༄༅། །བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ སྲུང་བརྩི་དང་སྦྲགས་རྒྱ་རིགས་མཁས་དབང་དང་། ཤེས་ཡོན་ཅན་གྱི་སྡེ་ཁག་ནས་བོད་ལ་གདུང་སེམས་མཉམ་སྐྱེད་ཀྱིས་དྲ་ཐོག་རྒྱལ་སྤྱིའི་བགྲོ་གླེང་ཚོགས་འདུ་ཞིག་གོ་སྒྲིག་ཞུས་པ་དང་། ཆུ་ཚོད་ལྔ་རིང་གི་ཚོགས་འདུ་འདི་བཞིན་ཨ་རིའི་རྒྱལ་ས་ཝ་ཤིང་ཀྲོན་དུ་རྟེན་གཞི་བྱས་པའི་འོད་གསལ་གསར་ཁང་ (IPK Media）གིས་གཙོ་འགན་བཞེས་པ་དང་ལྷན་བྱང་ཨ་རི་སྐུ་ཚབ་དོན་གཅོད་ལས་ཁུངས་ཀྱིས་མཉམ་འབྲེལ་ཐོག་བསྐོང་ཚོགས་གནང་ནས། འཛམ་གླིང་ཤར་ནུབ་ཡུལ་གྲུ་འདྲ་མིན་དུ་བཞུགས་པའི་བོད་ཀྱི་གྲོགས་པོ་རྒྱ་རིགས་མཁས་དབང་དང་ལས་འགུལ་བ་གྲགས་ཅན་ ༣༠ ལྷག་དང་། བོད་མིའི་སྒྲིགས་འཛུགས་ཀྱི་རྒྱ་རིགས་འབྲེལ་མཐུད་པ་ལས་ཐོག་དང་ཟུར་པ་རྣམས་པ། དེ་བཞིན་དམིགས་བསལ་སྐུ་མགྲོན་དུ་བྱང་ཨ་རི་དོན་གཅོད་རྣམ་རྒྱལ་ཆོས་གྲུབ་ལགས་དང་། ཐའེ་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས། བོད་མི་མང་སྤྱི་མཐུས་ཆོས་གྲགས་རྒྱ་མཚོ་ལགས་སོགས་གདན་ཞུ་ལྟར་དྲ་ཐོག་བརྒྱུད་ཚོགས་ཐོག་ལ་མཉམ་ཞུགས་གནང་ཡོད་པ་རེད། ཚོགས་འདུའི་ཐོག་མར་འོད་གསལ་གསར་ཁང་གི་འགན་འཛིན་དང་ཚོགས་འདུ་གོ་སྒྲིག་གནང་མཁན་སྐུ་མཁྱེན་མ་ཝང་རོས་ཆིན་ལགས་ཀྱིས་རྒྱ་རིགས་ཚོས་བོད་ཀྱི་གནད་དོན་ལ་དོ་སྣང་བྱེད་གལ་དང་། དམིགས་གསལ་ལོ་ངོ་ ༦༥ འཁོར་བའི་དུས་དྲན་ལ་བོད་དོན་ཆེད་ཚོགས་འཛོམས་འདི་ལྟར་ཞིག་བསྐོང་ནས་རྒྱ་ནག་དམར་ཤོག་གཞུང་གིས་བོད་ནང་མུ་མཐུད་དྲག་པོའི་གཏོར་བཤིག་གཏོང་བཞིན་པ་འཐེར་བཏོན་བྱེད་དགོས་པ་གལ་ཆེན་ཡིན་པ་གསུངས།

བྱང་ཨ་རིའི་རྒྱ་རིགས་འབྲེལ་མཐུད་པ་དང་ཚོགས་འདུ་གོ་སྒྲིག་གནང་མཁན་ཚུལ་ཁྲིམས་རྒྱ་མཚོ་ལགས་ནས་སྐུ་མཁྱེན་མ་ཝང་རོས་ཆིན་ལགས་ནི་དེ་སྔ་རྒྱ་ནག་དམར་ཤོག་གཞུང་གི་གྲོས་ཚོགས་འཐུས་མི་བྱས་མྱོང་བ་དང་། ལྷག་པོར་བོད་ནང་གི་བོད་མི་དང་འབྲེལ་བ་བྱུང་ཡོད་པ་མ་ཟད། ད་ཆ་བཙན་བྱོལ་དུ་བོད་དོན་ལ་རྒྱབ་སྐྱོར་ཧ་ཅང་ཆེན་པོ་གནང་ནས་ཚོགས་འདུ་འདི་ལྟར་བསྐོང་ཚོགས་གནང་བ་འདིས་དམིགས་གསལ་གྱི་མཚོན་དོན་ཞིག་ཡིན་པ་དང་། ཚོགས་འདུ་འདིས་རྒྱ་རིགས་མི་མང་གིས་མ་བསྐུལ་དང་བླངས་ཀྱིས་བོད་མིའི་འཐབ་རྩོད་ལ་རྒྱབ་སྐྱོར་གྱི་ངོ་བོ་མཚོན་ཐུབ་ལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རྒྱ་བོད་འབྲེལ་ལམ་གྱི་དགོངས་གཞི་བོད་རྒྱ་གཉིས་ནས་ལག་བསྟར་བྱེད་བཞིན་པ། དེ་བཞིན་ཁམས་སྡེ་དགེ་ཁུལ་དུ་བྱུང་བའི་གནས་ཚུལ་དང་འབྲེལ་རྒྱ་རིགས་གྲོགས་པོ་ཚོས་རྒྱབ་སྐྱོར་ཀྱི་འབོད་སྒྲ་གལ་ཆེན་ཡིན་པ་གསུངས།ཚོགས་འདུའི་ཐོག་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས་རྒྱ་རིགས་འབྲེལ་མཐུད་ཀྱི་ལས་དོན་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མིའི་སྒྲིག་འཛུགས་དང་དོན་གཅོད་ལས་ཁུངས་ཀྱི་གལ་ཆེའི་ལས་དོན་ཡིན་པ་འགྲེལ་བརྗོད་གནང་།  ཁོང་གིས་ད་ཐེངས་རྒྱ་རིགས་གྲོགས་པོ་རྣམས་ནས་གསུམ་བཅུའི་དུས་དྲན་ཐེངས་ ༦༥ པའི་ཐོག་དྲ་ཐོག་འདུ་འཛོམས་འདི་ལྟར་གནང་བ་ལ་བསྔགས་བརྗོད་དང་སྦྲགས་མུ་མཐུད་བོད་རྒྱའི་དབར་འབྲེལ་མཐུད་བྱེད་གལ། ལྷག་པར་བོད་རྒྱའི་གཞོན་སྐྱེས་དབར་གྱི་འབྲེལ་མཐུད་སྔར་ལྷག་གོ་སྒྲིག་ཐུབ་པའི་རེ་བ་ཞུས་། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས་ཚོགས་འདུ་ཐོག་ཕེབས་ནས་རྒྱ་རིགས་གྲོགས་པོ་ཚོས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ལྷན། རྒྱལ་སྤྱིའི་བོད་དོན་ལས་འགུལ་ཁང་དེ་ཉིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོས་ཚོགས་སུ་ཞི་བའི་དོན་ཚན་ལྔའི་གྲོས་ཆར་ཕུལ་བའི་རྗེས་ཨ་རིར་གསར་འཛུགས་གནང་ནས་ཨ་རིའི་གཞུང་ལ་ཞུ་གཏུགས་ཀྱི་ལམ་ནས་བོད་དོན་ཐོག་ཁྲིམས་འཆར་གཏན་འབེབས་ཡོང་སླད་ལས་དོན་ཚགས་ཚུད་བྱུང་བཞིན་པའི་སྐོར་གསུངས།

ཐེའི་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ནས་ས་གནས་སུ་གསུམ་བཅུའི་དུས་དྲན་སྲུང་བརྩི་ཞུས་པའི་སྐོར་དང་། གསུམ་བཅུའི་དུས་དྲན་སྲུང་བརྩི་ཞུས་དགོས་པའི་གལ་ཆེའི་རང་བཞིན། དེ་བཞིན་རྒྱ་ནག་གཞུང་གིས་བཏོན་པའི་དེབ་དཀར་པོའི་ཐོག་འཐེར་འདོོན་གནང་བ་མ་ཟད། ཨ་རིའི་ནང་ཁྲིམས་འཆར་གཏན་འབེབས་བྱུང་ནས་བོད་དོན་ལས་འགུལ་ཧ་ཅང་ཚགས་ཚུད་བྱུང་བཞིན་པ་དེ་བཞིན་རྒྱལ་ཁབ་གཞན་ནང་འདི་ལྟར་ལས་དོན་སྤེལ་ཕྱོགས་སོགས་དང་འབྲེལ་གསུང་བཤད་གནང་སོང་། ཨོ་གླིང་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ནས་བོད་ཀྱི་རང་དབང་འཐབ་རྩོད་མུ་མཐུད་གནས་བཞིན་པ་དང་། ལོ་ངོ་དྲུག་བཅུ་རེ་ལྔའི་ནང་མི་རབས་ནས་མི་རབས་བརྒལ་ནས་བོད་དོན་གསོན་པོར་གནས་ཡོད་པ་གསལ་སྟོན་གནང་ནས་རྒྱ་རིགས་རྣམས་ཀྱི་རྒྱབ་སྐྱོར་དང་མཉམ་ལས་གནང་རྒྱུ་གལ་ཆེན་ཡིན་པ་གསུང་། དེ་བཞིན་རྒྱ་རིགས་འབྲེལ་མཐུད་པ་ཟུར་པ་ཟླ་སྒྲོན་ལགས་ནས་བོད་ཀྱི་འཐབ་རྩོད་ཀྱི་ཐད་ལ་བོད་ནང་གི་གནས་བབ་མཁྱེན་དགོས་གལ་དང་སྦྲགས་བོད་ནང་དུ་དཀའ་ངལ་མུ་མཐུད་འཕྲད་བཞིན་པ་རྣམས་ལ་འགྲེལ་བརྗོད་གནང་ནས་རྒྱ་རིགས་གྲོགས་པོ་ཚོའི་རྒྱབ་སྐྱོར་སྔར་ལྟར་གནང་རྒྱུའི་འབོད་སྐུལ་ཞུས་སོང་།

རྒྱ་རིགས་འབྲེལ་མཐུད་པ་ཟུར་པ་བློ་བཟང་ཉི་མ་ལགས་ནས་རྒྱ་བོད་ལོ་རྒྱུས་ཀྱི་གནས་བབ་དང་རྒྱ་ནག་གཞུང་གིས་བོད་ཐོག་བཟུང་བའི་སྲིད་བྱུས་དང་རྩིས་ནོར་འགྲེལ་བརྗོད་གནང་ནས་གལ་སྲིད་རྒྱ་ནག་གཞུང་གིས་བོད་དོན་དཀའ་རྙོག་སེལ་བའི་གོ་སྐབས་དམ་འཛིན་མ་ཐུབ་ན་ནམ་ཞིག་དཀའ་ངལ་སེལ་ཐབས་བྲལ་བའི་གནས་སྟངས་སུ་འགྱུར་ཉེན་ཆེ་བ་གསུང་གནང་སོང་། བོད་མི་མང་སྤྱི་འཐུས་ཆོས་གྲགས་རྒྱ་མཚོ་ལགས་ནས་ཚོགས་འདུར་མཉམ་ཞུགས་གནང་སྟེ་རྒྱ་རིགས་གྲོགས་པོ་ཚོས་བོད་མིར་གདུང་སེམས་མཉམ་སྐྱེད་ཀྱི་ཚོགས་འདུ་འདི་ལྟ་བུ་བསྐོང་ཚོགས་གནང་བར་བསྔགས་བརྗོད་གནང་བ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ལམ་སྟོན་མཛད་པའི་དབུ་མའི་ལམ་གྱི་ཐབས་བྱུས་ནི་བོད་རྒྱ་གཉིས་ཀར་ཁེ་ཕན་ལྡན་ལ་རྒྱལ་སྤྱིའི་དཀའ་ངལ་སེལ་ཐབས་ལ་ཁྱད་པར་ལྡན་པའི་ཐབས་བྱུས་ཡིན་པ་གསུང་།ཚོགས་འདུའི་ཐོག་རྒྱ་རིགས་མཁས་དབང་དང་ལས་འགུལ་བ་གྲགས་ཅན་སོགས་རྒྱ་རིགས་ཤེས་ལྡན་པ་སུམ་བཅུ་འགལ་བ་ཕེབས་ནས་བོད་དོན་ཐོག་ལ་གདུང་སེམས་མཉམ་སྐྱེས་ཀྱི་གསུང་བཤད་དང་ཁོང་རྣམས་པས་བོད་ཐད་ཞིབ་འཇུག་གནང་བའི་སྒྲུབ་དོན་སོགས་ཚོགས་ཐོག་ལ་གཏམ་བཤད་གནང་སོང་། དེ་ཡང་རྩོམ་པ་པོ་གྲགས་ཅན་སྐུ་ཞབས་ཧུ་ཕིང་ལགས་ནས་བོད་རྒྱུད་ནང་བསྟན་ཀྲུང་གོ་ཅན་དུ་འགྱུར་བ་ཟེར་བའི་སྲིད་ཇུས་ལ་ཁོང་གིས་དཔྱད་གླེང་གནང་བར། གལ་སྲིད་རྒྱ་ནག་གཞུང་གིས་བོད་རྒྱུད་ནང་བསྟན་ནི་རྒྱ་ནག་ཅན་དུ་འགྱུར་དགོས་པ་བཤད་བཞིན་ཡོད་ན། འདིས་བོད་རྒྱུད་ནང་བསྟན་ནི་རྒྱ་ནག་གི་རིག་གཞུང་གི་ཆ་ཤས་མིན་པ་དང་། མཚོན་དོན་དུ་བོད་མི་རྒྱ་མི་མིན་པ། བོད་རྒྱ་ནག་གི་ཆ་ཤས་མིན་པ་བསྒྲུབ་བཞིན་ཡོད་པ་གསུང་། ཁོང་གིས་ད་ལྟའི་ཀྲུང་གོ་ཅན་དུ་འགྱུར་བ་ཟེར་བའི་སྲིད་ཇུས་ཀྱི་བཤད་སྟངས་དེ་མདོར་བསྡུས་ནི་བཤད་ན། བཙན་འོག་ཅན་དུ་འགྱུར་བ། དམར་ཤོག་ཅན་དུ་འགྱུར་བ། ཞི་ཅིན་ཕིང་ཅན་དུ་འགྱུར་བ་ཡིན་པ་ལས་ཧན་རྒྱ་རིགས་ཅན་དུ་འགྱུར་བ་ཡང་ཏག་ཏག་མིན་པ་གསུང་། འགྲོ་བ་མིའི་ཐོབ་ཐང་འཐབ་རྩོད་པ་གྲགས་ཅན་སྐུ་ཞབས་ཁྲེན་ཀོང་ཁྲིང་གིས་བོད་པ་རྣམས་ནས་ལོ་ངོ་དྲུག་ཅུ་རེ་ལྔ་ལྷག་ལ་འཐབ་རྩོད་གནང་བར་རྗེས་སུ་ཡིད་རངས་དང་། མི་མང་གི་འཐབ་རྩོད་ནི་ཁྲིམས་དང་མཐུན་པ་ཡིན་ལ་བཟང་སྤྱོད་དང་མཐུན་པ་གསུང་། ཁོང་ནས་ད་དུང་བོད་མིའི་བྱམས་དང་སྙིང་རྗེའི་གོམ་སྲོལ་བཟང་པོ་ནི་འཛམ་གླིང་ལ་ཕན་ཐོག་ལྡན་པའི་ཁྱད་ཆོས་ཅན་ཡིན་པ་སོགས་གསུང་། དེ་བཞིན་ཨོ་གླིང་དུ་བཞུགས་པའི་རྒྱ་རིགས་མཁས་དབང་སྐུ་ཞབས་ཧྥང་ཁྲུང་ཡིས་ལགས་ནས་རྒྱ་རིགས་ཞིག་ཡིན་པའི་ངོས་ནས་བོད་མི་རྣམས་ལ་དགོངས་དག་ཞུས་གནང་བ་དང་། ཁོང་གིས་ཁོང་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མགོ་སུམ་གུས་པས་རྗེས་འཇུག་ཞུ་མཁན་ཡིན་པ་དང་བོད་ཀྱི་རང་དབང་འཐབ་རྩོད་ཀྱི་ཆིག་སྒྲིལ། མང་གཙོའི་ལམ་ལུགས། བོད་བརྒྱུད་ནང་བསྟན་རྒྱ་ནག་ནང་རྗེས་འཇུག་ཇེ་མང་དུ་འགྲོ་བཞིན་པ་མ་ཟད། ཤུགས་རྐྱེན་ཇེ་ཆེར་འགྲོ་བཞིན་པ་བཅས་ལ་ཡིད་སྨོན་དང་རྒྱ་རིགས་ཀྱི་སྤྱི་ཚོགས་ནས་འདི་དག་སློབ་སྦྱོང་བྱེད་དགོས་པ་གསུང་གནང་སོང་། དེ་བཞིན་རྒྱ་རིགས་ལས་འགུལ་བ་གྲགས་ཅན་སྐུ་ཞབས་ཐེང་པོཡོ་ལགས་དང་། སྐུ་མཁྱེན་མ་ཧྲེང་ཞོ་ལགས། སྐུ་ཞབས་ལའི་ཅན་ཕིང་ལགས།  སྐུ་ཞབས་ཁྲིན་ཁྲོང་ཁྲོང་ལགས། ཡུད་གུར་ལས་འགུལ་བ་གྲགས་ཅན་སྐུ་ཞབས་ཨི་ལེ་ཤཋ་ལགས། སོག་པོའི་ལས་འགུལ་བ་གྲགས་ཅན་སྐུ་ཞབས་ཞི་ཧེའི་མིང་ལགས་སོགས་མཉམ་ཞུགས་དང་གཏམ་བཤད་གནང་སྟེ་བོད་ཀྱི་དཀའ་རྙོག་མགྱོགས་མྱུར་སེལ་བའི་སྨོན་འདུན་དང་བཅས་ཚོགས་འདུ་རྒྱལ་ཁའི་ངང་ལེགས་གྲུབ་བྱུང་བ་དང་བཅས། །