༄༅། །ཕྱི་ལོ་ ༢༠༢༤ ཟླ་ ༣ ཚེས་ ༡༠ ཉིན་རྒྱབ་ཆུ་ཚོད་ ༢ ཐོག་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ པ་ཕ་རན་སི་རྒྱལ་ས་པེ་རི་སིའི་རང་དབང་ཐང་ནས་འགོ་འཛུགས་ཀྱི་རྒྱ་དམར་གཞུང་ཚབ་བར་བོད་རིགས་ཚོགས་པའི་གཙོ་འགན་བཞེས་ཏེ་གཞུང་འབྲེལ་མ་ཡིན་པའི་ཚོགས་པ་ཁག་ལྔའི་གོ་སྒྲིག་གནང་སོང་། 

དེ་ཡང་ཐོག་མར་པེ་རི་སིའི་རང་དབང་ཐང་དུ་ལྷན་འཛོམས་ཀྱི་སྐུ་མགྲོན་གཙོ་བོ་མཆོག ཡུ་རོབ་བོད་མི་མང་སྤྱི་འཐུས་ཐུབ་བསྟན་རྒྱ་མཚོ་ལགས། གཞན་བོད་དོན་རྒྱབ་སྐྱོར་ཚོགས་པའི་སྐུ་ཚབ། མི་མང་ཁྱོན་སུམ་སྟོང་ཙམ་ལྷན་འཛོམས་ཀྱི་དུས་དྲན་མཛད་སྒོའི་ཐོག་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས་ནས་དུས་དྲན་ངོ་སྤྲོད་དང་། དབྱངས་སྐྱིད་ལགས་ནས་ཡུལ་སྐད་ཐོག་དུས་དྲན་ངོ་སྤྲོད་ཞུ་གནང་ཡོད།དེ་རྗེས་པེ་རི་སི་འབྲེལ་མཐུད་ལས་ཁུངས་ཀྱི་འབྲེལ་མཐུད་པས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱོང་གནང་བ་དང་། ཡུ་རོབ་བོད་མི་མང་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་བོད་མི་མང་སྤྱི་འཐུས་ཀྱི་གསུང་འཕྲིན་སྒྲོགས་སྦྱོང་གནང་རྗེས་སྐུ་མགྲོན་གཙོ་བོ་མཆོག་ནས་བོད་དོན་རྒྱབ་སྐྱོར་ཀྱི་གསུང་བཤད་གནང་རྗེས་གོམ་བགྲོད་འགོ་འཛུགས་ཀྱི་རྒྱ་མི་གཞུང་ཚབ་ཉེྃ་འགྲམ་བར་གོམ་བགྲོད་གནང་། 

མཇུག་དུ་མི་མང་ལྷན་འཛོམས་ཀྱི་སྐད་འབོད་དང་། གཞུང་ཁོངས་མ་ཡིན་པའི་ཚོགས་པ་ཁག་གི་ཚོགས་གཙོས་དུས་དྲན་དང་འབྲེལ་གསུང་བཤད་གནང་སྟེ་དུས་དྲན་གྲོལ་གནང་སོང་། 

གཞན་ཕ་རན་སིའི་ས་གནས་ཏུ་ལུང་སི་ (Toulouse) དང་། ཨ་མི་ཡ། (Amiens) སྦོག་རྡོ། (Bordeaux) ཀན། (Caen)  མར་ཛན། (Marzens) ལྭ་སྦ་སི་ཏི་སན་ཌི་ཇོ་ཨོ་ཇི། (Labastide-saint Georges) སོགས་རྫོང་དཔོན་ལས་ཁུངས་སུ་བོད་ཀྱི་རྒྱལ་དར་སྒྲེང་འཛུགས་དང་། བོད་མི་རྣམས་ཀྱིས་དུས་དྲན་སྲུང་བརྩི་ཞུ་གནང་སོང་བ་བཅས། །