༄༅། །ཕྱི་ལོ་ ༢༠༢༤ ཟླ་བ་ ༠༣ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་སྤྱི་དམངས་ཐོབ་ཐང་འཐབ་རྩོད་པ་གྲགས་ཅན་མར་ཊིན་ལུ་ཐར་ཀིང་ཇུ་ནི་ཡར་མཆོག་གི་སྲས་གཙོས་པའི་ཚོགས་པའི་ཚོགས་མི་དང་། ཨ་རིར་རྟེན་གཞི་བྱས་པའི་༸གོང་ས་ཏཱ་ལའི་བླ་མའི་བསྟི་གནས་ཁང་གི་ཚོགས་མི་ལས་བྱེད་རྣམས་དང་མཇལ་ཏེ། བོད་དོན་བདེན་པའི་འཐབ་རྩོད་དང་། བོད་མིའི་སྒྲིག་འཛུགས་སྐོར་ངོ་སྤྲོད་གནང་ཡོད།
དེ་ཡང་ཐོག་མར་མར་ཊིན་ལུ་ཐར་ཀིང་ཇུ་ནི་ཡར་གསུམ་པ་མཆོག་གིས་ཐེངས་འདིར་བཞུགས་སྒར་རྡ་རམ་ས་ལར་ཕེབས་རྒྱུའི་དམིགས་ཡུལ་དང་། ཁོང་རང་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་གཏང་རྒྱུའི་འབད་རྩོལ་གནང་འཆར་ལ་ཨ་རིར་རྟེན་གཞི་བྱས་པའི་༸གོང་ས་ཏཱ་ལའི་བླ་མའི་བསྟི་གནས་ཁང་དང་མཉམ་ལས་གནང་རྒྱུ་ཡིན་སྐོར་འགྲེལ་བརྗོད་གནང་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་བཅར་བ་རྣམས་ལ་བོད་མཐོ་སྒང་དེ་འཛམ་གླིང་གི་ཁོར་ཡུག་དང་། འཐབ་བྱུས་སོགས་ལ་གལ་འགངས་ཆེ་ཚུལ་དང་། བོད་མིའི་སྒྲིག་འཛུགས་ངོས་ནས་བོད་རྒྱ་གཉིས་ཀྱི་དཀའ་རྙོག་དེ་བཞིན་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་འཚེ་མེད་ཞི་བའི་ཐབས་ལམ་ལ་བརྟེན་ནས་སེལ་ཐབས་གནང་གི་ཡོད་པ་དང་། གལ་ཏེ་བོད་རྒྱའི་དཀའ་རྙོག་དེ་སེལ་ཐུབ་ན་ཨེ་ཤི་ཡར་ཞི་འཇགས་ཡོང་བར་ཕན་ཐོགས་ངེས་པ་གསུངས།
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་ཀྱི་ལོ་རྒྱུས་ཀྱི་འཕེལ་རིམ་སྤྱི་དང་། བྱེ་བྲག་ཏུ་བོད་རྒྱ་གཉིས་ཀྱི་ལོ་རྒྱུས་ཀྱི་འབྲེལ་ལམ་གསལ་སྟོན་ཐོག་བོད་དེ་རྒྱ་ནག་གི་མངའ་ཁོངས་ནམ་ཡང་མིན་པ་གསལ་བཤད་གནང་བ་མ་ཟད། ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། དམིགས་བསལ་བོད་མི་གྲངས་ ༡༥༧ ནས་བོད་དོན་འཐབ་རྩོད་ཆེད་རང་ལུས་མེར་སྲེག་བཏང་རིམ། རྒྱ་ནག་གཞུང་གིས་བོད་མིར་བྱ་ར་སོ་ཉུལ་གྱི་དམ་བསྒྲགས་ཤུགས་ཆེ་བྱེད་བཞིན་པ། བོད་མིའི་ཆོས་དང་རིག་གཞུང་སྐད་ཡིག་སྦྱོང་སྤྱོད་སྤེལ་གསུམ་ལ་དམ་བསྒྲགས་བྱེད་བཞིན་པ། མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་གཅིག་ལྷག་བཙན་གྱིས་ཆབ་སྲིད་སློབ་གསོ་སྤྲོད་བཞིན་པ་སོགས་འགྲེལ་བརྗོད་ཞིབ་ཕྲ་གནང་། དེ་དང་ཆབས་ཅིག་དཔལ་ལྡན་སྲིད་སྐྱོང་མཆོག་ནས་ཕྱི་ལོ་ ༡༩༥༩ ལོར་བོད་ས་ཤོར་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་མི་ཁྲི་ཕྲག་འགའ་ཤས་བཙན་བྱོལ་དུ་ཕེབས་འབྱོར་བྱུང་རྗེས་རྒྱ་གར་དུ་མང་གཙོའི་ལམ་སྲོལ་ཅན་གྱི་གཞུང་སླར་འཛུགས་གནང་སྟེ། རིམ་བཞིན་མང་གཙོའི་ཆ་ལག་ཡོངས་སུ་ཚང་མའི་སྒྲིག་འཛུགས་ཤིག་ཏུ་གྲུབ་རིམ་ངོ་སྤྲོད་དང་འབྲེལ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་དང་རང་དབང་ཅན་གྱི་སྡེ་ཁག་བཅས་ཀྱི་ལས་དོན་གནང་ཕྱོགས་སོགས་ངོ་སྤྲོད་གནང་རྗེས་ཚོགས་བཅར་བ་ཁག་ཅིག་གི་དོགས་དྲིར་ལན་འདེབས་གསལ་བཤད་གནང་ཡོད་པ་བཅས།།
