༄༅། །ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་ལམ་སྟོན་འོག་ཐའེ་སྡོད་བོད་རིགས་ཚོགས་པ་དང་། ས་གནས་གཞོན་ནུ་ཚོགས་པ་གཙོས་པའི་ཐའེ་ཝན་གསུམ་བཅུ་དུས་དྲན་ཚོགས་ཆུང་ནས་ཡོང་ལ་ཉེ་བའི་གསུམ་བཅུ་དུས་དྲན་ཐེངས་ ༦༥ པ་སྲུང་བརྩིའི་གོ་སྒྲིག་ཚ་ཚ་འུར་འུར་ངང་ཞུ་བཞིན་ཡོད་པ་རེད།
ཕྱི་ལོ་ ༢༠༢༤ ཟླ་ ༡ ཚེས་ ༢ ཉིན་རྒྱབ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་ཆོས་ཁང་དུ་སྐུ་ཚབ་དོན་གཅོད་དབུ་བཞུགས་ཐོག་དོན་གཅོད་ལས་ཁུངས་ཀྱི་ལས་བྱེད་རྣམ་པ། ཐའེ་སྡོད་བོད་རིགས་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ་དང་། ཐའེ་ཝན་གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པའི་འཐུས་མི་རྣམ་པ་བཅས་ལྷན་འཛོམས་ཐོག་གསུམ་བཅུ་དུས་དྲན་སྲུང་བརྩིའི་གོ་བསྡུར་ཚོགས་འདུ་དང་པོ་དེ་ཚོགས་ཡོད་པ་དང་། དེ་ནས་མུ་མཐུད་སྐུ་ཚབ་དོན་གཅོད་དབུ་བཞུགས་ཐོག་ཐའེ་སྡོད་བོད་རིགས་ཚོགས་པའི་ཚོགས་གཙོ་དང་རྒྱུན་ལས་རྣམ་པ་ཁེར་རྐྱང་སྐར་མ་ ༤༥ ཙམ་ལ་གྲོས་བསྡུར་ཞུས་ཡོད། 
ཕྱི་ལོ་ ༢༠༢༤ ཟླ་ ༡ ཚེས་ ༢༦ ཉིན་ཐའེ་སྡོད་བོད་རིགས་ཚོགས་པའི་ཚོགས་གཙོ་དོན་ཁང་དུ་ངོ་བཅར་ཞུས་པ་བཞིན་ཕྱི་ལོ་ ༢༠༢༤ ཟླ་ ༡ ཚེས་ ༢༨ ཉིན་ཐའེ་ཝན་སྐུ་ཚབ་དོན་གཅོད་ཀྱི་ལམ་སྟོན་འོག་དོན་གཅོད་ལས་ཁུངས་ཀྱི་དྲུང་ཆེ་ཆེད་དུ་མངགས་ནས་ཐའེ་ཝན་ཐའོ་ཡོན་ས་གནས་སུ་ཡོད་པའི་ཐའེ་སྡོད་བོད་རིགས་ཚོགས་པའི་ ཀ་ཁ་ག་ང་ སྤྱི་ཁང་དུ་ངོ་བཅར་གྱིས་ཐའེ་སྡོད་བོད་རིགས་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ་དང་། ས་གནས་གཞོན་ནུ་ཚོགས་གཙོ་བཅས་ལྷན་འཛོམས་ཐོག་སྔ་དྲོ་ཆུ་ཚོད་ ༡༠།༣༠ ནས་ཉིན་གུང་ཆུ་ཚོད་དང་པོ་ཙམ་བར་དུ་གསུམ་བཅུ་དུས་དྲན་སྲུང་བརྩིའི་གོ་བསྡུར་ཚོགས་འདུ་ཐེངས་ ༢ པ་དེ་ཚོགས་ཏེ་དུས་དྲན་གྱི་གྲ་སྒྲིག་འགན་འཁུར་ཁྱེར་ཕྱོགས་ཐད་གོ་བསྡུར་ལྷུག་པོ་ཞུས་རྗེས་མང་མོས་ཐོག་འདི་ལོའི་གསུམ་བཅུ་དུས་དྲན་ཐེངས་ ༦༥ པ་དེ་བཞིན་སྔར་རྒྱུན་བཞིན་ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་ལམ་སྟོན་འོག་ཐའེ་སྡོད་བོད་རིགས་ཚོགས་པ་དང་ས་གནས་གཞོན་ནུ་ནས་གོ་སྒྲིག་འགན་འཁུར་འཐུས་གཙང་དང་། གཞུང་ཁོངས་མིན་པའི་ཚོགས་པ་ཁག་གིས་གཞོགས་འདེགས་བྱ་རྒྱུ་གཏན་འཁེལ་ཞུས།
དེ་ནས་ཕྱི་ལོ་ ༢༠༢༤ ཟླ་ ༣ ཚེས་ ༥ ཉིན་རྒྱབ་ཆུ་ཚོད་ ༢།༠༠ ནས་ ༤།༠༠ བར་དུ་གསུམ་བཅུ་དུས་དྲན་གོ་སྒྲིག་ཚོགས་ཆུང་གི་ཚོགས་འདུ་གསུམ་པ་དེ་བཞིན་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་ཆོས་ཁང་དུ་ཚོགས་ཏེ་ལས་འགུལ་གྱི་འཕྲེད་དར་དང་། གསུང་བཤད་གནང་མཁན། གསར་འགོད་ལྷན་ཚོགས་བསྐོང་ཕྱོགས། གོམ་བགྲོད་སྐབས་སུ་དོ་སྣང་དགོས་པའི་དོན་གནད་ཁག་ཅིག་སོགས་ཞིབ་ཅིང་ཕྲ་བ་གོ་བསྡུར་ཐག་གཅོད་ཞུས་ཡོད་པ་བཅས། །
