༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༠ དང་ ༡༡ ཉིན་ཉི་འོང་དུ་ཡོད་པའི་བོད་མི་རྣམས་ནས་ཉི་འོང་གི་གྲོགས་པོ་དང་བོད་དོན་རྒྱབ་སྐྱོར་བ་ཚོ་དང་ལྷན་བོད་ཀྱི་ལོ་གསར་གྱི་དགའ་སྟོན་སྲུང་བརྩི་ཞུས་ཡོད་པ་རེད།
དེ་ཡང་ཉི་འོང་བོད་རིགས་ཚོགས་པ་དང་བཀྲ་ཤིས་བདེ་ལེགས་ཟ་ཁང་གཉིས་ནས་མཛད་སྒོ་དང་བོད་ཀྱི་ཞལ་ཟས་སྣ་མང་གོ་སྒྲིག་གནང་ཡོད། སྐབས་དེར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་། ཝ་སེ་དཱ་གཙུག་ལག་སློབ་གཉེར་ཁང་གི་སློབ་དཔོན་ཨི་ཤི་ཧ་མ་ཡུ་མི་ཀོ་ལགས་རྣམ་གཉིས་ནས་བོད་ཀྱི་ལོ་གསར་སྐོར་དང་། བོད་ནང་ཇི་ལྟར་སྲུང་བརྩི་ཞུ་གསོལ་སོགས་ཀྱི་སྐོར་གསུང་བཤད་གནང་བ་དང་། སློབ་དཔོན་ཨི་ཤཱི་ཧ་མ་ལགས་ཀྱིས་པར་རིས་རྙིང་པ་རྣམས་གློག་སྟོན་བརྙན་རིས་བརྒྱུད་གཟིགས་འབུལ་གནང་ཡོད།
དེ་རྗེས་སློབ་དཔོན་ཧོ་ཤི་ནི་ཨི་ཛུ་མི་ལགས་དང་། རི་མོ་བ་ཀུ་ར་ནི་ཤི་ལགས་གཉིས་ཀྱིས་བོད་ཀྱི་གཏམ་རྒྱུད་སྐོར་དང་འབྲེལ། ཉི་འོང་གི་སྐད་དུ་བསྒྱུར་བའི་བོད་གཏམ་གསེར་རོའི་སྒྲུང་ཞེས་པའི་དཔེ་དེབ་སྐོར་ལ་གསུང་བཤད་གནང་ཡོད། 
ཉིན་གཉིས་པའི་ཐོག་བོད་མི་གཙོས་པའི་ཉི་འོང་གི་མི་མང་རྣམས་ཇོན་ཇི་དགོན་པར་ཕེབས་ཏེ་ལོ་གསར་སུང་བརྩི་ཞུས་ཡོད། སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལོ་གསར་གྱི་འཚམས་འདྲི་དང་སྦྲགས། ཉི་འོང་གི་གྲོགས་པོ་ཚོས་བོད་ཀྱི་རིག་གཞུང་ལ་དོ་སྣང་དང་། མཛད་སྒོར་མཉམ་ཞུགས་གནང་བར་ཐུགས་རྗེ་ཆེ་ཞུས་དང་། མཛད་སྒོའི་སྐབས་སྐུ་ཚབ་དོན་གཅོད་ཨརྱ་ཚེ་དབང་ལགས་ཀྱིས་བོད་ཀྱི་ལོ་གསར་ཞེས་པའི་དེབ་ཞིག་ངོ་སྤྲོད་གནང་ཡོད།
དེ་ནས་བོད་ཀྱི་ཟློས་གར་ཚོགས་པའི་འཁྲབ་སྟོན་པ་ཟུར་པ་བསྟན་འཛིན་ཀུན་བཟང་ལགས་དང་། བསྟན་འཛིན་དགེ་གཉེན་ལགས་གཉིས་ཀྱིས་གཞས་དང་ཞབས་བྲོ་གྲུབ་མཚམས། མི་མང་རྣམས་ནས་སྒོར་གཞས་འཁྲབ་ཏེ་མཛད་སྒོ་མཇུག་སྒྲིལ་ཡོད།
དེ་ཡང་མཛད་སྒོ་དེར་ཕེབས་པའི་ཉི་འོང་བ་རྣམས་ཀྱིས་ཡུན་རིང་རྗེས་སུ་བོད་མི་དང་ལྷན་དུ་ལོ་གསར་སྲུང་བརྩི་བྱས་ཐུབ་པའི་དགའ་ཚོར་ཆེན་པོ་བྱུང་ཡོད་སྐོར་དང་། བོད་ཀྱི་ཐུན་མོང་མ་ཡིན་པའི་རིག་གཞུང་ལ་བསྔགས་བརྗོད་ཞུས་ཡོད་པ་བཅས།།
