༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༣ ཚེས་ ༡༠ ནི་ཕྱི་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་ཆོལ་གསུམ་རྒྱ་ཆེའི་མང་ཚོགས་ཀྱིས་རྒྱ་ནག་གུང་ཁྲན་གཞུང་གི་བཙན་གནོན་ལ་ངོ་རྒོལ་བྱས་ཏེ་མི་ལོ་ཧྲིལ་པོ་  ༦༥ འཁོར་བའི་ཉིན་མོ་ཡིན་ལ།  བོད་རྒྱལ་ཁབ་དང་མི་རིགས་ཀྱི་ཆེད་དུ་ལུས་སྲོག་ལེགས་སྐྱེས་ཕུལ་བའི་དཔའ་བོ་དཔའ་མོ་རྣམས་ལ་རྗེས་དྲན་བྱེད་པའི་དུས་ཚིགས་ཤིག་ཀྱང་ཡིན།  ལོ་ལྟར་ཉིན་མོ་འདིར་འཛམ་གླིང་ས་ཕྱོགས་གང་སར་གནས་པའི་བཙན་བྱོལ་བོད་མི་ཚོས་རྣམ་པ་སྣ་ཚོགས་དང་།  གཞི་རྒྱ་ཆེ་ཆུང་འདྲ་མིན་གྱི་ལས་འགུལ་སྤེལ་སྟེ་གསུམ་བཅུའི་དུས་དྲན་སྲུང་བརྩི་ཞུ་གི་ཡོད་པ་ལྟར།  བྱང་ཨ་རིའི་ནང་དུའང་གསུམ་བཅུའི་དུས་དྲན་ཐེངས་ ༦༥ པ་སྲུང་བརྩི་ཞུས་ཡོད།  རྣམ་ཀུན་བྱང་ཨ་རིའི་ནང་དུས་དྲན་སྲུང་བརྩི་དང་།  མཛད་སྒོ་ཚོགས་སྐབས་རེས་གཟའ་སྤེན་ཉིའི་གུང་གསེང་དང་སྟབས་བསྟུན་དགོས་ཀྱི་ཡོད་ཀྱང་།  གསུམ་བཅུའི་དུས་དྲན་ནི་བོད་ཀྱི་ལོ་རྒྱུས་དང་ཆབ་སྲིད་ཐད་ཧ་ཅང་གལ་གནད་ཆེ་བའི་དུས་ཚིགས་ཤིག་ཡིན་སྟབས།  གསུམ་པའི་ཚེས་བཅུ་ཉིན་མོ་དེ་རང་ལ་སྲུང་བརྩི་ཞུ་གི་ཡོད།  

བྱང་ཨ་རིར་མཚོན་ན།  བོད་རིགས་སྤྱི་མཐུན་ཚོགས་པ་ཆེ་འབྲིང་ཆུང་གསུམ་བསྡོམས་ ༣༠ མིན་ཙམ་ཡོད་ཅིང་།  དེ་རིང་ས་གནས་མང་ཆེ་བའི་ནང་བོད་རིགས་སྤྱི་མཐུན་ཚོགས་པས་འགན་ཁུར་དང་།  ས་གནས་ཁག་ཅིག་ནང་བོད་རིགས་སྤྱི་མཐུན་ཚོགས་པ་དང་གཞུང་ཁོངས་མ་ཡིན་པའི་ཚོགས་པ་ཁག་མཉམ་རུབ་ཐོག་ནས་གསུམ་བཅུའི་དུས་དྲན་སྲུང་བརྩིའི་མཛད་སྒོ་ཚོགས་ཏེ།  མི་ལོ་ ༦༥ སྔོན་གྱི་ཟླ་བ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་བྱུང་བའི་སྒེར་ལངས་ལོ་རྒྱུས་ལ་དྲན་གསོ་དང་། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་གདུག་རྩུབ་བཙན་གནོན་གྱི་སྲིད་བྱུས་ལ་དམིགས་ཏེ་ལས་འགུལ་འདྲ་མིན་སྤེལ་ཡོད། དེ་དག་སྙིང་པོར་བསྡུས་ན།  བོད་མི་ཚོས་ངོ་རྒོལ་སྐད་འབོད་དང་།  རྔམ་སྟོན་ཁྲོམ་སྐོར།  ས་གནས་དཔོན་རིགས་དང་།  བོད་དོན་རྒྱབ་སྐྱོར་བས་བོད་དོན་གསུང་བཤད།  མངའ་སྡེའམ་གྲོང་ཁྱེར་གཞུང་གི་མདུན་ཐང་དུ་བོད་ཀྱི་རྒྱལ་དར་སྒྲེང་འཛུགས།  གསུམ་བཅུའི་སྒེར་ལངས་གང་འདྲ་བྱས་ནས་བྱུང་བའི་སྐོར།  བོད་མིའི་སྒྲིག་འཛུགས་བཀའ་ཤག་དང་།  བོད་མི་དམངས་སྤྱི་འཐུས་ལྷན་ཚོགས་ཀྱི་གཞུང་འབྲེལ་གསུང་བཤད་སྒྲོགས་སྦྱང་།  རྒྱལ་གླུ་དཀྲོལ་ཏོང་།  བདེན་ཚིག་སྨོན་ལམ་གསུང་འདོན  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་བརྟན་པའི་སྨོན་ཚིག་སྒྲོགས་སྦྱང་།  ལག་ཏུ་རྒྱལ་དར་དང་།  འབོད་ཚིག་སྣ་ཚོགས་འཁོད་པའི་འཕྲེད་དར་དང་ཁྱབ་བསྒྲགས་སྦྱར་ཡིག་འཁྱེར་བ་སོགས་ཀྱི་ཐོག་ནས་གསུམ་བཅུའི་དུས་དྲན་ཐེངས་ ༦༥ པ་སྲུང་བརྩི་ཞུས་ཏེ་བོད་རྒྱའི་དཀའ་རྙོག་ད་དུང་སེལ་མེད་པའི་རྣམ་འགྱུར་གསལ་སྟོན་བྱས་ཡོད།  ཨ་རིར་མཚོན་ན།  འདི་ལོ་ནི་བོད་རྒྱའི་དཀའ་རྙོག་སེལ་ཐབས་ཀྱི་ལོ་རྒྱུས་རང་བཞིན་ལྡན་པའི་ཁྲིམས་འཆར་ H.R. 533 ཨ་རིའི་གྲོས་ཚོགས་འོག་མའི་ནང་གཏན་འབེབས་ཟིན་ནས་ད་ལྟ་གྲོས་ཚོགས་གོང་མའི་ནང་འགྲོ་བཞིན་པའི་སྐབས་ཡིན་སྟབས།  དེ་གཏན་འབེབས་ཡོང་ཐབས་ཆེད་ཟླ་བ་ ༣ ཚེས་ ༡༡ དང་ ༡༢ ཉིན་གཉིས་རིང་བོད་མི་རྣམས་ཨ་རིའི་ས་ཕྱོགས་གང་ས་ནས་རྒྱལ་ས་ཝ་ཤིང་ཊོན་སྒྲི་སི་རུ་མཉམ་འཛོམས་ཀྱིས་བོད་དོན་ཞུ་གཏུགས་ལས་འགུལ་སྤེལ་བའི་སྐབས་དང་འཁེལ་ཡོད།  བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ཆེད་དུ།  ནིའུ་ཡོག་ཏུ་ཕེབས་ནས་འཛམ་གླིང་མཉམ་སྦྲེལ་རྒྱལ་ཚོགས་ཀྱི་མདུན་ཐང་དུ་གསུམ་བཅུའི་དུས་དྲན་ཐེངས་ ༦༥ པ་སྲུང་བརྩིའི་མཛད་སྒོར་མཉམ་ཞུགས་གནང་ཡོད་པ་དང་།  ཁོང་གིས་མཛད་སྒོར་གསུང་བཤད་གནང་སྐབས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ H.R. 533 ཁྲིམས་སུ་སྒྱུར་ཐབས་ལ་འབད་བརྩོན་བྱེད་པའི་བརྒྱུད་རིམ་ཁྲོད་ཚང་མས་ནུས་པ་མཉམ་སྤུངས་གནང་བ་ལ་གོ་སྐབས་འདི་བརྒྱུད་ཐུགས་རྗེ་ཆེ་ཞུས་ཤིང་།  སྔ་ལོའི་བོད་དོན་ཞུ་གཏུགས་ལས་འགུལ་ནང་བོད་མི་ ༡༤༠ ཙམ་མཉམ་ཞུགས་བྱས་ཡོད་པ་དང་།  འདི་ལོ་ས་གནས་གང་ས་ནས་བོད་མི་ ༡༨༠ ལྷག་ཙམ་མཉམ་ཞུགས་གནང་རྒྱུའི་དེབ་སྐྱེལ་བྱས་ཡོད་པར་བསྔགས་བརྗོད་དང་ཐུགས་རྗེ་ཆེ་ཞུས་ཡོད་པ་རེད།  དེ་རིང་ཟླ་བ་ ༣ ཚེས་ ༡༠ ཉིན་བྱང་ཨ་རིའི་ས་གནས་ཁག་ནང་གསུམ་བཅུའི་དུས་དྲན་ཐེངས་ ༦༥ པ་སྲུང་བརྩི་གནང་སྐབས་ཀྱི་ས་གནས་རེ་རེའི་མཚོན་དོན་འདྲ་པར་རེ་འགོད་འབུལ་ཞུ་རྒྱུ་དང་།  ཆབས་ཅིག་ས་གནས་ཚང་མས་བོད་མིའི་སྒྲིག་འཛུགས་བཀའ་ཤག་གི་ལམ་སྟོན་བཞིན་ནུས་པ་མཉམ་སྤུངས་བྱས་ཏེ།  གསུམ་བཅུའི་དུས་དྲན་ཐེངས་ ༦༥ སྲུང་བརྩིའི་བྱེད་སྒོ་རྒྱ་ཁྱབ་ངང་ཚགས་ཚུད་གོ་སྒྲིག་གནང་བར་བྱང་ཨ་རི་སྐུ་ཚབ་དོན་གཅོད་མཆོག་ནས་ཐུགས་རྗེ་ཆེ་ཞུ་རྒྱུ་ཡིན།།