༄༅། །བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་ནས་བོད་ཁམས་སྡེ་དགེ་ཁུལ་དུ་ཞི་བའི་ངོ་རྒོལ་གནང་མཁན་བོད་མི་མང་ཚོགས་སྟེང་རྒྱ་ནག་གཞུང་གིས་དྲག་གནོན་ཤུགས་ཆེ་བྱས་དང་བྱེད་མུས་ལ་སྐྱོན་བརྗོད་ཤུགས་ཆེ་དང་སྦྲགས། གང་བྱུང་འཇུ་བཟུང་བཙན་འཁྲིད་བྱས་པའི་བོད་མི་རྣམ་པའི་བདེ་འཇགས་ལ་བློ་ཚབ་བཏོན་གནང་འདུག རྒྱ་ནག་གཞུང་གིས་ཆུ་མཛོད་གསར་རྒྱག་གི་ལས་གཞི་དང་འབྲེལ་བོད་མི་བརྒྱ་ཕྲག་མང་པོར་རང་གི་ཕ་མེས་ནས་རྒྱུད་པའི་གྲོང་སྡེ་གནས་སྤོ་དང་། དུས་རབས་ ༡༣ ནས་ཡོད་པའི་ལོ་རྒྱུས་རང་བཞིན་ལྡན་པའི་དགོན་སྡེ་ཁག་གི་ལྡེབས་རིས་དེ་དག་གཏོར་བརླག་འགྲོ་ཉེན་ལ་མི་བཟོད་པར་ཕྱི་ལོ་ ༢༠༢༤ ཟླ་བ་ ༢ ཚེས་ ༡༤ ཉིན་ནས་བོད་མི་སུམ་བརྒྱ་ལྷག་སྡེ་དགེ་རྫོང་དུ་ལས་གཞི་མཚམས་འཇོག་ཡོང་བའི་ཞུ་འབོད་བྱེད་བཞིན་ཡོད་ལ། ས་གནས་བོད་མི་གནས་སྤོ་དགོས་པའི་གཞུང་འབྲེལ་བཀའ་རྒྱ་ཕྱིར་བསྡུ་དགོས་པའི་རེ་འདུན་བཏོན་ཡོད།
བདུན་ཕྲག་གཅིག་གི་རྗེས་ཏེ་ཕྱི་ལོ་ ༢༠༢༤ ཟླ་བ་ ༢ ཚེས་ ༢༡ ཉིན་ས་གནས་ལས་བྱེད་དང་དམག་མི་མང་པོ་ཞིག་དབོན་པོ་སྟོད་དགོན་དང་། ཡེ་ན་དགོན་དུ་ཡོང་སྟེ་དགོན་པ་དེ་གཉིས་གཏོར་བཤིག་གཏང་རྒྱུའི་གྲ་སྒྲིག་བྱས་པར་བོད་མི་མང་པོ་ཞིག་གིས་སླར་ཡང་རྒྱ་མིའི་དཔོན་རིགས་ཚོར་དགོན་པ་དེ་གཉིས་གཏོར་བཤིག་གཏང་རྒྱུ་མཚམས་འཇོག་དགོས་པའི་རེ་འདུན་བཏོན་ནས་པུས་མོ་ས་ལ་བཙུགས་ནས་ངུ་འབོད་གནང་འདུག
ཕྱི་ལོ་ ༢༠༢༤ ཟླ་བ་ ༢ ཚེས་ ༢༢ ཉིན་རྒྱ་ནག་གཞུང་གི་ཉེན་རྟོག་མི་སྣས་ཁུལ་དེར་ཞི་རྒོལ་གནང་མཁན་བོད་མི་མང་པོར་རྡུང་རྡེག་ཚབས་ཆེ་བཏང་སྟེ་རྨས་སྐྱོན་ཕོག་ནས་སྨན་ཁང་དུ་བསྐྱལ་དགོས་བྱུང་བ་དང་། འབྲི་ཆུའི་ཡར་ཀླུང་གཙང་པོའི་སྟོད་རྒྱུད་དུ་འཛུགས་འཆར་ཆུ་རགས་བཅུ་གསུམ་གྱི་ནང་གི་དྲུག་པ་སྐམ་ཐོག་ཆུ་མཛོད་འཛུགས་སྐྲུན་གྱིས་དཀར་མཛེས་སྡེ་དགེ་རྫོང་གི་དབོན་སྟོད་དགོན་དང་། ཆབ་མདོ་འཇོ་མདའ་རྫོང་གི་ཤིས་པ་ཞེས་པའི་གྲོང་གསེབ་གཉིས། དེ་བཞིན་གཙང་པོའི་འགྲམ་རྒྱུད་དུ་ཡོད་པའི་ཡེ་ན་དགོན་དང་། དབོན་སྟོད་དགོན། མཁར་མདོ་དགོན། རབ་བརྟན་དགོན། དགོན་གསར་དགོན། བཀྲ་ཤིས་དགོན་བཅས་དང་། དབོན་སྟོད་དགོན་པ་དང་། ཡེ་ན་དགོན་གཉིས་ཀྱི་ལོ་རྒྱུས་དང་ཆོས་ཕྱོགས་ཀྱི་གལ་གནད་ཆེ་བའི་གནའ་བོའི་རྟེན་དང་ལྡེབས་རིས་རྣམས་ཀྱང་ཉམས་ཆག་ཏུ་འགྲོ་ཉེན་ཆེན་པོ་ཡོད།
བོད་མི་ཞི་རྒོལ་བ་རྣམ་པས་གཙོ་བོ་རྒྱ་ནག་གཞུང་གིས་ས་གནས་བོད་མིའི་འདོད་མོས་ལ་མ་ལྟོས་པར་ཆུ་མཛོད་ལས་གཞིའི་རྐྱེན་པས་རང་གི་རྒྱུན་གཏན་གྱི་འཚོ་བའི་གནས་སྟངས་དང་། ཡུལ་སྲོལ་གོམས་གཤིས་གཏོར་སྐྱོན་འགྲོ་ཉེན་ལ་ཐུགས་འཚབ་བསྟན་ཡོད། རྒྱ་གཞུང་གིས་གློག་ཤུགས་ཀི་ལོ་ཝཱཊ་ས་ཡ་གཅིག་ལྷག་བཏོན་ནུས་ལྡན་པའི་ཆུ་གློག་ཁང་དེ་བོད་ལ་མཚོན་ན་ཁེ་ཕན་གང་ཡང་མེད།
ཉེ་ཆར་སྡེ་དགེ་རྫོང་དུ་ཞི་བའི་ངོ་རྒོལ་བྱེད་མཁན་བོད་མི་ཚོར་དྲག་གནོན་བྱས་པ་འདིས་རྒྱ་ནག་དམར་ཤོག་ཚོགས་པས་བོད་མིའི་གཞི་རྩའི་ཐོབ་ཐང་དང་རང་དབང་ལ་སྣང་མེད་དུ་སྐྱུར་བ་གསལ་སྟོན་བྱེད་ཡོད། ད་ལྟ་རྒྱ་ནག་གཞུང་གིས་སྡེ་དགེ་རྫོང་དུ་བདེ་འཇགས་སྲུང་སྐྱོབ་ཟེར་བའི་འོག་ཁུལ་དེའི་དྲ་རྒྱའི་བརྒྱུད་ལམ་ཁག་ལ་འཛུལ་ཞུགས་བྱེད་རྒྱུ་རྦད་དེ་བཀག་པ་དང་། སྤྱི་ཚོགས་དྲ་ལམ་ཁག་ཏུ་ངོ་རྒོལ་གྱི་གནས་ཚུལ་སྤེལ་རྒྱུར་ཞིབ་བཤེར་བྱས་ཡོད།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་སྡེ་དགེ་བོད་མིའི་ཞི་བའི་ངོ་རྒོལ་ལ་དྲག་གནོན་དང་། བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་སྣང་མེད་བཏང་བ་ནི་ཁས་ལེན་རྩ་བ་ནས་བྱེད་ཐབས་མེད་པ་ཞིག་རེད། ཉེས་ཆད་གཅོད་ཐབས་འདི་རྒྱ་ནག་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པ་ལས་དམར་ཤོག་རིང་ལུགས་ཀྱི་ལྟ་བ་དང་དཔལ་འབྱོར་གྱི་ཁེ་ཕན་ཁོ་ནར་འདོད་པ་གསལ་པོར་བསྟན་ཡོད།
ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་ལ་སྡེ་དགེའི་ངོ་རྒོལ་སྐབས་འཛིན་བཟུང་བྱས་པའི་བོད་མི་ཚང་མ་འཕྲལ་དུ་གློད་གྲོལ་གཏོང་དགོས་པ་དང་། བོད་མིའི་ཐོབ་ཐང་དང་མངོན་འདོད་ལ་བརྩི་བཀུར་བྱེད་དགོས་པའི་རེ་སྐུལ་ཞུ་གི་ཡོད། འཛམ་གླིང་མི་མང་གིས་བོད་མིའི་སྐད་སྒྲ་ཐོས་དགོས་པ་དང་། རྒྱ་ནག་གིས་བོད་ནང་ལོག་སྤྱོད་བྱེད་བཞིན་པའི་དངོས་ཡོད་གནས་ཚུལ་ལ་གདོང་ལེན་བྱེད་དགོས་རྒྱུ་ཧ་ཅང་ཆེན་པོ་རེད།
ང་ཚོས་ཕྱི་སྲིད་ལས་ཁུངས་དང་། མཉམ་འབྲེལ་རྒྱལ་ཚོགས། དེ་བཞིན་འབྲེལ་ཡོད་ལས་ཁུངས་བཅས་ལ་དོ་སྣང་དང་ལག་བསྟར་བྱེད་དགོས་པའི་འབོད་སྐུལ་དང་འབྲེལ་ལམ་བྱས་ཡོད་པ་ལྟར། ང་ཚོས་རྒྱལ་སྤྱིའི་སྤྱི་ཚོགས་ལ་ཡང་བསྐྱར་ཞུ་བ་བྱས་ཏེ། རྒྱ་ནག་གཞུང་ལ་གཤམ་གསལ་གྱི་འབོད་སྐུལ་བྱེད་དགོས་པའི་རེ་སྐུལ་ཞུ་བཞིན་ཡོད།
རྨས་སྐྱོན་ཕོག་པའི་བོད་མི་རྣམས་ལ་སྨན་བཅོས་དུས་ཐོག་ཏུ་བྱེད་དགོས་པའི་འགན་ལེན་བྱེད་དགོས་པ་མ་ཟད། བོད་མིའི་གཞི་རྩའི་ཐོབ་ཐང་ལ་ལོངས་སུ་སྤྱོད་པའི་ཆེད་དུ་ནོར་འཁྲུལ་གྱིས་བཙོན་འཇུག་བྱས་པའི་ཞི་རྒོལ་བ་ཁོང་རྣམས་འཕྲལ་དུ་ཆ་རྐྱེན་གང་ཡང་མེད་པར་གློད་བཀྲོལ་གཏོང་དགོས།
ས་གནས་མི་མང་གི་མོས་མཐུན་མེད་པ་དང་། ཁོར་ཡུག་ལ་གནོད་སྐྱོན་ཡོད་མེད་ལ་བསམ་གཞིག་མ་བྱས་པར་བོད་ནང་ཆུའི་ནུས་ཤུགས་ཀྱི་ཆུ་རགས་འཛུགས་སྐྲུན་བྱེད་རྒྱུ་དེ་འཕྲལ་དུ་མཚམས་འཇོག་དགོས་པ།
བཙན་གནོན་དང་བཙན་ཤེད་ཀྱིས་བོད་མི་མང་དག་ཅིག་རང་གི་ཕ་མེས་ཀྱི་ས་ཆ་ནས་བཙན་གྱི་གནས་སྤོ་བྱེད་བཅུག་པ། དེ་བཞིན་དཔལ་འབྱོར་ཡར་རྒྱས་ཀྱི་ལས་འཆར་ཞེས་པའི་ཆེད་དུ་ཁོང་ཚོའི་མོས་མཐུན་མེད་པར་བཙན་ཤེད་ཀྱིས་གནས་སྤོ་བྱེད་བཅུག་པ་བཅས་མཚམས་འཇོག་དགོས།
བོད་བརྒྱུད་ནང་བསྟན་དང་དགོན་སྡེ་ཁག་ཏུ་བོད་མིའི་ཆོས་ཕྱོགས་ཀྱི་བྱེད་སྒོ་སྤེལ་བའི་རང་དབང་ལ་བརྩི་བཀུར་དགོས་པ།
རྒྱ་ནག་མི་དམངས་སྤྱི་མཐུན་རྒྱལ་ཁབ་ནི་རྒྱལ་སྤྱིའི་ཆིངས་ཡིག་དང་ཆིངས་ཡིག་མང་པོ་ཞིག་ལ་མིང་རྟགས་བཀོད་པའི་རྒྱལ་ཁབ་ཅིག་ཡིན་པའི་ཆ་ནས། ངེས་པར་དུ་བོད་མི་མང་གི་ཐོབ་ཐང་དང་མངོན་འདོད་ལ་བརྩི་བཀུར་བྱེད་དགོས།
བསྒྲགས་གཏམ་ངོ་མ་ཨིན་ཡིག་ཐོག་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
