༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༢༣ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གསར་འགོད་འབྲེལ་མཐུད་ཚན་པའི་གོ་སྒྲིག་འོག་རྡ་རམ་ས་ལའི་རོ་ཡལ་ཀ་སལ་(Hotel Royal Castle) ཞེས་པའི་གསོལ་མགྲོན་ཁང་དུ་ས་གནས་རྒྱ་གར་དང་བོད་ཀྱི་གསར་འགྱུར་ལས་ཁང་ཁག་ཕན་ཚུན་འབྲེལ་ལམ་གོང་མཐོར་གཏང་རྒྱུ་དང་། བོད་དོན་དང་འབྲེལ་བའི་གནས་ཚུལ་གོ་རྟོགས་འགྲེམས་སྤེལ་ཡོང་སླད་གསར་ཁང་ཁག་གི་རྩོམ་སྒྲིག་པ་དང་། གསར་འགོད་པ་ལྷན་འཛོམས་ཀྱི་གུང་ཚིགས་འདུ་འཛོམས་ཤིག་གོ་སྒྲིག་ཞུས་ཡོད།
སྐབས་དེར་ས་གནས་རྒྱ་གར་བ་དང་བོད་མི་གསར་འགོད་པ་གྲངས་ ༦༠ ལྷག་ལྷན་ཞུགས་གནང་ཡོད་པ་དང་། འདུ་འཛོམས་ཐོག་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་གསར་ཁང་གི་རྩོམ་སྒྲིག་པ་དང་གསར་འགོད་པ་ཡོངས་ལ་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འཚམས་འདྲི་དང་སྦྲགས། ད་བར་ས་གནས་གསར་ཁང་ཁག་གིས་བོད་དོན་དང་འབྲེལ་བའི་གནས་ཚུལ་རྒྱལ་སྤྱི་རྒྱལ་ནང་དུ་འགྲེམས་སྤེལ་གནང་བར་ཐུགས་རྗེ་ལེགས་འབུལ་དང་། སླད་མར་དེ་ལུགས་མུ་མཐུད་གནང་སྐྱོང་ཡོང་བའི་རེ་སྐུལ་གནང་ཡོད། ཕྱོགས་མཚུངས་ཕྱི་དྲིལ་ལས་ཁུངས་ཀྱི་གསར་འགོད་འབྲེལ་མཐུད་པ་བསྟན་འཛིན་དཔལ་འབྱོར་ལགས་ཀྱིས་རྒྱ་གར་གྱི་གསར་འགོད་པ་རྣམས་ལ་མུ་མཐུད་བོད་དོན་སྐོར་གནས་ཚུལ་གང་མང་ཁྱབ་སྤེལ་ཡོང་བའི་འབོད་སྐུལ་ཞུས་ཡོད།
གཞན་ཡང་འདུ་འཛོམས་ཐོག་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས་དང་། དྲིལ་བསྒྲགས་དྲུང་འཕར་རྣམ་རྒྱལ་ཚེ་དབང་ལགས་ཀྱང་ལྷན་ཞུགས་གནང་ཡོད་པ་བཅས།། 
