༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༢༠ ཉིན་རྒྱ་ནག་གི་ཕྱི་སྲིད་བློན་ཆེན་ཝང་ཡི་ཨོསྟྲེ་ལི་ཡཱའི་རྒྱལ་ས་ཀེན་བྷེ་ར་རུ་གཞུང་འབྲེལ་ཕྱོགས་བསྐྱོད་དུ་སླེབས་པའི་ཉིན་བོད་མི་དང་། བོད་དོན་རྒྱབ་སྐྱོར་བ། ཡུ་གུར་བ། ཧོང་ཀོང་བ། རྩ་རླུང་སྒོམ་སྒྲུབ་ལས་འགུལ་བ་སོགས་མི་མང་སྟོང་ཕྲག་ལྷག་གིས་ངོ་རྒོལ་སྐད་འབོད་གནང་ཡོད།
སྐབས་དེར་ལས་འགུལ་བ་རྣམས་ནས་བོད་ཀྱི་རྒྱལ་དར་དང་། བོད་དོན་དང་འབྲེལ་བའི་འབོད་ཚིག་ཕྱེད་དར་སོགས་ཁྱེར་ཏེ་ངོ་རྒོལ་དང་སྦྲགས། ཨོསྟྲེ་ལི་ཡཱའི་ཕྱི་སྲིད་བློན་ཆེན་པེ་ནི་ཝོང་མཆོག་ནས་རྒྱ་ནག་གི་ཕྱི་སྲིད་བློན་ཆེན་ལྷན་དུ་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་གླེང་སློང་གནང་དགོས་པའི་འབོད་སྐུལ་ཞུས་ཡོད། ངོ་རྒོལ་འདུ་འཛོམས་ཐོག་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་དང་ལྗང་ཁུ་ཚོགས་པའི་གྲོས་ཚོགས་འཐུས་མི་ཇེ་ནེཊ་ར་ཧི་སི་ལགས་ཀྱིས་གསུང་བཤད་གནང་ཡོད་པ་དང་། ཁོང་གིས་ཨོསྟྲེ་ལི་ཡཱའི་ཕྱི་སྲིད་བློན་ཆེན་དང་འབྲེལ་ཡོད་དཔོན་རིགས་རྣམས་ནས་རྒྱ་ནག་གཞུང་གི་ཕྱི་སྲིད་བློན་ཆེན་ལྷན་དུ་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཛ་དྲག་གནས་སྟངས་སྐོར་གླེང་མོལ་གནང་དགོས་པའི་འབོད་སྐུལ་ཞུས་ཡོད།
དེ་ཡང་ཁོང་གིས། ངས་པེ་ནི་ཝོང་དང་སའི་མོན་བྷིར་མིང་གྷམ་གཉིས་ལ་ཞུ་རྒྱུར། རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་དང་བོད་དོན་གཉིས་ནི་ཆེས་གལ་ཆེན་ཞིག་ཏུ་འཛིན་དགོས་པ་དེ་ཡིན། བོད་མི་རྣམས་ལ་གཉའ་གནོན་དང་སྡུག་སྦྱོང་མནར་གཅོད་གཏོང་བཞིན་པ་དང་། ཆོས་དད་རང་དབང་མེད་པ། ས་ཆ་རྣམས་འཕྲོག་བཞིན་པ། ཕྲུ་གུ་རྣམས་རྒྱ་ནག་གིས་འཛིན་སྐྱོང་བྱེད་པའི་མི་སེར་སྤེལ་ཡུལ་གཏན་སློབ་ཁག་ཏུ་གཏོང་བཞིན་པའི་དུས་སྐབས་འདིར། ང་ཚོས་རྒྱ་ནག་གི་ལྷན་དུ་རྒྱུན་ལྡན་གྱི་འབྲེལ་བ་ཞིག་འཛུགས་མི་ཐུབ་ཅེས་སོགས་གསུངས་ཡོད།
རང་དབང་ཅན་གྱི་གྲོས་ཚོགས་འཐུས་མི་ལི་ཌི་ཡ་ཐོར་ཕི་ཡིས་རང་ཉིད་ས་གནས་ཀྱི་ས་སྐྱེས་རྡོ་སྐྱེས་ཀྱི་བུད་མེད་ཅིག་ཡིན་པའི་ཆ་ནས་བོད་མིར་གདུང་སེམས་མཉམ་སྐྱེ་གནང་བ་མ་ཟད། ཁོ་མོས་ད་དུང་ཨོསྟྲེ་ལི་ཡཱའི་སྲིད་གཞུང་གིས་འགྲོ་བ་མིའི་ཐོབ་ཐང་གི་གནད་དོན་ལ་གཡོལ་ཐབས་བྱེད་པ་ལ་སྐྱོན་བརྗོད་བྱས་ནས་བོད་ཀྱི་རྩ་དོན་ལ་གཡོ་བ་མེད་པའི་རྒྱབ་སྐྱོར་ཡོད་སྐོར་གསུངས།
གཞན་ཡང་གྲོས་ཚོགས་འཐུས་མི་ཌིན་སི་མེ་ཐི་ལགས་དང་། གྲོས་ཚོགས་འཐུས་མི་ཇོར་ཌོན་སི་ཊིལ་ཇོན་ལགས། གྲོས་ཚོགས་འཐུས་མི་ཨེན་ཌི་རུ་ཝ་ལེ་སི་ལགས། གྲོས་ཚོགས་འཐུས་མི་ཌེ་ཝིཌ་གྷིལ་སི་ཕི་ལགས་ནས་བོད་མི་དང་དམར་ཤོག་ཚོགས་པའི་གནོད་འཚེ་ཕོག་ཡུལ་ཚོར་རྒྱབ་སྐྱོར་དང་གདུང་སེམས་མཉམ་སྐྱེ་མཚོན་ཆེད་ངོ་རྒོལ་སྐད་འབོད་དུ་ཕེབས་ཞུགས་གནང་ཡོད་པ་རེད།
ཨོསྟྲེ་ལི་ཡཱའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཀྱིས་ཉེ་ཆར་རྒྱ་ནག་གཞུང་གིས་བོད་ཁམས་སྡེ་དགེར་བོད་མི་ཞི་རྒོལ་བྱེད་མཁན་རྣམས་ལ་དྲག་གནོན་བྱས་པའི་སྐོར་ལ་གསལ་བཤད་བྱས་ཏེ། རྒྱ་ནག་གཞུང་ལ་བོད་མི་ཞི་བའི་ངོ་རྒོལ་ཁྲོམ་སྐོར་བྱེད་མཁན་རྣམས་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་ཞུས་ཡོད། དུས་ཚིགས་དེ་དང་སྟབས་བསྟུན་ཨོསྟྲེ་ལི་ཡཱའི་བོད་རིགས་སྤྱི་མཐུན་ཚོགས་པའི་ཚོགས་གཙོ་རྔ་བ་ཆོས་འཛིན་ལགས་དང་། ཨོསྟྲེ་ལི་ཡཱའི་བོད་དོན་ལྷན་ཚོགས་ཀྱི་འགན་འཛིན་ཛོ་ཨི་བྷེ་ཌི་ཧྥོར་ཌོན་ལགས་གཉིས་ཀྱིས་བསྒྲགས་གཏམ་ཞིག་སྤེལ་བའི་ནང་། བོད་ནི་རང་དབང་ཆེས་ཞན་པའི་རྒྱལ་ཁབ་ཀྱི་གྲས་སུ་རྒྱུན་དུ་ཚུད་ཡོད་ཀྱང་། ཨོསྟྲེེ་ལི་ཡཱའི་གཞུང་གིས་རྒྱ་ནག་ལ་འགྲོ་བ་མིའི་ཐོབ་ཐང་རྡོག་རོལ་གཏོང་བའི་ཉེས་ཆད་གཅད་རྒྱུའི་ཚབ་ཏུ་ཚོང་འབྲེལ་གྱི་བྱ་དགའ་སྤྲོད་ཀྱི་ཡོད་པ་ནི་བློ་ཕམ་དགོས་པ་ཞིག་རེད་ཅེས་གསུངས་འདུག
གཞན་ཡང་བོད་མིའི་ལས་འགུལ་བ་ཚོས་ཀེན་བྷེ་ར་རུ་ཡོད་པའི་རྒྱ་ནག་གི་གཞུང་ཚབ་ཁང་གི་ཕྱི་ལོགས་སུ་ངོ་རྒོལ་ཁྲོམ་སྐོར་བྱས་ཏེ། བོད་ཀྱི་འཐབ་རྩོད་ནི་གསོན་ཤུགས་ཀྱིས་ཁེངས་ཡོད་པ་དང་། ཇི་སྲིད་བོད་ལ་རང་དབང་མ་ཐོབ་པ་དེ་སྲིད་དུ་མུ་མཐུད་གནས་རྒྱུ་ཡིན་པའི་བརྡ་ལན་བསྐུར་ཡོད།
ཨོསྟྲེ་ལི་ཡཱའི་ཕྱི་སྲིད་བློན་ཆེན་པེ་ནི་ཝོང་མཆོག་གིས་ཚོགས་འདུའི་རྗེས་ཀྱི་གསར་འགོད་ལྷན་ཚོགས་ཤིག་སྤེལ་བའི་སྐབས། ངས་ཤར་ཏུར་ཀི་སི་ཐན་དང་། བོད། ཧོང་ཀོང་ཐེ་བའི་འགྲོ་བ་མིའི་ཐོབ་ཐང་གི་སྐོར་ལ་ཨོསྟྲེ་ལི་ཡཱས་བློ་འཚབ་བྱེད་ཀྱི་ཡོད་ཅེས་གླེང་སློང་བྱས་པ་ཡིན་ཞེས་གསུངས།
རྒྱ་ནག་ཕྱི་སྲིད་བློན་ཆེན་ཝང་ཡི་ཕྱོགས་བསྐྱོད་འདི་ནི། རྒྱ་ནག་གི་འགོ་ཁྲིད་མཐོ་ཤོས་ཤིག་ཕྱི་ལོ ༢༠༡༧ ལོ་ནས་བཟུང་ཨོསྟྲེ་ལི་ཡཱར་ཕྱོགས་བསྐྱོད་དུ་ཡོང་བ་ཐེངས་དང་པོ་ཡིན་པ་དང་། དེས་ཕྱི་འབྲེལ་གྱི་འབྲེལ་ལམ་ཇེ་འཇམ་དུ་འགྲོ་བའི་རྟགས་མཚན་ཞིག་སྟོན་གྱི་ཡོད་པ་བཅས།། 
