༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༣ ཚེས་ ༢༨ ཉིན་བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་ཕྱི་ལོ་ ༢༠༢༣ ལོའི་ཡིག་རྒྱུགས་སྦྱངས་འབྲས་རྩེར་སོན་རྣམས་ལ་བྱ་དགའ་འབུལ་བཞེས་ཀྱི་མཛད་སྒོ་འཚོགས་ཡོད།
མཛད་སྒོའི་ཐོག་སྐུ་མགྲོན་གཙོ་བོ་ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་དང་། དམིགས་བསལ་སྐུ་མགྲོན་༸སྐྱབས་རྗེ་བྲག་རི་རིན་པོ་ཆེ་མཆོག དེ་བཞིན་སྐུ་མགྲོན་དུ་བོད་ཀྱི་བཙུན་མའི་ལས་འཆར་ཁང་གི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་དང་། བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་དྲུང་ཆེ་ཟུར་པ་སྣང་ས་ཆོས་སྒྲོན་ལགས། བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་སློབ་སྤྱི་བཅས་ཕེབས་ཡོད།
མཛད་སྒོའི་ཐོག་མར་བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་སློབ་སྤྱིས་བཙུན་དགོན་སྒྲོལ་མ་གླིང་གི་ལོ་རྒྱུས་སྙན་སྒྲོན་གནང་། དེ་རྗེས་སྐུ་མགྲོན་གཙོ་བོ་ཆོས་རིག་དྲུང་འཕར་ཀུན་དགའ་རྒྱལ་མཚན་ལགས་ནས་ལོ་འཁོར་ཡིག་རྒྱུགས་ཀྱི་སྦྱངས་འབྲས་ལེགས་སོན་རྣམས་ལ་བྱ་དགའ་དང་། བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་དྲུང་ཆེ་ཟུར་པ་སྣང་ས་ཆོས་སྒྲོན་ལགས་ནས་བློ་རྒྱུགས་སྦྱངས་འབྲས་ལེགས་སོན་རྣམས་ལ་བྱ་དགའ་དང་། དམིགས་བསལ་སྐུ་མགྲོན་༸སྐྱབས་རྗེ་བྲག་རི་རིན་པོ་ཆེ་མཆོག་ནས་ཕར་ཕྱིན་རབ་འབྱམས་པ་དང་གློག་ཀླད་བཅས་ཀྱི་ཕྱག་འཁྱེར་དང་། བོད་ཀྱི་བཙུན་མའི་ལས་འཆར་ཁང་གི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་ནས་རི་མོ་དང་མཆོད་པ་ཁང་ཚན་བཅས་ཀྱི་སྦྱངས་འབྲས་ལེགས་སོན་རྣམས་ལ་བྱ་དགའ་དང་། བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་སློབ་སྤྱི་ནས་རྩོམ་ཡིག་དང་ཡིག་གཟུགས་ཀྱི་སྦྱངས་འབྲས་ལེགས་སོན་རྣམས་ལ་བྱ་དགའ་གནང་སོང་།
དེ་ནས་དམིགས་བསལ་སྐུ་མགྲོན་༸སྐྱབས་རྗེ་བྲག་རི་རིན་པོ་ཆེ་མཆོག་ནས་སློབ་གཉེར་གནང་སྐབས་ཐོག་མ་ཉིད་ནས་ཉམས་ལེན་གནང་དགོས་པ་དང་། འཁོར་བའི་ཉེས་དམིགས་དང་ཐར་པའི་ཕན་ཡོན། བྱམས་བརྩེའི་ཕན་ཡོན་དང་དེས་ཕོངས་པའི་སྐྱོན་སོགས་ཀྱི་ཐོག་ལ་གསུང་བཤད་གནང་སོང་།
དེ་རྗེས་བོད་ཀྱི་བཙུན་མའི་ལས་འཆར་ཁང་གི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་ནས་བཙུན་མ་ཚོས་རྒྱས་སྤྲོས་མེད་པའི་ཐོག་ནས་སློབ་གཉེར་གནང་དགོས་པ་དང་། ང་ཚོས་འཛམ་བུ་གླིང་གཞན་ལ་མེད་པའི་གཅེས་ནོར་ཉར་ཚགས་གནང་གི་ཡོད་པ། བཙུན་མར་ཞུགས་དགོས་དོན་ཐོག་ལ་བསམ་བློ་གཏོང་དགོས་པ་སོགས་ཀྱི་ཐོག་ལ་ལམ་སྟོན་གནང་སོང་།
གསུང་བཤད་གནང་མཁན་གསུམ་པ་བོད་ཀྱི་བཙུན་མའི་ལས་འཆར་ཁང་གི་ངེས་སྟོན་པ་དྲུང་ཆེ་ཟུར་པ་སྣང་ས་ཆོས་སྒྲོན་ལགས་ནས་བོད་ཀྱི་བཙུན་མའི་ལས་འཆར་དང་འབྲེལ་བའི་འཛིན་སྐྱོང་ཐོག་ལ་གསུང་བཤད་གནང་སོང་།
དེ་རྗེས་སྐུ་མགྲོན་གཙོ་བོ་ཆོས་རིག་དྲུང་འཕར་ནས་བོད་ཀྱི་སྐད་ཡིག་གལ་ཆེ་ཤོས་ཡིན་པའི་གནས་ལུགས་དང་འབྲེལ། སྐད་ཡིག་གི་རྩལ་བཞི་ལ་ཤུགས་དགོས་པ། དེ་བཞིན་གྲོང་པའི་མི་འདས་གྲོངས་སུ་གྱུར་སྐབས་དགོན་སྡེ་ཁག་ནས་དམིགས་བསལ་གུ་ཡངས་ཐོག་ནས་གྲོང་ཆོག་ལ་གཏོང་ཐབས་དགོངས་པ་བཞེས་དགོས་པའི་ཐོག་གཏམ་བཤད་གནང་ཡོད།
མཐར་བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་དགེ་བཤེས་མ་བདེ་ལེགས་སྒྲོལ་མ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།། །།
