༄༅། །ཕྱི་ལོ་ ༢༠༢༤ ཟླ་ ༠༢ ཚེས་ ༠༧ ཉིན་ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་ (All-Party Parliamentary Group (APPG) for Tibet) ཀྱིས་ཨིན་ཡུལ་གྲོས་ཚོགས་སུ་བོད་ཀྱི་ལོ་གསར་གྱི་དགའ་སྟོན་གཟབ་རྒྱས་ཞིག་སུང་བརྩི་ཞུས་ཡོད་པ་རེད།

སྐབས་དེར་ཨིན་ཡུལ་གྱི་གྲོས་ཚོགས་འཐུས་མི་དང་། བོད་རིགས། རྒྱ་རིགས་དང་ཡུ་གུར་ཚུད་པའི་བོད་ལ་རྒྱབ་སྐྱོར་གནང་མཁན་བཅས་སྐུ་མགྲོན་གྲངས་བརྒྱད་ཅུ་ཙམ་ཕེབས་ཡོད། དེ་ཡང་བོད་ཀྱི་གྲོགས་པོ་ལོརཌ་ཨལ་ཊོན་ (Lord Alton) མཆོག་དང་། གྲོས་ཚོགས་འཐུས་མི་ཇིམ་ཤེ་ནོན་ (Jim Shannon) མཆོག གྲོས་ཚོགས་འཐུས་མི་ཝེ་ར་ཧོབ་ཧའོ་སི་ (Vera Hobhouse) མཆོག གྲོས་ཚོགས་འཐུས་མི་བྷེན་རོ་ཇེར་སི་ (Ben Rogers) མཆོག དེ་བཞིན་བོད་ཀྱི་ཚོགས་པ་འདྲ་མིན་གྱི་འཐུས་མི་སོགས་མཛད་སྒོ་དེར་ཕེབས་ཞུགས་གནང་ཡོད་པ་རེད།

མཛད་སྒོའི་ཐོག་མར་ APPG ཚོགས་པའི་ཚོགས་གཙོ་དང་གྲོས་ཚོགས་འཐུས་མི་ཊིམ་ལོ་ཊོན་ (Tim Loughton) མཆོག་གིས་སྐུ་མགྲོན་རྣམས་ལ་ཕེབས་བསུ་དང་སྣང་སེལ་མར་མེ་ཞལ་ཁ་འབྱེད་འཚམས། བོད་རིགས་ཚོགས་པའི་ངོས་ནས་བོད་མདོ་དབུས་ཁམས་གསུམ་གྱི་རིག་གཞུང་འཁྲབ་སྟོན་བཞི་གཟིགས་འབུལ་ཞུས་ཡོད། དེ་ནས་ཨིན་ཡུལ་གྱི་འཁྲབ་སྟོན་པ་གྲགས་ཅན་དང་འགྲོ་བ་མིའི་ཐོབ་ཐང་འཐབ་རྩོད་པ་ཊེམ་ཇོ་ཨ་ན་ལུམ་ལི་ (Dame Joanna Lumley) མཆོག་ནས་རང་གི་ཁྱིམ་ཚང་དང་བོད་དབར་གྱི་འབྲེལ་བ་དང་། རྡ་རམ་ས་ལ་དང་ལོན་ཌོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་བ་སོགས་ཀྱི་སྐོར་གསུངས་ཡོད། དེ་རྗེས་དབྱིན་ཡུལ་བོད་རིགས་ཚོགས་པའི་ཚོགས་གཙོ་དང་། བོད་རང་དབང་ལྷན་ཚོགས་དང་བོད་དོན་ཞུ་གཏུག་གི་སློབ་སྟོན་པ་བསྟན་འཛིན་ཀུན་དགའ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་རེད།

སྐབས་དེར་ཨིན་ཡུལ་སྐུ་ཚབ་དོན་ཁང་གི་དྲུང་ཆེ་བློ་ཆོས་བསམ་གཏན་ལགས་དང་། དྲུང་གཞོན་བསྟན་འཛིན་མཛེས་ལྡན་ལགས་གཉིས་ཀྱང་མཛད་སྒོ་དེར་ཕེབས་ཡོད་པ་དང་། དྲུང་ཆེ་བློ་ཆོས་བསམ་གཏན་ལགས་ཀྱིས་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ལགས་ཀྱི་ཚབ་ཞུས་ཏེ་ཚང་མར་ལོ་གསར་གྱི་འཚམས་འདྲི་ཞུས་ཡོད་པ་བཅས།།