༄༅། །ཕྱི་ལོ་ ༢༠༢༤ ཟླ་ ༠༣ ཚེས་ ༠༨ རེས་གཟའ་པ་སངས་ཉིན་ལི་ཐུ་ནི་ཡ་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་ཝིལ་ནི་ཡ་སི་རྒྱ་ནག་གཞུང་ཚབ་ལས་ཁུངས་མདུན་དུ་རྒྱ་ནག་གི་བཙན་འཛུལ་ལ་ངོ་རྒོལ་བྱས་པའི་ལོ་ངོ་དྲུག་ཅུ་རེ་ལྔའི་རྗེས་དྲན་མཚོན་ཆེད་ངོ་རྒོལ་གྱི་ལས་འགུལ་ཞིག་སྤེལ་ཡོད་པ་རེད།
དེ་ཡང་བོད་དོན་རྒྱབ་སྐྱོར་ཚོགས་པའི་ཚོགས་མི་རོ་བར་ཊ་སི་མ་ཛེ་ཀ་ (Robertas Mažeika) ལགས་ཀྱིས། དེ་རིང་ང་ཚོ་ཚང་མ་བོད་པ་ལྟ་བུ་ཡིན། རྒྱ་ནག་གིས་བཙན་བཟུང་འོག་ཡོད་པའི་བོད་ཀྱིས་ཡུཀ་རེན་གྱི་དཀའ་སྡུག་དང་། ཕྱི་ལོ་ ༡༩༩༠ སྔོན་རང་བཙན་མ་ཐོབ་གོང་གི་ལི་ཐུ་ནི་ཡའི་འཐབ་རྩོད་མཚོན་གྱི་ཡོད་པས་འཛམ་གླིང་མི་མང་རྣམས་ནས་ཁོང་ཚོའི་སྡུག་སྐད་ཐོས་དགོས། ཞེས་གསུངས་ཡོད།
དེ་ནས་མི་མང་རྣམས་ནས་བོད་དང་། ལི་ཐུ་ནི་ཡ། ལཱཊ་ཝི་ཡ་བཅས་ཀྱི་རྒྱལ་དར་སྒྲེང་ཞིང་། རྒྱ་གཞུང་གིས་བོད་ནང་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་བརྒྱུད་བཙན་ཤེད་ཀྱིས་བོད་རིགས་གཅིག་གྱུར་བཟོ་རྒྱུ་དེ་འཕྲལ་དུ་མཚམས་འཇོག་དགོས་པའི་དགོས་འདུན་བཏོན། བོད་ཀྱི་སྐད་ཡིག་དང་རིག་གཞུང་། ཆོས་ལུགས་བཅས་གཏོར་བཤིག་གཏོང་རྒྱུ་དེ་ངེས་པར་དུ་མཚམས་འཇོག་དགོས་ཞེས་པའི་འབོད་སྒྲ་དང་བཅས་ལས་འགུལ་སྤེལ།
དེ་བཞིན་བོད་ནང་ཆུ་མཛོད་གསར་རྒྱག་གི་ལས་གཞིའི་དགོན་པ་རྣམས་གཏོར་བཤིག་གཏོང་རྒྱུའི་ཉེན་ཁ་ཡོད་པ་དང་། བོད་སྡེ་དགེ་ཁུལ་དུ་ཞི་བའི་ངོ་རྒོལ་སྐབས་འཛིན་བཟུང་བྱས་པའི་བཙོན་པ་རྣམས་འཕྲལ་དུ་གློད་འགྲོལ་གཏོང་དགོས་པའི་དགོས་འདུན་བཏོན་ཡོད།
ཕྱི་ལོ་ ༡༩༩༠ ལོར་ལི་ཐུ་ནི་ཡར་རང་བཙན་ཐོབ་རྗེས་བོད་དོན་རྒྱབ་སྐྱོར་ཚོགས་པ་གསར་འཛུགས་བྱས་པ་ནས་བཟུང་། ཝིལ་ནི་ཡ་སི་གྲོང་ཁྱེར་དུ་བོད་དོན་རྒྱབ་སྐྱོར་གྱི་ལས་འགུལ་ཁག་རྒྱུན་དུ་གོ་སྒྲིག་གནང་ཡོད། དེའི་དགོས་དམིགས་གཙོ་བོ་ནི་འཛམ་གླིང་མི་མང་རྣམས་ལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་དོ་སྣང་སླེབས་ཕྱིར་ཡིན་པ་རེད།
ལས་འགུལ་དེའི་སྐོར་ལ་རྒྱལ་ཡོངས་ཀྱི་གསར་འགྱུར་བརྒྱུད་ལམ་ཁག་ཏུ་སྤེལ་ཡོད་པ་མ་ཟད། རྒྱལ་ཡོངས་རླུང་འཕྲིན་ཁང་ (LRT) གིས་ཀྱང་གནས་ཚུལ་དེ་ཁྱབ་བསྒྲགས་བྱས་ཡོད་པ་བཅས།།
