༄༅། །ཕྱི་ལོ་༢༠༢༤ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༥ པའི་གཞུང་འབྲེལ་སྐུ་མགྲོན་ཨོསྟྲེ་ལི་ཡ་དང་འཇར་མ་ནཱིའི་གྲོས་ཚོགས་འཐུས་མི་རྣམ་པས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་དོན་ལ་རྒྱབ་སྐྱོར་གྱི་གསར་འགོད་གསལ་བསྒྲགས་སྤེལ་ཡོད།

གསར་འགོད་གསལ་བསྒྲགས་ཐོག་ཨོ་སྟྲེ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ཊིན་སི་མིཊ་ (Dean Smith) ལགས་དང་། གྲོས་ཚོགས་འཐུས་མི་དང་ཨོ་གླིང་གི་སྲིད་བློན་གཞོན་པ་ཟུར་པ་སྐུ་ཞབས་མ་ཧི་ཀལ་མེག་ཀོར་མེག་ (Michael McCormack) ལགས།  དེ་བཞིན་གྲོས་ཚོགས་འཐུས་མི་ལྕམ་སྐུ་དི་བུ་ར་ཨོ་ནིལ་ (Deborah O’ Nell) ལགས། གྲོས་ཚོགས་འཐུས་མི་སྐུ་ཞབས་ཊེ་ཝིཊ་ཨི་སི་མིཊ་ (David Smith) ལགས། ཇར་མ་ནི་གྲོས་ཚོགས་འཐུས་མི་སྐུ་ཞབས་མེ་ཀལ་བྷ་རན་ཌི་ (Michael Karl Brand) ལགས་ཕེབས་ཞུགས་གནང་ཡོད།དེ་ཡང་གསར་འགོད་གསལ་བསྒྲགས་ཐོག་འཇར་མན་གྱི་གྲོས་ཚོགས་འཐུས་མི་སྐུ་ཞབས་མེ་ཀལ་བྷ་རན་ཌི་ (Michael Brand) ལགས་ཀྱིས་རྒྱ་ནག་གཞུང་གིས་ཁྲིམས་འགལ་ཐོག་ནས་བོད་མི་གཙོས་པའི་ཡུ་གུར་སོགས་ལ་དྲག་གནོན་བྱེད་བཞིན་པ་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གནས་བབ་དང་འགལ་ཡོད་པ་མ་ཟད། རྒྱ་ནག་གཞུང་གིས་ཨུ་རུ་སུ་དང་དྲག་སྤྱོད་རིང་ལུགས་པ་སོགས་ལ་རྒྱབ་སྐྱོར་བྱས་ནས་ཨེ་ཤ་ཡ་དང་དཀྱིལ་ཤར་ཨེ་ཤ་ཡའི་ཁུལ་དུ་དྲག་པོའི་བྱ་སྤྱོད་མང་དག་ཅིག་སྤེལ་མུས་ཡིན། འཕགས་བོད་གཉིས་ཀྱི་མཐའ་མཚམས་ཁུལ་དུ་རྩོད་རྙོག་མང་དག་ཅིག་སློང་བཞིན་ཡོད་པ་དེ་ནི་བོད་ཀྱི་གནད་དོན་ཙམ་མིན་པར་རྒྱ་གར་གྱི་བདེ་འཇགས་གཙོས་པའི་ཨེ་ཤ་ཡའི་བདེ་འཇགས་ལའང་འབྲེལ་བ་ཡོད། རྒྱ་ནག་གཞུང་གིས་བོད་ནང་གཏན་འཇགས་སློབ་གྲྭ་བཙུགས་ཏེ་བོད་ཕྲུག་རྣམས་བཙན་གྱིས་ཕ་མ་དང་ཁ་བྲལ་དུ་བཅུག་སྟེ་བོད་ཀྱི་སྐད་ཡིག་དང་། ངོ་བོ། རིག་གཞུང་སོགས་རྩ་མེད་གཏོང་ཐབས་བྱེད་མུས་ཡིན་པར་བློ་ཕམ་ཡོད་སྐོར་གསུངས་ཡོད། དེ་བཞིན་ཨོ་སྟྲེ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ཊིན་སི་མིཊ་  (Dean Smith) ལགས་ཀྱིས་ཁོང་རྣམས་ཨོ་སྟྲེ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ངོ་བོའི་ཐོག་ནས་བཞུགས་སྒར་དུ་ཆེད་ཕེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་བྱུང་བར་ཧ་ཅང་དགའ་པོ་བྱུང་ཞེས་དང་། རྒྱ་གཞུང་གིས་འདས་པའི་ལོ་བཅུ་ཕྲག་མང་པོའི་རིང་བོད་མིའི་ཐོག་དྲག་གནོན་ཅན་གྱི་སྲིད་བྱུས་འདྲ་མིན་ལག་བསྟར་གྱིས་བོད་རིགས་རྣམས་རྒྱ་རིགས་སུ་བསྒྱུར་ཐབས་དང་། རྒྱལ་སྤྱིའི་ཁྲིམས་སྒྲིག་ཁག་ལ་བརྩི་མེད་རྡོག་རོལ་བཏང་དང་གཏོང་བཞིན་ཡོད་པར་སྐྱོན་བརྗོད་ནན་པོ་དང་འབྲེལ། བོད་མིའི་འཐབ་རྩོད་ལ་རོགས་པ་གང་ཐུབ་གནང་རྒྱུའི་ཆོད་སེམས་བརྟན་པོ་ཡོད་སྐོར་གསུངས་ཡོད།ཨོསྟྲེ་ལི་ཡའི་གྲོས་ཚོགས་འཐུས་མི་ལྕམ་སྐུ་དི་བུ་ར་ཨོ་ནིལ་ (Deborah Mary O’Neill) ལགས་ཀྱིས་བོད་ནང་ཆོས་དད་རང་དབང་དང་། འགྲོ་འོང་རང་དབང་། སྐད་ཡིག་རང་དབང་བཅས་ལ་བཀག་སྡོམ་བྱེད་བཞིན་ཡོད་པར་བློ་ཚབས་ཆེན་པོ་ཡོད། རྒྱ་ནག་གཞུང་གིས་བོད་ནང་ཆེད་འཛུགས་བྱས་པའི་གཏན་འཇགས་སློབ་གྲྭ་གཙོས་པའི་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་སྡེ་དགེ་ཁུལ་གྱི་གནས་སྟངས་ཐད་ཤེས་རྟོགས་གང་ཐུབ་གནང་སྟེ་ཕྱིར་རང་ཡུལ་དུ་ལོག་རྗེས་གྲོས་ཚོགས་འཐུས་མི་གཞན་རྣམས་ལའང་གོ་རྟོགས་སྤེལ་རྒྱུ་ཡིན་པར་གསུངས་སོང་།དེ་རྗེས་གསར་འགོད་པའི་དྲི་བར་ལན་འདེབས་གནང་ཡོད་ཅིང་།  སྐབས་དེར་༸རྒྱལ་བའི་ཡང་སྲིད་ཀྱི་གནད་དོན་ཐད་རྒྱ་ནག་གཞུང་ལ་ཐེ་གཏོགས་བྱ་དབང་མེད་པར་མངོན་གསལ་གནང་སོང་། གཞན་ཡང་ཉེ་ལམ་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱིས་ཁྲིམས་འཆར་གཏན་འབེབས་གནང་བ་བཞིན་ཨོ་གླིང་དང་འཇར་མ་ནིའི་གྲོས་ཚོགས་ནང་དེ་ལྟར་གནང་འཆར་སྐོར་ལ་དྲི་བ་བཏང་སྐབས། ཨོ་གླིང་གྲོས་ཚོགས་འཐུས་མིའི་ངོས་ནས་སྤྱིར་ཨོ་གླིང་དང་ཨ་རི་གཉིས་ཀྱི་ཆབ་སྲིད་ཀྱི་སྒྲོམ་གཞི་མི་འདྲ་བ་ཡིན་ནའང། གྲོས་ཚོགས་འཐུས་མི་རྣམས་ཀྱིས་དེ་ལྟ་བུའི་ཁྲིམས་འཆར་གཏན་འབེབས་སླད་ཐུགས་སྣང་དང་འབད་བརྩོན་གནང་བཞིན་སྐོར་གསུངས་པ་མ་ཟད། འཇར་མ་ནི་གྲོས་ཚོགས་འཐུས་མིའི་ངོས་ནས་གཙོ་བོ་དཔལ་འབྱོར་ཐོག་རྒྱ་ནག་ལ་རྟེན་རྒྱུ་ཉུང་དུ་གཏོང་རྒྱུ་སོགས་ཀྱི་ཐབས་ལམ་གལ་ཆེ་བ་གཟིགས་ཀྱི་ཡོད་སྐོར་གསུངས་སོང་།