༄༅། །ཕྱི་ལོ་ ༢༠༢༤ ཟླ་ ༣ ཚེས་ ༡༧ ཉིན་དྷ་སའི་ཉེ་འཁོར་དུ་རྟེན་གཞི་བྱས་པའི་བཙུན་དགོན་སྔ་འགྱུར་མཐོ་སློབ་ཤུག་གསེབ་ཨོ་རྒྱན་རྫོང་ནས་ཕྱི་ལོ་ ༢༠༢༣ ལོའི་ལོ་འཁོར་ཡིག་རྒྱུགས་ཆེན་མོའི་གྲུབ་འབྲས་འབུལ་བཞེས་ཀྱི་མཛད་སྒོ་འཚོགས་ཡོད།
དེ་ཉིན་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བོད་ཀྱི་བཙུན་མའི་ལས་འཆར་གྱི་དམིགས་བསལ་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་དང་། བོད་ཀྱི་བཙུན་མའི་ལས་འཆར་ངེས་སྟོན་པ་སྣང་ས་ཆོས་སྒྲོན་ལགས། དེ་བཞིན་དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་བཅས་ཕེབས་ཡོད།
མཛད་སྒོའི་ཐོག་མར་ཡིག་རྒྱུགས་དོ་དམ་པ་སློབ་དཔོན་མ་དྲུང་ཡིག་ཚེ་རིང་ལྷ་མོ་ལགས་ནས་ཡིག་རྒྱུགས་ཀྱི་སྒྲིག་གཞི་དང་འབྲེལ་བའི་དོ་དམ་པའི་ཕྱག་ལས་གནང་ཕྱོགས་ཐད་གསལ་བཤད་དང་། དེ་ནས་བཤད་གྲྭ་ལོ་རིམ་བརྒྱད་པ་དང་དྲུག་པ། ལོ་རིམ་གསུམ་པ། སྔོན་འགྲོ་གསུམ་པ། སློབ་ཆུང་བཞི་པ། སློབ་ཆུང་ཀ་སྡེ་དང་ཁ་སྡེ་བཅས་ལ་ཕྱག་འཁྱེར་དང་བྱ་དགའ་རིམ་པ་གནང་སོང་། 
དེ་བཞིན་བོད་ཀྱི་བཙུན་མའི་ལས་འཆར་གྱི་ངེས་སྟོན་པ་སྣང་ས་ཆོས་སྒྲོན་ལགས་ནས་འཛིན་སྐྱོང་དང་འབྲེལ་བའི་ཐོག་རང་གཞན་གཉིས་ཕན་གྱི་ལམ་སྟོན་གསུང་བཤད་དང་། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་འཕར་ཀུན་དགའ་རྒྱལ་མཚན་ལགས་ནས་ཆོས་དང་རིག་གཞུང་བདག་སྐྱོང་གནང་ཕྱོགས་ཐད་གསུང་བཤད། མཐའ་མ་སྐུ་མགྲོན་གཙོ་བོ་བོད་ཀྱི་བཙུན་མའི་ལས་འཆར་གྱི་དམིགས་བསལ་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་ནས་ཤེས་ཡོན་དང་འབྲེལ་བའི་ཐོག་ལམ་སྟོན་གསུང་བཤད་གནང་སོང་། དེ་ནས་ཐུགས་རྗེ་ཆེ་ཞུའི་གཏམ་བཤད་ཐོག་མཛད་སྒོ་མཇུག་བསྒྲིལ། །
