༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རི་སྐུ་ཚབ་དོན་གཅོད་ཁང་གི་ཁྱབ་ཁོངས་མལ་སི་ཆུ་སི་ (Massachusetts) བོད་རིགས་སྤྱི་མཐུན་ཚོགས་པས་དོན་གཅོད་ལས་ཁུངས་སུ་གནས་ཚུལ་ཕུལ་བར་གཞིགས་ན།  ཉིན་ཤས་སྔོན་ས་གནས་བོད་རིགས་སྤྱི་མཐུན་ཚོགས་པའི་སྐུ་ཚབ་དང་།  ལྷོ་བྱང་ཨ་རིའི་སྤྱི་འཐུས་དོན་གྲུབ་ཚེ་རིང་ལགས་ནས་གྲོས་ཚོགས་གོང་མའི་འཐུས་མི་ཨིཌ་ཝར་ཌི་མར་ཀེ་ (Edward Markey (D-MA) དང་།  གྲོས་ཚོགས་གོང་མའི་འཐུས་མི་ཨེ་ལི་ཛེ་བྷེ་ཐི་ཝར་རེན་ (Senator Elizabeth Warren (D-MA) རྣམ་གཉིས་ཀྱི་འབྲེལ་ཡོད་ལས་བྱེད་ངོ་མཇལ་ཞུས་ཏེ་བོད་དོན་ཞུ་སྐུལ་གནང་འདུགས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚུལ་ཁྲིམས་ཀུན་བཟང་ལགས་ནས་འདི་གར་གནས་ཚུལ་ངོ་སྤྲོད་གནང་སྐབས། “ང་ཚོས་ང་ཚོའི་ས་གནས་ཀྱི་གྲོས་ཚོགས་གོང་མའི་འཐུས་མི་རྣམ་གཉིས་ཀྱི་འབྲེལ་ཡོད་ལས་བྱེད་ལ།  གྲོས་ཚོགས་གོང་མའི་ནང་འགྲོ་བཞིན་པའི་ཁྲིམས་འཆར་ཨང་ S.138 སྟེ། བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་རྒྱབ་སྐྱོར་ཡོང་བའི་འབོད་སྐུལ་ཤུགས་ཆེ་ཞུས་པ་མ་ཟད།  ད་དུང་བོད་ཤར་ཕྱོགས་ཁམས་སྡེ་དགེ་ཁུལ་དུ་རྒྱ་ནག་གཞུང་གིས་ཆུ་མཛོད་གསར་རྒྱག་བྱེད་པའི་ལས་གཞིར་སྐྱོན་བརྗོད་དང་།  ཆུ་མཛོད་ལས་གཞི་མཚམས་འཇོག་ཡོང་ཆེད་ཞི་བའི་ངོ་རྒོལ་བྱས་པའི་རྐྱེན་གྱིས་འཛིན་བཟུང་བཀག་ཉར་འོག་ཚུད་པའི་བོད་མི་རྣམས་འཕྲལ་དུ་གློད་འགྲོལ་དགོས་པའི་གསལ་བསྒྲགས་སྤེལ་གནང་ཡོང་བའི་འབོད་སྐུལ་ཡང་ཞུས་པ་ཡིན།

དེ་ནི་ང་ཚོས་གྲོས་ཚོགས་གོང་མའི་གནད་ཡོད་འཐུས་མི་ཨིཌ་ཝར་ཌི་མར་ཀེ་ (Edward Markey) ལགས་དང་། ཨེ་ལི་ཛེ་བྷེ་ཐི་ཝར་རེན་ (Elizabeth Warren) ལགས་གཉིས་ཀྱི་ལས་བྱེད་མཇལ་དགོས་དོན་གཙོ་བོ་དེ་ཡིན། “ ཅེས་གསུང་གི་འདུག ཐེངས་འདིའི་ཞུ་སྐུལ་ནི།  བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༥ པ་སླེབས་ལ་ཉེ་བའི་སྐབས་དང་།  བོད་ཀྱི་ཁམས་སྡེ་དགེ་ཁུལ་གྱི་གནས་སྟངས་ཛ་དྲག་ཡིན་པའི་སྐབས་སུ་སྤེལ་བའི་ཁ་ཚ་དགོས་གཏུགས་ཀྱི་བོད་དོན་ཞུ་སྐུལ་ལས་འགུལ་ཞིག་ཆགས་ཡོད་པ་རེད།།