༄༅། །ཕྱི་ལོ་ ༢༠༢༤ ཟླ་བ་ ༣ ཚེས་ ༨ ཉིན་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པས་གངས་སྐྱིད་སྲིད་སྐྱོང་ཚོགས་ཁང་དུ་རྒྱལ་སྤྱིའི་བུད་མེད་ཉིན་མོ་སྲུང་བརྩི་ཞུས་ཡོད།

དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༣ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག དབུས་འོས་བསྡུ་ལས་ཁང་གི་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་དཔེ་ཟུར་དབང་འདུས་ཚེ་རིང་མཆོག དེ་བཞིན་འཇར་མན་ནི་གྲོས་ཚོགས་འཐུས་མི་མེ་ཀལ་བྷ་རན་ཌི་ (Michael Brand) མཆོག་དང་། འཇར་མན་རྒྱལ་སྤྱིའི་བོད་དོན་ལས་འགུལ་ཁང་གི་འགན་ཁུར་བ་ཀཱ་ཡེ་མུ་ལར (Kai Muller) ལགས། མེ་ཀལ་ (Michael Gutsche) ལགས། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་དང་སྲི་ཞུའི་ལས་བྱེད་རྣམ་པ་མཉམ་ཞུགས་གནང་ཡོད།སྐབས་དེར་ཐོག་མར་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་ཚེ་རིང་སྐྱིད་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པས་རྒྱལ་སྤྱིའི་བུད་མེད་ཉིན་མོ་ལོ་ལྟར་སྲུང་བརྩི་ཞུ་བཞིན་ཡོད། འདི་ལོའི་རྒྱལ་སྤྱིའི་བུད་མེད་ཉིན་མོའི་བརྗོད་གཞི་ནི་ (Invest in Women: Accelerate progress) ཞེས་བཞག་ཡོད་པ་འདི་རྒྱལ་སྤྱི་ཁྱོན་ཡོངས་ལ་ཁྱབ་པ་དང་། ལྷག་པར་ཡར་རྒྱལ་འགྲོ་བཞིན་པ་དང་ལུང་པ་སྐྱོ་བའི་ནང་བུད་མེད་ལ་ཐོབ་ཐང་ཚད་ལྡན་མེད་པ་དེ་ཚོའི་གནས་སྟངས་མང་པོ་ཞིག་དང་སྦྲགས་ནས་ཡོང་བཞིན་ཡོད། ང་རང་ཚོའི་སྤྱི་ཚོགས་ལ་མཚོན་ན། ཐོག་མར་བོད་ནས་ཡོང་སྐབས་ཕོ་མོའི་དབྱེ་འབྱེད་ཀྱི་གནས་ཚུལ་ཏན་ཏན་ཡོད་རེད་བསམ་གྱི་ཡོད། བོད་ཀྱི་ས་ཁུལ་ཁ་ཤས་ནང་ཕོ་མོ་དབྱེ་འབྱེད་ཤུགས་ཆེན་པོ་ཡོད་པའི་གནས་ཚུལ་ཡོད། བཙན་བྱོལ་དུ་འབྱོར་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་ཆབ་སྲིད་ཀྱི་འགོ་ཁྲིད་ནང་དུའང་བུད་མེད་སླེབ་རྒྱུའི་འབད་བརྩོན་གནང་བ་ནང་ལྟར་ཕལ་ཆེར་སྤྱི་འཐུས་སྐབས་ ༤།༥ ནས་ཚོལ་ཁ་གསུམ་གྱི་ནང་ནས་བུད་མེད་གཅིག་ངེས་པར་དུ་སླེབ་དགོས་པའི་ས་དམིགས་དེ་འདྲ་བསྟན་གནང་བ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱི་ལོ་ ༡༩༧༠ ནང་ཕུགས་འགྱངས་རིང་པོ་དགོངས་པ་བཞེས་ཏེ་བཙན་བྱོལ་སྤྱི་ཚོགས་ནས་ཕོ་མོ་འདྲ་མཉམ་མེད་པ་དང་། ཕོ་མོའི་དབྱེ་བ་ཡོད་པའི་རྒྱུ་མཚན་ལ་བརྟེན་ནས་བུད་མེད་མང་བ་ཞིག་ཆབ་སྲིད་ཀྱི་གོ་གནས་ལ་སླེབ་ཐུབ་ཀྱི་མེད་པར་གཟིགས་ནས་གོམས་པ་སྤོས་གནང་བ་ཞིག་རེད། བུད་མེད་ནུས་སྟོབས་ཀྱི་སྐད་ཆ་བཤད་པའི་སྐབས་བུད་མེད་ལ་རང་བཞིན་གྱི་ནུས་སྟོབས་ཡོད་པ་དང་། ཤེས་ཡོན་དང་འཇོན་ཐང་ཡོད་མཁན་མང་པོ་ཞིག་གིས་བུད་མེད་ལ་ཟུར་དུ་ས་དམིགས་དགོས་ཀྱི་མི་འདུག་ཟེར་མཁན་དེ་འདྲ་ཡོང་གི་ཡོད། ང་ཚོ་ཕོ་དང་འདྲ་མཉམ་བྱས་ནས་རྩོད་དེ་ཡར་སླེབ་ཐུབ་ཀྱི་ཡོད་ཅེས་གསུང་མཁན་ཡོད། ཡང་ཁ་ཤས་ཀྱི་འདི་ཟུར་དུ་དགོས་ཀྱི་འདུག་ཅེས་གསུང་མཁན་ཡོད།ཤེས་ཡོད་སྤྲོད་ཕྱོགས་ལ་མཚོན་ན། བཙན་བྱོལ་ལ་སླེབས་པ་ནས་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་སློབ་སྦྱོང་བྱེད་རྒྱུའི་གོ་སྐབས་ཕོ་མོ་དབྱེ་བ་མེད་པར་འདས་པའི་ལོ་ངོ་ ༦༥ རིང་སྤྱི་ཚོགས་གསོ་སྐྱོང་བྱས་ཐུབ་པ་ཡོད། ཅེས་དང་།

དེ་བཞིན་བུད་མེད་ལ་འཚེ་བའི་བྱ་སྤྱོད་འགོག་ཐབས་སུ་ད་ལྟ་ཡིན་ནའང་སྐྱེས་པ་ཕོ་ལ་སློབ་སྦྱོང་སྤྲོད་དགོས་པ་མང་པོ་ཆགས་ཀྱི་འདུག ཉེ་ཆར་བཙན་གཡེམ་གྱི་ཐབས་ཤེས་བྱས་པའི་གནས་ཚུལ་དེ་འདྲ་ཐོན་ཡོང་གི་འདུག དེ་དག་ནི་དངོས་འབྲེལ་ཐབས་སྐྱོ་བོ་རེད། གནད་དོན་འདི་རིགས་ལ་བོད་མིའི་སྒྲིག་འཛུགས་ཀྱིས་ངོས་ནས་དེ་སྔ་ནས་བཟོད་བྲལ་ཡིན་ཞེས་གསུངས་ཡོད། ད་ལྟ་ཡིན་ནའང་བཙན་གཡེམ་དང་བཙན་གཡེམ་གྱི་ཐབས་ཤེས་བྱས་པའི་བྱ་སྤྱོད་གང་འདྲ་ཞིག་བྱུང་ནའང་ཡུལ་ཁྲིམས་རང་ལ་གཏུགས་ན་མ་གཏོགས་དེ་དག་སྦས་སྐུང་བྱེད་ན་རྩ་བ་ཉིད་ནས་ཕན་ཐོགས་མེད། ཅེས་སོགས་ཀྱི་གསུང་བཤད་གནང་།དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་བརྗོད་གཞི་དེ་དང་འབྲེལ་བུད་མེད་ནུས་སྟོབས་གོང་འཕེལ་གཏོང་བར་ཕོ་མོ་གཉིས་ཀའི་ལས་འགན་ཡོད་པ་དང་། བུད་མེད་ནུས་པ་དང་ལྡན་ན་རང་གི་ཁྱིམ་ཚང་ཙམ་མ་ཟད་སྤྱི་ཚོགས་ལའང་ཕན་གྱི་ཡོད་པའི་སྐོར་གསུངས་པ་བཅས།།