༄༅། །གཟའ་འཁོར་འདིའི་ནང་རྒྱ་ནག་གི་ཕྱི་སྲིད་བློན་ཆེན་ཝང་ཡི་ཨོསྟྲེ་ལི་ཡཱར་གཞུང་འབྲེལ་ཕྱོགས་བསྐྱོད་དུ་ཡོང་གི་པར་བརྟེན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཨོསྟྲེ་ལི་ཡཱའི་ཕྱི་སྲིད་བློན་ཆེན་པེ་ནི་ཝོང་ལགས་སུ་ཕྱག་བྲིས་ཤིག་ཕུལ་ཏེ། ཚོགས་འདུའི་ཐོག་བོད་ནང་གི་ཛ་དྲག་གནས་སྟངས་སྐོར་གྲོས་མོལ་གནང་སྐྱོང་ཡོང་བའི་རེ་སྐུལ་ཞུས་ཡོད།
དེ་ཡང་བོད་ནང་རྒྱ་ནག་གཞུང་གིས་དྲག་གནོན་འོག་བོད་མི་རྣམས་ཀྱི་གཞི་རྩའི་རང་དབང་རྡོག་རོལ་ཚབས་ཆེ་གཏོང་བཞིན་པའི་སྐབས་འདིར་སྐུ་ཚབ་དོན་གཅོད་ཀརྨ་སེངྒེ་ལགས་ནས་ཨོསྟྲེ་ལི་ཡཱའི་ཕྱི་སྲིད་བློན་ཆེན་མཆོག་ལ་ཞུ་ཡིག་ཕུལ་བའི་ནང་། ཐེངས་འདིར་རྒྱ་ནག་གི་ཕྱི་སྲིད་བློན་ཆེན་ཨོསྟྲེ་ལི་ཡཱར་ཡོང་གི་ཡོད་པས་བོད་ནང་གི་ཛ་དྲག་གནས་སྟངས་སྐོར་གླེང་སློང་བྱ་རྒྱུའི་གོ་སྐབས་བཟང་པོ་ཞིག་ཡིན་པ་གསལ་སྟོན་དང་སྦྲགས། བོད་ནང་དུ་རྒྱ་ནག་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་བཙན་གྱིས་ཆབ་སྲིད་སློབ་གསོ་སྤྲོད་ཀྱི་ཡོད་སྐོར་དང་། བོད་མིའི་ཆོས་དད་རང་དབང་ལ་དམ་བསྒྲགས། བོད་མི་རྣམས་ཉེས་མེད་འཛིན་བཟུང་། ཉེ་ལམ་ཁམས་དགེ་སྡེ་ཁུལ་དུ་བོད་མི་ཞི་རྒོལ་བ་རྣམས་ལ་དྲག་གནོན་བྱེད་པ་སོགས་བོད་ནང་གི་ཛ་དྲག་གནས་སྟངས་གསལ་བཤད་དང་། དེ་བཞིན་ཨོསྟྲེ་ལི་ཡཱ་གཞུང་གིས་རྒྱ་ནག་དང་ལྷན་དུ་ཚོང་འབྲེལ་བྱེད་སྐབས་འགྲོ་བ་མིའི་ཐོབ་ཐང་གི་གནས་བབ་དེ་ཚོང་འབྲེལ་ལས་གལ་ཆེ་བ་བརྩི་གནང་ཡོང་བའི་རེ་འབོད་ཞུས་ཡོད།
དེ་དང་འབྲེལ་ཏེ་སྐུ་ཚབ་དོན་གཅོད་ནས་ཨོསྟྲེ་ལི་ཡཱའི་གཞུང་ངོས་ནས་ཕྱི་འབྲེལ་ཐབས་བྱུས་སྤྱད་དེ་བོད་ནང་གི་ཛ་དྲག་གནས་སྟངས་སེལ་ཐབས་གནང་དགོས་པའི་འབོད་སྐུལ་གནང་ཡོད། ཞུ་ཡིག་ནང་གསལ་དོན་ཚན་ཁག་ནི།
༡) བོད་ནང་ཆོས་དང་རིག་གཞུང་། ཁོར་ཡུག་གཏོར་བཤིག་གཏོང་བཞིན་པ་ཐེ་བའི་འགྲོ་བ་མིའི་ཐོབ་ཐང་གི་གནས་བབ་སྐོར་གླེང་སློང་གནང་རྒྱུ།
༢) རྒྱ་ནག་གཞུང་ནས་ཁམས་སྡེ་དགེའི་ཞི་རྒོལ་བ་བཙོན་འཇུག་བྱས་པ་རྣམས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་གློད་བཀྲོལ་དང་། ཁོང་ཚོར་དུས་ཐོག་སྨན་བཅོས་མཐུན་རྐྱེན་སྦྱོར་རྒྱུར་རྒྱ་ནག་གཞུང་ལ་འབོད་སྐུལ་གནང་རྒྱུ།
༣) རྒྱ་ནག་གཞུང་ལ་བོད་ནང་རྒྱལ་སྤྱིའི་ལྟ་ཞིབ་དང་། གསར་འགོད་པ་སོགས་བསྐྱོད་རྒྱུར་དམ་བསྒྲགས་བྱེད་མཚམས་འཇོག་རྒྱུར་སྐུལ་དེད་གཏང་རྒྱུ།
༤) རྒྱ་ནག་གཞུང་ལ་བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་གྲོས་མོལ་སླར་གསོ་ཡོང་ཐབས་སྐུལ་དེད་གཏང་རྒྱུ་བཅས་ཡིན་པ་བཅས།།
