ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་ཅེཀ་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་དང་སྲིད་ཇུས་སྡེ་ཚན་གྱི་འགན་འཛིན་ལྕམ་སྐུ་ཝེ་རོ་ནི་ཀཱ་མིཊ་ཀོ་བ་ (Veronica Mitkova) མཆོག
༄༅། །ཕྱི་ལོ ༢༠༢༤ ཟླ་ ༢ ཚེས ༦ རེས་གཟའ་མིག་དམར་ཉིན་ཅེཀ་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་དང་སྲིད་ཇུས་སྡེ་ཚན་གྱི་འགན་འཛིན་ལྕམ་སྐུ་ཝེ་རོ་ནི་ཀཱ་མིཊ་ཀོ་བ་ (Veronica Mitkova) མཆོག་ཨ་རིར་གཞུང་འབྲེལ་གཟིགས་སྐོར་དུ་ཕེབས་བསྟུན། ཝ་ཤིང་ཊོན་ཌི་སིར་ཡོད་པའི་ཅེཀ་གཞུང་ཚབ་ཁང་གིས་དམིགས་བསལ་གུང་ཟས་ཤིག་གོ་སྒྲིག་གནང་ཡོད་པ་དེར་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་། ལས་བྱེད་ཚུལ་ཁྲིམས་རྒྱ་མཚོ་ལགས་རྣམ་གཉིས་བཅར་ཡོད་པ་དང་། སྐབས་དེར་ཁུ་པ་དང་། ཝེ་ནེ་ཛུ་ལ། ཨུ་རུ་སུ། ཨི་རཱན་བཅས་ཀྱི་འགྲོ་བ་མིའི་ཐོབ་ཐང་གི་དོན་གཉེར་བ་རྣམས་ཀྱང་ཕེབས་ཞུགས་གནང་འདུག
ཨ་རིའི་སྐུ་ཚབ་དོན་གཅོད་དང་ཅེཀ་གཞུང་ཚབ་སྐུ་ཞབས་མི་ལོ་སི་ལཱབ་ (Miloslav Stasek) མཆོག
དེ་ཡང་གཞུང་ཚབ་སྐུ་ཞབས་མི་ལོ་སི་ལཱབ་ (Miloslav Stasek) མཆོག་གིས་སྐུ་མགྲོན་རྣམས་ལ་ཕེབས་བསུ་དང་སྦྲགས། ཅེཀ་སྲིད་གཞུང་གིས་འགྲོ་བ་མིའི་ཐོབ་ཐང་དང་། མང་གཙོ་གཉིས་ཕྱི་འབྲེལ་སྲིད་ཇུས་ཀྱི་གྲུབ་བྱ་གཙོ་བོ་ཞིག་ལ་ངོས་འཛིན་བྱེད་སྐོར་ནན་བརྗོད་གནང་ཡོད་པ་དང་། དེ་ནས་ལྕམ་སྐུ་མིཊ་ཀོ་ཝ་མཆོག་གིས་ཅེཀ་སྲིད་གཞུང་དང་བློ་མཐུན་རྒྱལ་ཁབ་རྣམས་མཉམ་ལས་ཀྱི་ཐོག་ནས་འཛམ་གླིང་གི་ཕྱོགས་གང་སར་དབང་ཆ་གཅིག་སྡུད་རིང་ལུགས་ཀྱི་སྲིད་གཞུང་ཁག་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བྱ་སྤྱོད་ལ་ངོ་རྒོལ་བྱེད་དགོས་པའི་གསལ་བཤད་གནང་བ་མ་ཟད། གསར་འགྱུར་བརྒྱུད་ལམ་དང་སྤྱི་ཚོགས་ནང་ཐེ་བའི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་ཚོར་ཅེཀ་སྲིད་གཞུང་གིས་རྒྱབ་སྐྱོར་བྱེད་ཀྱི་ཡོད་པའི་སྐོར་གསུངས། དེ་མིན་སྐུ་མགྲོན་རྣམས་ལ་ཅེཀ་སྲིད་གཞུང་ངོས་ནས་འཛམ་གླིང་གང་སར་འགྲོ་བ་མིའི་ཐོབ་ཐང་དང་མང་གཙོའི་ཐད་ལ་རྒྱབ་སྐྱོར་སྔར་ལས་ཤུགས་ཆེ་རུ་ཇི་ལྟར་གཏོང་ཐུབ་པའི་བསམ་ཚུལ་བསྡུ་ལེན་གནང་ཡོད།
ཅེཀ་གཞུང་ཚབ་ཁང་དུ་གུང་ཟས་ཐོག་ཕེབས་པའི་སྐུ་མགྲོན་རྣམ་པ།
དེ་དང་ཕྱོགས་མཚུངས་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཅེཀ་སྲིད་གཞུང་ནས་བོད་ཀྱི་རྩ་དོན་ལ་རྒྱབ་སྐྱོར་གནང་བ་དང་། འཛམ་གླིང་ཡུལ་གྲུ་གང་སར་དབང་ཆ་གཅིག་སྡུད་རིང་ལུགས་ཀྱི་སྲིད་གཞུང་ལ་ངོ་རྒོལ། འགྲོ་བ་མིའི་ཐོབ་ཐང་དང་མང་གཙོའི་ཐོག་རྩ་འཛིན་ལྡན་པའི་ཕྱི་འབྲེལ་སྲིད་བྱུས་འཛིན་བཞིན་པ་བཅས་ལ་རྗེས་སུ་ཡི་རང་དང་བསྔགས་བརྗོད་ཞུས་ཡོད། དེ་བཞིན་རྒྱ་དམར་གྱིས་བོད་བཙན་བཟུང་བྱས་ནས་ལོ་ངོ་བདུན་ཅུ་ལྷག་འདས་ཡོད་ཀྱང་། བོད་མི་མང་གི་བློ་སེམས་འགུག་ཐུབ་མེད་པ་དང་། རྒྱལ་སྤྱིའི་སྤྱི་ཚོགས་ཀྱིས་བོད་གཙོས་པའི་འཛམ་གླིང་གི་གཉའ་གནོན་འོག་གནས་པའི་མི་རིགས་རྣམས་ཀྱི་ཆེད་དུ་འགྲོ་བ་མིའི་ཐོབ་ཐང་དང་མང་གཙོའི་རྩ་དོན་ཐོག་ལངས་ཕྱོགས་ཤིག་འཛིན་རྒྱུ་ནི་གལ་ཆེན་ཡིན་པའི་སྐོར་སོགས་གསུངས་ཡོད་པ་བཅས།།
