ནང་སྲིད་ལས་ཁུངས་ཀྱི་གོ་སྒྲིག་འོག་ལ་དྭགས་སོ་ནམ་གླིང་དུ་ཁྱིམ་ཐོ་ཞིབ་བཤེར་བའི་སྦྱོང་བརྡར་དབུ་འཛུགས་གནང་བ།

གསར་ལས་ཁང་གི་གསར་འགོད་པས།

༢༠༢༤-༠༣-༠༡

༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༠༡ ནས་ ༠༣ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་ལ་དྭགས་སོ་ནམ་གླིང་མི་མང་ཚོགས་ཁང་དུ་ཁྱིམ་ཐོ་ཞིབ་བཤེར་བའི་སྦྱོང་བརྡར་དབུ་འཛུགས་གནང་ཡོད།

དེ་ཡང་དབུ་འབྱེད་མཛད་སྒོའི་ཐོག་ལ་སྤྱི་དོན་གྲུབ་བཀྲ་ཤིས་ལགས་དང་། ནང་སྲིད་ལས་ཁུངས་ཀྱི་ཟུང་དྲུང་བཀྲ་ཤིས་བདེ་སྐྱིད་ལགས། རྒྱ་གར་སམ་བོ་དྷི་ཚོགས་པའི་ཁེ་ལས་པ་སེ་ཀཏ་གྷོཤ་ལགས་དང་། བ་དི་རི་ནཱ་ཐི་ག་ན་པ་ཏི་ལགས། གཞིས་གྲོང་ཁག་གི་སྤྱི་མི། བྱང་ཐང་འགོ་པ་བཅས་ཕེབས་ཞུགས་གནང་ཡོད།ཟུང་དྲུང་བཀྲ་ཤིས་བདེ་སྐྱིད་ལགས་ཀྱིས་ཁྱིམ་ཐོ་ཞིབ་བཤེར་ལས་གཞིའི་དགོས་དམིགས་སྐོར་ངོ་སྤྲོད་གནང་བ་མ་ཟད། བཙན་བྱོལ་བོད་མིའི་གནས་སྟངས་རྒྱུས་ལོན་ཆེད་ལས་གཞི་འདི་གལ་ཆེ་བརྩིས་ཏེ་མཉམ་ཞུགས་པ་རྣམས་ནས་ཕྱར་གྲུ་མཉམ་འདེགས་གནང་རྒྱུའི་རེ་སྐུལ་ཞུས་ཡོད། དེ་བཞིན་མཉམ་ཞུགས་པ་རྣམས་ནས་དམངས་ལ་གོ་རྟོགས་སྤེལ་སྐབས་བཟོད་བསྲན་ངང་ནས་འགྲེལ་བརྗོད་གནང་དགོས་གལ་སྐོར་དང་། ཞིབ་བཤེར་བ་ཚོར་རྩོད་རྙོག་དང་གོ་ནོར་མི་ཡོང་བའི་ཆེད་དང་། མང་ཚོགས་ནས་ཀྱང་མཉམ་ཞུགས་གང་ཐུབ་བྱེད་ཐུབ་པའི་ཆེད་དུ་ས་གནས་སུ་ཞིབ་བཤེར་གནང་བའི་སྐབས་ལྷིང་འཇགས་རྒྱུན་སྲིང་དགོས་པའི་ནན་སྐུལ་གནང་ཡོད།སྐུ་མགྲོན་གཙོ་བོ་ལ་སྤྱི་དོན་གྲུབ་བཀྲ་ཤིས་ལགས་ཀྱིས་ཁྱིམ་ཐོ་ཞིབ་བཤེར་གྱི་ལས་གཞི་ངོ་སྤྲོད་དང་། བཙན་བྱོལ་བོད་མིའི་སྤྱི་ཚོགས་ཀྱི་གནས་སྟངས་དང་གལ་གནད་སྐོར་གསལ་བཤད་གནང་། དེ་རྗེས་མཉམ་ཞུགས་པ་རྣམས་ནས་རང་ཉིད་ངོ་སྤྲོད་གནང་གྲུབ་མཚམས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཁྱིམ་ཐོ་ཞིབ་བཤེར་གྱི་གལ་གནད་དང་འབྲེལ་བའི་བརྙན་ཐུང་ཞིག་གཟིགས་འབུལ་ཞུས་ཡོད།