཁ་ཡོད་པ་རེད།
དེ་དང་འབྲེལ་ཏེ་ཕུན་ཚོགས་སྟོབས་རྒྱལ་ལགས་ཀྱིས་རྒྱ་ནག་གིས་ཆ་རྐྱེན་གང་ཡང་མེད་པར་ངོ་རྒོལ་བྱེད་མཁན་གྱི་བོད་མི་ཚང་མ་གློད་བཀྲོལ་གཏོང་དགོས་པ་དང་། བོད་མཐོ་སྒང་གི་སྐྱེ་ཁམས་མ་ལག་ལ་ཚབས་ཆེའི་ཉེན་ཁ་བཟོ་མཁན་གྱི་ཆུ་མཛོད་ལས་འཆར་མཚམས་འཇོག་བྱེད་དགོས་པའི་འབོད་སྐུལ་ཞུས་པ་མ་ཟད། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་མགོན་པོ་སྐྱིད་ལྟ་བུ་བོད་མི་ཞི་བའི་ངོ་རྒོལ་བ་ཚོར་རྒྱ་ནག་གིས་རང་དགར་འཛིན་བཟུང་དང་། དྲག་སྤྱོད་མི་བྱེད་པའི་རེ་བ་བཏོན་ཏེ་ཁོ་ཚོའི་རང་དབང་གི་ཐོབ་ཐང་སྲུང་སྐྱོབ་བྱེད་དགོས་པའི་འབོད་སྐུལ་ཞུས་ཡོད་པ་བཅས།།
ཚོགས་ཐུན་གྱི་བརྙན་ཆ་ཚང་འདིར་གཟིགས།
