༄༅། །ཕྱི་ལོ་ ༢༠༢༤ ཟླ་ ༠༢ ཚེས་ ༢༥ ཉིན་སྦེལ་ཇམ་སྐུ་ཚབ་དོན་ཁང་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་གོ་སྒྲིག་གནང་བའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དགུ་པ་ལེགས་པར་མཇུག་སྒྲིལ་ཡོད།
དེ་ཡང་མཇུག་བསྡོམས་མཛད་སྒོའི་ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཕ་རན་སི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་གྲོས་ཚོགས་གོང་མའི་ཚོགས་མི་ལྕམ་སྐུ་ཇེ་ཁེ་ལེ
དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་ཀྱི་རིག་གཞུང་མི་ཉམས་གོང་འཕེལ་ཆེད་རྒྱལ་སྤྱིའི་སྟེང་བོད་དོན་གླེང་སློང་དགོས་གལ་ཆེ་བ་དང་། བོད་མིའི་དཀའ་ངལ་སེལ་ཆེད་བོད་དོན་ཞུ་གཏུག་པ་དང་རྒྱབ་སྐྱོར་ཚོགས་པའི་ལས་འགན་སྐོར་གསུངས། དེ་བཞིན་བོད་རྒྱའི་དཀའ་རྙོག་ནི་རྒྱལ་སྤྱིའི་དཀའ་རྙོག་ཞིག་ཆགས་ཡོད་སྟབས། མི་མང་ནས་སྔར་ལྷག་རྒྱབ་སྐྱོར་གནང་རྒྱུའི་རེ་སྐུལ་ཞུས་ཡོད།
དེ་མཚུངས་མ་འོངས་པར་ཉི་འོང་དུ་རྒྱལ་སྤྱིའི་གྲོས་ཚོགས་ཚོགས་ཆེན་ཐེངས་དགུ་པ་ཚོགས་གཏན་ཁེལ་ཡོད་སྐོར་དང་། ཐེངས་འདིའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྱི་ཚོགས་བཅར་བ་ཡོངས་ནས་རྒྱབ་སྐྱོར་དང་མཉམ་ཞུགས་གནང་རྒྱུའི་འབོད་སྐུལ་ཞུས་ཡོད།
དེ་རྗེས་ཕ་རན་སི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་། གྲོས་ཚོགས་གོང་མའི་ཚོགས་མི་ལྕམ་སྐུ་བྷི་རི་ནོའོ་མཆོག་གིས་མཇུག་བསྡོམས་གསུང་བཤད་དུ་རྒྱ་ནག་གཞུང་གིས་བོད་ཀྱི་ཆོས་དང་། སྐད་ཡིག རིག་གཞུང་བཅས་རྡོག་རོལ་གཏོང་བཞིན་པའི་གནས་སྟངས་ངོ་སྤྲོད་གནང་བ་མ་ཟད། བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཏང་ནས་བོད་ཀྱི་སྐད་ཡིག་དང་རིག་གཞུང་རྩ་མེད་གཏོང་རྒྱུའི་སྲིད་བྱུས་སྐོར་ཡང་འགྲེལ་བརྗོད་གནང་ཡོད།
དེ་བཞིན་རྒྱ་ནག་གཞུང་ནས་བོད་ཀྱི་ངོ་བོ་དང་། རང་འབྱུང་ཁོར་ཡུག་གཏོར་བཤིག་གཏོང་བཞིན་པ་ནི་ནུབ་ཕྱོགས་རྒྱལ་ཁབ་ཁག་ནས་སེམས་འཁུར་བྱེད་དགོས་པའི་གནས་སྟངས་ཡིན་སྟབས། ཆབ་སྲིད་ཀྱི་ལྟེ་གནས་ཁང་དང་། གཞུང་ཁོངས་མ་ཡིན་པའི་ཚོགས་པ། གནས་ཡོད་མི་སྣ་བཅས་ཀྱིས་རྒྱ་ནག་དང་དཔལ་འབྱོར་གྱི་ཆབ་སྲིད་ལ་མ་ལྟོས་པར་བོད་དོན་སྐོར་གླེང་སློང་གནང་དགོས་པའི་འབོད་སྐུལ་ཞུས།
དེ་མཚུངས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཐེངས་འདིའི་རྒྱའ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྱི་གལ་གནད་སྐོར་དང་། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་དགོངས་པ་ལ་བརྟེན་ནས་གྲུབ་འབྲས་བྱུང་ཡོད་སྐོར་གསུངས།
དེ་བཞིན་ཚོགས་ཆེན་འདིར་མཉམ་ཞུགས་གནང་མཁན་རྣམས་ཀྱི་རྒྱབ་སྐྱོར་ལ་བརྟེན་ནས་རྒྱལ་སྤྱིའི་སྟེང་བོད་མངོན་རྒྱུ་ཡོད་སྐོར་དང་། དེ་དག་རྐྱེན་པས་རྒྱལ་སྤྱིའི་ཚོགས་པ་ཁག་གིས་གྲོས་ཚོགས་དང་། ཞི་བའི་ངོ་རྒོལ། གནད་ཡོད་མི་སྣ་དང་ཐུག་འཕྲད། གསར་འགྱུར་བརྒྱུད་ལམ་སོགས་ཀྱི་སྒོ་ནས་རྒྱ་ནག་གཞུང་ལ་གནོན་ཤུགས་གཏོང་བཞིན་ཡོད་སྐོར་འགྲེལ་བརྗོད་གནང་ཡོད་པ་མ་ཟད། བོད་དོན་རྒྱབ་སྐྱོར་ཚོགས་པ་ཁག་དང་། བོད་མིའི་སྒྲིག་འཛུགས་ཀྱི་མཉམ་ལས་ཀྱིས་བོད་དེ་རྒྱལ་སྤྱིའི་སྡིངས་ཆའི་སྟེང་གླེང་ཐུབ་ཡོད་སྐོར་བཅས་སོགས་གསུངས་ཡོད།
དེ་ནས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་མཉམ་ལས་དགོས་གལ་དང་། ཡུན་རིང་ནས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། བོད་དོན་འཐབ་རྩོད་ནི་ང་ཚོའི་འཐབ་རྩོད་ཁོ་ན་མ་ཡིན་པར། མ་འོངས་པའི་གཞོན་སྐྱེས་རྣམས་ལ་ལས་འགན་འདི་མདུན་བསྐྱོད་བྱེད་རྒྱུའི་ལས་འགན་ཡོད་སྐོར་གསུངས།
དེ་བཞིན་ཕྱི་ལོ་ ༢༠༢༡ ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་དབུ་ཁྲིད་འོག་བོད་མིའི་སྒྲིག་འཛུགས་ཀྱིས་འཛམ་གླིང་ཡུལ་གྲུ་ཁག་གི་གཞོན་སྐྱེས་རྣམས་བོད་དོན་ཞུ་གཏུག་ཐོག་ངོ་སྤྲོད་དང་། ལས་འགུལ་སྤེལ་ཆེད་དང་བླངས་བོད་དོན་ཞུ་གཏུག་ལས་འགུལ་དབུ་འཛུགས་གནང་ཡོད། སྐབས་འབབ་དང་བླངས་བོད་དོན་ཞུ་གཏུག་ལས་འགུལ་ནང་འཛམ་གླིང་གི་རྒྱལ་ཁབ་ ༡༨ ནས་ཚོགས་མི་ ༥༢༡ ཡོད་པ་དང་། ལས་འགུལ་འདིའི་ནང་གཞོན་སྐྱེས་དེ་ལས་ལྷག་མཉམ་ཞུགས་གནང་རྒྱུའི་ཐོག་འབད་བརྩོན་བྱེད་མུས་ཡིན་སྐོར་གསུངས། དང་བླངས་བོད་དོན་ཞུ་གཏུག་ལས་འགུལ་གྱི་གཞོན་སྐྱེས་རྣམས་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ལྷན་ཕྱག་ལས་གནང་རྒྱུའི་རེ་བ་ཡོད་བཅས་གསུངས་ཡོད་བཅས།།
