༄༅། །འཇར་མ་ནི་ནང་ལོ་ལྟར་གསུམ་བཅུ་དུས་དྲན་སྲུང་བརྩི་ཞུ་སྲོལ་ཡོད་ནའང་འདི་ལོ་གསུམ་བཅུ་དུས་དྲན་ཐེངས་ ༦༥ པ་བྷར་ལིན་རྒྱལ་ས་རུ་འཇར་མ་ནི་བོད་དང་མཉམ་དུ་ཡོད་ཅེས་པའི་བརྫོད་གཞི་འོག་གཞི་རྒྱ་ཆེ་བའི་ལས་འགུལ་འཇར་མ་ནི་གནས་སྡོད་བོད་མི་ཡོངས་རྫོགས་མཉམ་འཛོམས་ཐོག་དུས་དྲན་སྲུང་བརྩི་ཞུས་ཡོད།

ད་ལན་གྱི་ལས་འགུལ་དེ་བཞིན་འཇར་མ་ནི་གནས་འཁོད་བོད་རིགས་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། འཇར་མན་བོད་དོན་རྒྱབ་སྐྱོར་ཚོགས་པ་ (Tibet Initiative Deutschland (TID) ཚོགས་པ་གསུམ་པོ་ཐུན་མོང་ནས་འགོ་ཁྲིད་ཞུས་ཡོད། མཛད་སྒོ་ཐོག་མར་སྐུ་མགྲོན་གཙོ་བོ་འཇར་མ་ནི་གྲོས་ཚོགས་འཐུས་མི་སྐུ་ཞབས་མེ་ཀལ་བྷ་རན་ཌི་(Michael Brand) མཆོག་ཕེབས་གཏན་ཁེལ་ཡོད་ཀྱང་མཐར་ཁོ་པ་བཞུགས་སྒར་དུ་ཕེབས་ཏེ་མཛད་སྒོ་མཉམ་ཞུགས་ཐུབ་མེད་ཀྱང་ཁོང་གིས་ཡིག་ཐོག་གསུང་འཕྲིན་གནང་པ་འཇར་མ་ནི་གནས་འཁོད་བོད་རིགས་ཚོགས་པའི་འབྲེལ་མཐུད་པ་པདྨ་འཛོམས་པ་ལགས་ནས་སྒྲོགས་སྦྱང་དང་། དམིགས་བསལ་སྐུ་མགྲོན་སུད་སི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་ཕུན་ཚོགས་སྟོབས་རྒྱལ་ལགས། ཧོང་ཀོང་གི་སྐུ་ཚབ་ཨེ་མི་ (Ms Amy) ལགས། ཡུ་གུར་གྱི་སྐུ་ཚབ། རྒྱ་ནག་གི་སྐུ་ཚབ་ཨེར་ཝིན་ (Mr. Erwin (My duty in Germany)ལགས།  འཇར་མ་ནི་འགྲོ་བ་མིའི་ཐོབ་ཐང་རྩོད་ལེན་པ། གཞན་ཡང་འཇན་མ་ིན་ཁུལ་གྱི་བོད་མི་གྲངས་ ༣༠༠ ལྷག་མཛད་སྒོ་ཐོག་ལྷན་འཛོམས་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོུད་ ༡༡ ནས་ཕྱི་དྲོ་ཆུ་ཚོད་ ༢ བར་འཇར་མ་ནི་རྒྱལ་སའི་རྒྱལ་སྒོའི་མདུན་དུ་འཇན་འཁོད་བོད་རིགས་ཚོགས་པས་བོད་ནང་རང་ལུས་མེར་བསྲེགས་གཏོང་མཁན་རྣམས་ཀྱི་པར་རིས་འགྲེམས་སྟོན་དང་། དེ་ཁུལ་ཡུལ་སྐོར་སྤྲོ་འཆམ་པ་རྣམས་ལ་བོད་ཀྱི་གནས་སྟངས་ཐོག་གསལ་བཤད་དང་འཇར་མ་ནི་གནས་འཁོད་བོད་རིགས་ཚོགས་པའི་འཇར་མན་སྐད་ཐོག་བསྒྲགས་གཏམ་འགྲེལ་སྤེལ་ཡོད། དེ་ནས་འཇར་མན་རྒྱལ་སའི་རྒྱལ་སྒོ་ནས་རྒྱ་ནག་གཞུང་ཚབ་ལས་ཁུངས་བར་ཞི་བའི་གོམ་བགྲོད་གནང་། གོམ་བགྲོད་ཀྱི་དཀྱིལ་དུ་འཇར་མན་ཕྱི་སྲིད་ལས་ཁུངས་ཀྱི་མདུན་དུ་བོད་རིགས་ཚོགས་པའི་ཚོགས་གཙོ་བསྟན་འཛིན་ཡེ་ཤེས་ལགས་དང་། ཧོང་ཀོང་སྐུ་ཚབ། ཡུ་གུར་སྐུ་ཚབ་བཅས་ནས་གཏམ་བཤད་གནང་། དེ་ནས་རྒྱ་ནག་གཞུང་ཚབ་ཀྱི་མདུན་སུད་སི་དོན་གཅོད་སྐུ་ཚབ་ནས་གཏམ་བཤད་གནང་སྟེ་མཛད་སྒོ་ཞི་བའི་ངང་སྒྲོལ་ཡོད་པ་བཅས། །