༄༅། །ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་། ཉི་འོང་བོད་ཁང་གི་ལས་བྱེད་ལྕམ་ཧ་སི་གྷ་བ་ལགས་གཉིས་ཉི་འོང་རྒྱ་གྲམ་དམར་པོའི་ལས་ཁུངས་སུ་ཆེད་ཕེབས་ཀྱིས་ཉེ་ལམ་ཉི་འོང་ནུབ་བྱང་ནོ་ཊོ་ཉེ་བའི་གླིང་ཕྲན་དུ་ས་འགུལ་གྱི་གོད་ཆག་བྱུང་བར་ཀྲོག་ཡོ་དང་། ཉེ་འཁོར་ས་གནས་ཀྱི་བོད་མི་རྣམས་ནས་གནོད་སྐྱོན་འཕོག་མཁན་རྣམས་ལ་གདུང་སེམས་མཉམ་སྐྱེ་དང་ངལ་སེལ་སྐྱོབ་གསོའི་ཆེད་ཕུལ་བའི་ཞལ་འདེབས་ཉི་སྒོར་ཁྱོན་ ༢༢༨༠༠༠ རྩིས་འབུལ་ཞུས་ཡོད་པ་རེད།
སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ས་གནས་སུ་བོད་མི་ཉུང་ངུ་ལས་མེད་ནའང་། བོད་མི་རྣམས་ནས་ཉི་འོང་མི་མང་ལ་དཀའ་ངལ་འཕྲད་པའི་སྐབས་ཐུགས་སྨོན་དང་ཞལ་འདེབས་ཕྲན་བུ་བརྒྱུད་གདུང་སེམས་མཉམ་སྐྱེ་ཞུ་གི་ཡོད་ཅེས་གསུངས་རྗེས་ཉི་འོང་རྒྱ་གྲམ་དམར་པོའི་ལས་བྱེད་མཊ་སུ་ཊ་ཤི་གོ་ལགས་དང་། ན་ཀ་མུ་ར་ཡུ་ཇི་ལགས་གཉིས་ཀྱིས་བོད་མི་རྣམས་ནས་ངལ་སེལ་སྐྱོབ་གསོ་གནང་བར་ཐུགས་རྗེ་ཆེ་ཞུས་པ་མ་ཟད། ཞལ་འདེབས་ཇི་བྱུང་གནོད་སྐྱོན་འཕོག་ཡུལ་ས་གནས་སུ་གང་མྱུར་གཏང་རྒྱུའི་ཞལ་བཞེས་གནང་བའི་ཐོག ས་གནས་ཀྱི་གནས་སྟངས་དང་ངལ་སེལ་སྐྱོབ་གསོའི་ལས་གཞིའི་སྐོར་འགྲེལ་བརྗོད་གནང་ཡོད་པ་རེད།
སྤྱིར་ཕྱི་ལོ་ ༢༠༢༤ ཟླ་བ་ ༠༡ ཚེས་ ༠༡ ཉིན་རྒྱབ་ཉི་འོང་ནུབ་བྱང་ས་གནས་ནོ་ཊོ་ཉེ་བའི་གླིང་ཕྲན་དུ་ས་འགུལ་ཚད་གཞི་ ༧་༦ ཅན་ཞིག་བརྒྱབ་སྟེ་མི་མང་ ༢༤༠ ལྷག་གི་ཚེ་སྲོག་ཤོར་ཞིང་། མི་མང་མང་པོའི་ཁང་ཁྱིམ་ཐོར་ཞིག་ཏུ་སོང་ཡོད་པ་དང་། དེ་རྗེས་ཉི་འོང་སྲིད་གཞུང་དང་ས་གནས་མི་མང་ནས་ངལ་སེལ་བསྐྱར་གསོ་གང་ཐུབ་ཞུ་མུས་ཡིན། དེ་སྔོན་ས་གནས་བོད་མི་རྣམས་ནས་ཀྱང་ས་འགུལ་གྱི་གོད་ཆག་བྱུང་རྗེས་འདས་གསོན་རྣམས་ཀྱི་ཆེད་ཐུགས་སྨོན་ཞལ་འདོན་གསུང་འདོན་གནང་ཡོད་པ་བཅས།། 
