༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་ ༣ ཚེས་ ༢༠ ཉིན་གངས་སྐྱིད་དུ་རྟེན་གཞི་བྱས་པའི་གནས་ཆུང་རྡོ་རྗེ་སྒྲ་དབྱངས་གླིང་ནས་སྐབས་དྲུག་པ་དང་བདུན་པའི་བསླབ་པ་མཐར་སོན་པའི་གཟེངས་བསྟོད་མཛད་སྒོ་འཚོགས་ཡོད།
དེ་ཉིན་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་དང་། གནས་ཆུང་སྐུ་རྟེན་མཆོག མཆོག་སྤྲུལ་རིན་པོ་ཆེ། གཞན་ཡང་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཆོས་རིག་དྲུང་འཕར་དང་། རིགས་ལམ་སློབ་གཉེར་ཁང་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་མ་ལག་གཉིས་ཀྱི་འགན་འཛིན་བཅས་ཕེབས་ཡོད།
མཛད་སྒོའི་ཐོག་མར་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་སྣང་གསལ་མར་མེ་ཞལ་ཕྱེ་གནང་གྲུབ་རྗེས་གནས་ཆུང་སྐུ་རྟེན་མཆོག་ནས་༸སྐྱབས་རྗེ་ཟམ་གདོང་རིན་པོ་ཆེ་མཆོག་ལ་མཎྜལ་རྟེན་དོད་ཕུལ་བ་དང་། དབུ་མཛད་ནས་སྐྱབས་སེམས་དང་པཎ་གྲུབ་བསྟོད་ཆེན་གསུང་སྐུལ་གནང་། དེ་ནས་གྲྭ་ཚང་གི་ཤེས་ཡོན་འགན་འཛིན་ནས་ཤེས་ཡོན་དང་འབྲེལ་བའི་ལས་བསྡོམས་སྙན་སྒྲོན་གནང་སོང་། དེ་ནས་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་ནས་སློབ་ཐོན་པ་རྣམས་ལ་ཕྱག་འཁྱེར་དང་གཟེངས་བསྟོད་སྩལ། དེ་རྗེས་གནས་ཆུང་སྐུ་རྟེན་མཆོག་ནས་སྔ་ལོའི་གཞུང་ཆེན་སློབ་གཉེར་བ་ཨང་རིམ་སོན་པ་ཁག་ལ་གཟེངས་བསྟོད་བྱ་དགའ་དང་། ཆོས་རིག་དྲུང་འཕར་ནས་སྔ་ལོའི་རིག་གནས་འཛིན་གྲྭའི་ཨང་རིམ་སོན་པ་ཁག་ལ་གཟེངས་བསྟོད་བྱ་དགའ་གནང་། 
དེ་རྗེས་སྐུ་མགྲོན་གཙོ་བོ་བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་ནས་༼བསླབ་པ་མཐར་སོན་པའི་རྗེས་བསྟན་པའི་ཞབས་འདེགས་ཇི་ལྟར་ཞུ་དགོས་༽ཐོག་བཀའ་སློབ་ལམ་སྟོན་སྩལ་དོན། བསླབ་པ་མཐར་སོན་པའི་རྗེས་ལ་བསྟན་པའི་ཞབས་འདེགས་ཞུ་བའི་ཚུལ་གང་འདྲ་དགོས་པ་དེ་ངས་གསར་པ་ཞུ་རྒྱུ་ཆགས་ཀྱི་ཡོད་མ་རེད། དེ་ཡང་གཞུང་ལུགས་ནང་ལ་གཏན་འཁེལ་བ་ཞིག་རེད། བསྟན་པའི་ཞབས་འདེགས་ཞེས་པ་དེ། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །ཞེས་བསྟན་པའི་བྱ་བ་སྒྲུབ་སྟངས་དེ་ཐོས་བསམ་གྱི་སྒོ་ནས་སློབ་སྦྱོང་བྱེད་རྒྱུ་དང་། སྒོམ་པའི་སྒོ་ནས་ཉམས་སུ་ལེན་རྒྱུའམ་སྒྲུབ་པར་བྱེད་རྒྱུ་དེ་གཉིས་ལས་གཞན་པའི་བསྟན་པའི་བྱ་བ་བྱེད་སྟངས་གཞན་པ་ཞིག་མེད་པ། དེ་གཉིས་གཙོ་བོ་རེད་ཅེས་མ་གསུངས་པར། སྒྲུབ་པར་བྱེད་པ་ཁོ་ན་ཡིན་ཞེས་པའི་ཁོ་ན་ཞེས་པའི་ཚིག་དེ་གཞན་ལྡན་རྣམ་གཅོད་ཀྱི་ཚིག་རེད་པ། དེ་ལས་གཞན་པའི་ཐབས་ལམ་གཞན་གང་ཡང་ཡོད་མ་རེད་ཟེར། དེ་འདྲ་ཡིན་དུས་བསླབ་པ་མཐར་སོན་པ་ཞེས་པ་དེ་སློབ་ཚན་དང་འཛིན་གྲྭ་ངེས་ཅན་ཞིག་བརྒྱུད་ནས་ལོ་རེ་ལོ་རེ་སློབ་སྦྱོང་བྱས་ནས་ཚད་གཞི་ཡོད་པའི་གཞུང་ཆེན་བཀའ་པོད་ལྔ་ཡིན་ན་འདྲ། གཞུང་ཆེན་བཅུ་གསུམ་ཡིན་ན་འདྲ། གཞུང་ཆེན་བཅོ་བརྒྱད་ཡིན་ན་འདྲ། ཐོག་མ་ནས་བསླབ་གཞི་ལ་གཏན་འཁེལ་བའི་གཞུང་དེ་དག་མཐར་ཕྱིན་པའི་སྐབས་ལ་བསླབ་པ་མཐར་སོན་པ་དང་དགེ་བཤེས་ཐོན་པ་ཞེས་མིང་བཏགས་ཐོན་པ་ཞེས་སྔ་མ་ནས་རྒྱ་གར་ལ་བྱུང་བ་རེད་ལ། བོད་ལའང་བྱུང་བ་རེད། དེ་ཡང་ཕྱིའི་ངག་གི་རང་བཞིན་ལ་བརྟེན་པའམ་གཞུང་ལུགས་ལ་བརྟེན་པའི་ཐོས་བསམ་བྱ་བའི་རིམ་པ་དེ་ཚད་གཞི་བཟོ་རྒྱུ་ཡོད་པ་མ་གཏོགས། རང་གི་རྒྱུད་ལ་སྦྱར་ནས་ཐོས་བསམ་སྒོམ་གསུམ་བྱ་བའི་རིམ་པ་དེ་སངས་རྒྱས་ཀྱི་གོ་འཕང་མ་འཐོབ་བར་དུ་མུ་མཐུད་ནས་འགྲོ་དགོས་པ་དང་། དེ་རྒྱུན་མཐུད་པ་དེ་ག་རང་བསྟན་པའི་བྱ་བ་དང་བསྟན་པའི་ཞབས་འདེགས་ཡིན་པ་བཤད་མི་དགོས་པ་ཞིག་ཆགས་བསྡད་ཡོད། ཅེས་དང་།
དེ་བཞིན་༸སྐྱབས་རྗེ་ཟམ་གདོང་རིན་པོ་ཆེ་མཆོག་ནས། ད་ལྟ་ཐོན་པའི་རྒྱུགས་སྤྲོད་དེ་ཚོ་རྒྱུགས་སྤྲོད་ཀྱི་སྦྱོང་བརྡར་ལྟ་བུ་རེད། མི་ཚེའི་རྒྱུགས་སྤྲོད་ད་ལྟ་གཞི་ནས་བསྡད་ཡོད། མི་ཚེའི་རྒྱུགས་སྤྲོད་དེ་དྲི་བ་དྲིས་ལན་དང་། རྩོད་རྒྱུགས། ངག་རྒྱུགས་ཐོག་ནས་སྤྲད་རྒྱུ་མེད་པ་མི་ཚེ་བསྐྱལ་ནས་རྒྱུགས་སྤྲད་དགོས་ཀྱི་ཡོད་རེད། མི་ཚེའི་རྒྱུགས་སྤྲོད་ནང་ལ་རྒྱུགས་མ་ཐོན་པར་ལྷག་པ་ཡིན་ན་ཞེ་དྲག་ཐབས་སྐྱོ་པོ་རེད། བྱས་ཙང་མི་ཚེའི་རྒྱུགས་སྤྲོད་ནང་ལ་རྒྱུགས་འཕྲོད་པར་རང་རང་སོ་སོས་ཐོས་བསམ་སྒོམ་གསུམ་ཡ་མ་བྲལ་བ་དང་། རིགས་པའི་ལམ་ནས་དྲངས་པའི་རྣམ་དཔྱོད་ཀྱི་ཤེས་རབ་དེ་ག་དུས་ཡིན་ནའང་རྨོངས་དད་ཀྱི་རྗེས་སུ་མ་འགྲོ་བར་རིགས་པའི་རྗེས་སུ་འགྲོ་དགོས་པ་གལ་ཆེན་པོ་ཆགས་ཀྱི་ཡོད་རེད། ཅེས་སོགས་ཀྱི་བཀའ་སློབ་ལམ་སྟོན་སྩལ།
མཐའ་མ་གྲྭ་ཚང་གི་འཛིན་སྐྱོང་འགན་འཛིན་མཆོག་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།། །།
