༄༅། །ཕྱི་ལོ་ ༢༠༢༤ཟླ་བ་ ༣ ཚེས་ ༢༧ ཉིན་བལ་ཡུལ་དོན་ཁང་ཧི་མ་ལ་ནང་པའི་དཔེ་མཛོད་དང་ལེགས་བྱང་བསྟི་གནས་ཁང་གི་གོ་སྒྲིག་འོག་བལ་ཡུལ་མཆོད་འཇོར་ཚོགས་ཁང་དུ་བཀའ་ཟུར་༸སྐྱབས་རྗེ་ཀིརྟི་རིན་པོ་ཆེ་བློ་བཟང་བསྟན་འཛིན་འཇིགས་མེད་ཡེ་ཤེས་རྒྱ་མཚོ་མཆོག་གིས་མཛད་པའི་སློབ་དེབ་བློ་གསལ་མགུལ་རྒྱན་དབུ་འབྱེད་མཛད་སྒོ་ཚོགས་ཡོད།
སྐབས་དེར་མཛད་སྒོའི་སྐུ་མགྲོན་གཙོ་བོར་ཆུ་དབར་༸སྐྱབས་རྗེ་ཀུན་རྩེ་རིན་པོ་ཆེ་མཆོག་དང་། དམིགས་གསལ་སྐུ་མགྲོན་བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས། དེ་བཞིན་བལ་ཡུལ་དོན་ཁང་དྲུང་ཆེ་སོགས་བོད་མི་མང་སྤྱི་ཟུར་རྣམ་པ་དང་། བལ་ཡུལ་ཁུལ་གྱི་ས་གནས་འཐུས་ཚོགས་ཀྱི་ཚོགས་གཙོ་རྣམ་པ། ས་གནས་འགོ་འཛིན་རྣམ་པ། དེ་བཞིན་རང་བདེན་ཚོགས་ཆུང་གི་ཚོགས་གཙོ་རྣམ་པ། གཞན་ཡང་བོད་མིའི་སྒྲིག་འཛུགས་ཀྱི་གཞུང་འབྲེལ་སྡེ་ཚན་ཁག་གི་འགན་འཛིན་རྣམ་པ། སློབ་གྲྭ་ཁག་དང་དགོན་སྡེ་གྲྭ་ཚང་ཁག་གི་འགན་འཛིན་རྣམ་པ། སྐྱིད་སྡུག་ཁག་གི་ཚོགས་གཙོ་བཅས་མི་གྲངས་བདུན་ཅུ་ཙམ་མཉམ་འཛོམས་ཀྱི་ཐོག་སྐུ་མགྲོན་གཙོ་བོ་དང་། དམིགས་གསལ་སྐུ་མགྲོན་གཉིས་ནས་སློབ་དེབ་ཞལ་འབྱེད་གནང་རྗེས་བཀའ་ཟུར་ཀིརྟི་རིན་པོ་ཆེས་མཛད་པའི་སློབ་དེབ་ཁག་གི་ཕྱོགས་སྒྲིག་པ་སློབ་དཔོན་ཆེན་མོ་རེ་མདོ་སེངྒེ་ལགས་ནས་སློབ་དེབ་དང་འབྲེལ་བའི་དགོས་དབང་སོགས་ཕན་ཐོག་གང་ཡོད་ངོ་སྤྲོད་གནང་བ་དང་། དེ་ནས་སྐུ་མགྲོན་གཙོ་བོ་མཆོག་ནས་ཀྱང་དགོན་པ་གྲྭ་ཚང་ཁག་གི་སློབ་གཉེར་བ་གྲྭ་བཙུན་རྣམས་ལ་ནང་ཆོས་ཤེས་ཡོན་དང་སྤྱི་ཚོགས་ལ་ཞབས་འདེགས་ཞུ་སྟངས་དང་། ལྷག་པར་བོད་ཀྱི་ཆོས་དང་རིག་གཞུང་བདག་གཅེས་གནང་སྟངས་སྐོར་སོགས་གཞུང་དམངས་ཕྱོགས་ཀུན་ནས་ཕྱར་གྲུ་མཉམ་འདེགས་དགོས་སྐོར་གསུང་བཤད་གནང་།
དེ་རྗེས་དམིགས་བསལ་སྐུ་མགྲོན་ནས་ཀྱང་སློབ་དེབ་འདི་ཉིད་བོད་མིའི་སྒྲིག་འཛུགས་ཀྱི་དགོས་དབང་གལ་ཆེར་གཟིགས་པ་བཞིན་ཆོས་རིག་ལས་ཁུངས་ཀྱི་ལམ་སྟོན་གནང་ཡོད་སྐོར་དང་། མ་འོངས་ཆོས་རིག་ལས་ཁུངས་ཀྱི་ཁྱབ་ཁོངས་བལ་ཡུལ་ཁུལ་གྱི་དགོན་པ་ཁག་གི་སློབ་གཉེར་ཁང་གི་སློབ་གཉེར་བ་རྣམས་དང་། གཞན་དོན་གཉེར་ཅན་ལའང་ཕན་ཐོག་རླབས་ཆེན་ཡོང་ངེས་སྐོར་གསུང་བཤད་གནང་། དེ་ནས་བལ་དོན་དྲུང་ཆེ་ཡིས་ཐུགས་རྗེ་ཆེ་ཞུའི་གསུང་བཤད་གནང་རྗེས་མཛད་སྒོ་ལེགས་པར་གྲོལ་ཡོད་པ་བཅས།། 
