༄༅། །ད་ལྟ་འཚོག་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༥ པའི་སྐབས་ཡུ་རོབ་མཐུན་ཚོགས་ངོས་ནས་བོད་ནང་གི་འགྲོ་བ་མིའི་ཐོབ་ཐང་གནས་བབ་ལ་ཐུགས་འཚབ་དང་སྦྲགས། བོད་མི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་གནང་ཡོད་པ་རེད།
དེ་ཡང་སྐབས་དེར་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་གི་དྲག་གནོན་འོག་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྤྱི་དང་། ཡང་སྒོས་བོད་ནང་མི་སེར་སྤེལ་ཡུལ་གཏན་འཇགས་སློབ་གྲྭ་བརྒྱུད་བོད་ཕྲུག་རྣམས་ཀྱི་ལྟ་བ་བརྗེ་སྒྱུར་དང་། བོད་མིའི་རིགས་རྫས་དཔེ་མཚོན་བསྡུ་རུབ་བྱེད་བཞིན་པ་སོགས་ལ་ཐུགས་འཚབ་བསྟན་པ་མ་ཟད། རྒྱ་ནག་གཞུང་གིས་རྒྱལ་མཚམས་ལས་བརྒལ་ཏེ་འགྲོ་བ་མིའི་ཐོབ་ཐང་སྲུང་སྐྱོབ་པ་དང་། ཁྲིམས་རྩོད་པ། གསར་འགོད་པ། ཆེད་མཁས་པ་སོགས་ལ་དྲག་གནོན་བྱེད་བཞིན་པ་གསལ་སྟོན་གནང་ཐོག ཁྲིམས་འགལ་འཛིན་བཟུང་དང་། བཙན་གནོན། བཙན་པོས་གར་སོང་ཆ་མེད་དུ་གཏོང་བ། མི་སེར་ལ་བྱ་ར་སོ་ཉུལ་བྱེད་པ་སོགས་ལ་སྐྱོན་བརྗོད་གནང་ཡོད།
གཞན་ཡང་བསྒྲགས་གཏམ་ནང་དུ་ཡུ་རོབ་མཐུན་ཚོགས་ནས་རྒྱ་ནག་གཞུང་ངོས་ནས་རྒྱལ་སྤྱིའི་ཁྲིམས་སྒྲིག་ཁག་ལ་བརྩི་སྲུང་གིས་བོད་མི་ཐེ་བའི་མི་སེར་ཚང་མའི་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་སྐུལ་དེད་དང་སྦྲགས། རྒྱ་གཞུང་ནས་ཁྲིམས་ཀྱི་དབང་སྒྱུར་འོག་ཤར་སྐྱོད་དང་། རྒྱལ་མཚམས་ལས་བརྒལ་བའི་དྲག་གནོན་མཚམས་འཇོག་དགོས་པའི་འབོད་སྐུལ་གནང་ཡོད་པ་རེད། དེ་དང་འབྲེལ་ཏེ་ཡུ་རོབ་མཐུན་ཚོགས་ངོས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་བྱ་ར་མུ་མཐུད་བྱ་རྒྱུའི་ནན་བརྗོད་གནང་བ་དང་ཆབས་ཅིག བོད་མི་ཆབ་སྲིད་བཙོན་པ་བྱ་བྲལ་རིན་པོ་ཆེ་དང་། ཨ་ཉག་སེང་སྒྲ སྒོ་ཤེས་རབ་རྒྱ་མཚོ། མགོ་ལོག་དཔལ་ལྡན། བཀྲ་ཤིས་རྡོ་རྗེ། ཟངས་དཀར་འཇམ་དབྱངས། སེམས་སྐྱིད་སྒྲོལ་མ་སོགས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་བཙོན་གྲོལ་གཏོང་དགོས་པའི་འབོད་སྐུལ་གནང་ཡོད།
བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཐོག་ཡུ་རོབ་མཐུན་ཚོགས་ངོས་ནས་བསྒྲགས་གཏམ་སྤེལ་བར་བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་དགའ་བསུ་དང་འབྲེལ་ཡུ་རོབ་མཐུན་ཚོགས་ངོས་ནས་བྱ་བྲལ་རིན་པོ་ཆེ་གཙོས་པའི་མགོ་ལོག་དཔལ་ལྡན་དང་། སེམས་སྐྱིད་སྒྲོལ་མ། ཟངས་དཀར་འཇམ་དབྱངས་ཀྱི་མཚན་སྨོས་ཏེ་ཁོང་རྣམས་འཕྲལ་དུ་གློད་བཀྲོལ་དགོས་པའི་འབོད་སྐུལ་གནང་བར་ཐུགས་རྗེ་ཆེ་ཞུས་ཡོད་པ་བཅས།།
