༄༅། །ཕྱི་ལོ་ ༢༠༢༤ ཟླ་ ༠༣ ཚེས་ ༠༩ ཉིན་རྒྱལ་སྤྱིའི་བུད་མེད་ཉིན་མོ་སྲུང་བརྩི་ཞུས་ཡོད་པ་དང་། སྐབས་དེར་བུད་མེད་གཙོས་པའི་རྒྱབ་སྐྱོར་བ་མང་དག་ཅིག་མཉམ་ཞུགས་གནང་བ་མ་ཟད། དམིགས་བསལ་འགྲོ་བ་མིའི་ཐོབ་ཐང་མེད་སའི་ཁུལ་གྱི་བུད་མེད་རྣམས་མཉམ་ཞུགས་གནང་ཡོད།

དེ་ཡང་ཉི་འོང་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་གོ་སྒྲིག་ཚོགས་ཆུང་ནས་མགྲོན་འབོད་དང་། གཏམ་བཤད་ཀྱི་གོ་སྐབས་གནང་བར་ཐུགས་རྗེ་ཆེ་ཞུས་ཡོད། ཁོང་གིས་བུད་མེད་ཐོབ་ཐང་ཆེད་སྐུ་ལས་བསྐྱོན་མཁན་རྣམས་ལ་དགའ་བསུ་དང་བསྔགས་བརྗོད་ཞུས་པ་དང་སྦྲགས། རྒྱ་གཞུང་གི་སྲིད་བྱུས་འོག་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་སྐོར་དང་། བོད་ཕྲུག་སྟོང་ཕྲག་མང་པོ་རང་གི་ཕ་མ་དང་ཁ་བྲལ་བཅུག་སྟེ་གཏན་འཇགས་སློབ་གྲྭ་ཁག་ཏུ་བཙན་དབང་གིས་གཏོང་བཞིན་པའི་སྐོར་སོགས་མང་ཚོགས་ལ་འགྲེལ་བརྗོད་གནང་ཡོད། དེ་རྗེས་མ་ཡན་མར་དང་། ཀམ་བྷོ་ཌི་ཡ། ཨི་རཱན། ཡུཀ་རེན། བེ་ལ་རུ་སི། ཡུ་གུར། ལྷོ་སོག ཧོང་ཀོང་། ཐའེ་ཝན་བཅས་ཀྱི་སྐུ་ཚབ་རྣམས་ནས་རང་ཡུལ་དུ་རྒྱ་ནག་སྲིད་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་ཁྲིམས་འགལ་གྱི་བྱ་སྤྱོད་སྐོར་གསུངས།

གཏམ་བཤད་ཀྱི་ལས་རིམ་གྲུབ་མཚམས་མཉམ་ཞུགས་པ་རྣམས་ནས་རྒྱལ་དར་སྦྲེངས་ཏེ་ཧ་ན་ཀ་ཊ་དོ་ར་བ་ནས་ཨ་ས་ཀུ་སའི་སེན་སོ་ཇི་དགོན་པ་ནར་ཞི་བའི་གོམས་བགྲོད་གནང་ཡོད་པ་བཅས།།