༄༅། །ཕྱི་ལོ་ ༢༠༢༤ ཟླ་ ༠༢ ཚེས་ ༡༠ བོད་ཤིང་འབྲུག་ལོའི་ལོ་གསར་གྱི་དུས་སྟོན་ཐོག་ཨ་རིའི་མངའ་སྡེ་མེ་ས་ཅུ་སི་ཊི་སི་བོད་རིགས་ཚོགས་པས་ཨ་རིའི་གྲོས་ཚོགས་འཐུས་མི་བྷར་ནི་ཕ་རེང་ལགས་ཀྱིས་བོད་མི་བཙན་བྱོལ་བ་རྣམས་ཨ་རིར་གཞིས་ཆགས་པར་ཞབས་འདེགས་གལ་ཆེན་ཞིག་བསྒྲུབས་པར་ཆེས་མཐོང་གཟེངས་བསྟོད་ཀྱི་མཛད་སྒོ་ཞིག་གོ་སྒྲིག་ཞུས་ཡོད་པ་རེད། མཛད་སྒོ་འདི་ནི་གྲོས་ཚོགས་འཐུས་མི་ཕ་རེང་ལགས་ཀྱིས་རྒྱབ་སྐྱོར་གནང་བའི་ཁྲིམས་ལུགས་གཏན་འབེབས་གནང་རྗེས་རྒྱ་གར་དང་བལ་ཡུལ་ནས་ཡོང་བའི་བོད་མི་བཙན་བྱོལ་བ་སྟོང་ཕྲག་གཅིག་ཨ་རིར་གཞིས་ཆགས་ནས་ལོ་ངོ་སུམ་ཅུ་སོ་གཉིས་འཁོར་བའི་རྗེས་དྲན་གྱི་ཉིན་མོ་དེ་ཡིན།
དེ་ཡང་ཕྱི་ལོ་ ༡༩༩༠ ལོའི་ཨ་རིའི་གཞིས་སྤོས་ཁྲིམས་གཞིའི་ནང་ཚུད་པའི་བོད་རིགས་གཞིས་སྤོས་ལས་གཞི་ནི་ཨ་རིའི་གཞིས་སྤོས་སྲིད་བྱུས་ལེགས་བཅོས་བྱེད་པའི་ཁྲིམས་ལུགས་ཀྱི་སྒྲོམ་གཞི་ཆེན་པོ་ཞིག་གི་ནང་དུ་བྱུང་བའི་ལས་གཞི་གལ་ཆེན་ཞིག་རེད།
གྲོས་ཚོགས་འཐུས་མི་ཕ་རེང་ལགས་ནི་མེ་ས་ཅུ་སི་ཊི་སི་མངའ་སྡེའི་འཐུས་མི་དང་མང་གཙོ་ཚོགས་པའི་ཚོགས་མི་ཡིན་པའི་ཆ་ནས་འགྲོ་བ་མིའི་ཐོབ་ཐང་དང་སྐྱབས་བཅོལ་བ་གནས་སྤོའི་རྩ་དོན་གོང་འཕེལ་གཏོང་ཆེད་ཁྲིམས་ལུགས་ཀྱི་དོན་ཚན་གཙོ་བོ་འདི་ངོ་སྤྲོད་དང་རྒྱབ་སྐྱོར་གནང་བ་ཡིན།
དུས་སྟོན་དེར་བོད་མིའི་སྐྱབས་བཅོལ་བའི་ལས་གཞི་དང་འབྲེལ་བའི་བོད་རིགས་དང་། ཤར་པ། དང་བླངས། ཁྱིམ་བདག་བཅས་ལྷན་འཛོམས་གནང་ཡོད། སྐབས་དེར་གྲོས་ཚོགས་འཐུས་མི་བྷར་ནི་ཕ་རེང་ལགས་ཀྱིས་ལས་འཆར་དེའི་གྲུབ་འབྲས་ཐར་སོན་བྱུང་ཚུལ་དང་། ཨ་རིའི་ནང་དུ་གཞིས་སྤོའི་གནས་སྟངས་སྐོར་འགྲེལ་བརྗོད་གནང་བ་མ་ཟད། བོད་མི་བཙན་བྱོལ་བ་རྣམས་རྒྱ་ནག་གི་བཙན་གནོན་ལས་ཐར་བ་དང་ཆབས་ཅིག བོད་ཀྱི་རིག་གཞུང་བརྒྱུད་ཨ་རིར་རིག་གཞུང་གི་རྒྱབ་ལྗོངས་སྣ་མང་དུ་འགྱུར་བས་ཕན་ཚུན་གཉིས་ཕན་གྱི་ཁེ་ཕན་ཡོད་པ་གསུངས་ཡོད།
དེ་མཚུངས་ཁོང་གིས་སྣེ་མང་རང་བཞིན་དང་གཞིས་སྤོ་གཉིས་ནི་ཨ་རིའི་སྤྱི་ཚོགས་ཀྱི་རྨང་གཞི་ཡིན་པའི་སྐོར་ནན་བརྗོད་དང་། རང་གི་ཁྱིམ་རྒྱུད་ཤར་ཡུ་རོབ་ནས་གཞིས་སྤོ་བྱས་པའི་ལོ་རྒྱུས་དང་མཚུངས་ཆོས་ཀྱང་བསྟན་ཡོད་པ་རེད། ཁོང་གིས་བོད་མི་རྣམས་ནས་རང་གི་བརྩོན་པ་ལ་ངོས་འཛིན་ཐོབ་པར་བཀའ་དྲིན་ཆེ་ཞུས་དང་འབྲེལ་གསུང་བཤད་གནང་ཡོད།
དེ་ནས་ལྷོ་བྱང་ཨ་རིའི་སྤྱི་འཐུས་དོན་གྲུབ་ཚེ་རིང་ལགས་ཀྱིས་གྲོས་ཚོགས་འཐུས་མི་ཕ་རེང་ལགས་གི་ཁྲིམས་བཟོའི་མཛད་རྗེས་དང་། ཨེཊ་ཝཊ་བེཊ་ནར་ལགས་ཀྱི་དབུ་འཁྲིད། དེ་བཞིན་དང་བླངས་པ་དང་ཁྱིམ་བདག་སོགས་ཀྱི་སྙིང་རྗེ་དང་རྒྱབ་སྐྱོར་ལ་བརྟེན་ནས་བོད་རིགས་གཞིས་སྤོའི་ལས་གཞི་དངོས་སུ་ལག་བསྟར་བྱུང་ཐུབ་པར་བསྔགས་བརྗོད་དང་ཐུགས་རྗེ་ཆེ་ཞུས། དེ་བཞིན་ཁོང་གིས་བོད་རིགས་གཞིས་སྤོའི་ལས་གཞིའི་དམིགས་ཡུལ་ནི་བོད་ཀྱི་རིག་གཞུང་དང་། སྐད་ཡིག ངོ་བོ་སོགས་སྲུང་སྐྱོབ་དང་དར་སྤེལ་གཏོང་རྒྱུ་དེ་ཡིན་པར་གསུངས་ཡོད།
དེ་མཚུངས་སྤྱི་འཐུས་དོན་གྲུབ་ཚེ་རིང་ལགས་ཀྱིས་དེང་སྐབས་བོད་ནང་གི་ཛ་དྲག་གནས་སྟངས་སྐོར་དང་། རང་དབང་ཁང་གི་སྙན་ཐོའི་ནང་ལོ་གཉིས་བསྟུད་མར་བོད་ནི་འཛམ་གླིང་ནང་གི་རང་དབང་ཆེས་ཞན་པའི་ས་ཁུལ་ཞིག་ཏུ་ངོས་འཛིན་བྱས་པའི་འཇིགས་སྣང་ཆེ་བའི་གནད་དོན་རྣམས་ནན་བཤད་གནང་བ་དང་འབྲེལ། བོད་ཀྱི་ཕྲུ་གུ་རྣམས་རྒྱ་མིའི་མི་སེར་སྤེལ་ཡུལ་གྱི་གཏན་སློབ་ཁག་ཏུ་བཙན་འཇུག་བྱས་ཏེ་རིག་གཞུང་དང་སྐད་ཡིག་རྩ་བརླག་འགྲོ་ཉེན་ཆེ་བའི་སྐོར་གསལ་བཤད་གནང་ཡོད། དེ་མ་ཟད་རྒྱ་ནག་གཞུང་གིས་བོད་ཅེས་པའི་ཚབ་ཏུ་ཤི་ཙང་ཞེས་བཀོད་དེ་བོད་ཀྱི་ངོ་བོ་རྩ་མེད་གཏོང་ཐབས་གོ་རིམ་ལྡན་པ་ཞིག་བྱེད་བཞིན་པ་བཅས་ལ་སྐྱོན་བརྗོད་གནང་ཡོད་པ་རེད།
དེ་ནས་ས་གནས་བོད་རིགས་ཚོགས་པའི་ཚོགས་གཙོ་ཚུལ་ཁྲིམས་ཀུན་བཟང་ལགས་ཀྱིས་གྲོས་ཚོགས་འཐུས་མི་ཕ་རེང་ལགས་ཀྱིས་བོད་མི་ཆིག་སྟོང་ཨ་རིར་གཞིས་སྤོའི་ལས་གཞི་ལ་རྒྱབ་སྐྱོར་གནང་བར་བཀའ་དྲིན་ཆེ་ཞུས་པ་དང་སྦྲགས། ཨ་རིར་ཡོད་པའི་བོད་མིའི་འཚོ་བ་ཡར་རྒྱས་སུ་འགྲོ་བ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕུགས་རྒྱང་རིང་པོའི་ལམ་སྟོན་དང་། བོད་ཕྱི་ནང་གཉིས་ཀའི་བོད་མི་རྣམས་ཀྱི་སེམས་ཤུགས། ཨ་རིའི་སྲིད་གཞུང་དང་དབུ་ཁྲིད། སྙིང་རྗེ་ཅན་གྱི་མི་སྒེར་བཅས་ཀྱིས་རྒྱབ་སྐྱོར་གནང་བ་ལ་བརྟེན་ནས་བྱུང་བ་ཞིག་ཡིན་པར་གསུངས།
དེ་རྗེས་བོད་རིགས་གཞིས་སྤོ་ལས་གཞི་འདིའི་བརྒྱུད་ནས་ཨེམ་ཧར་སི་ཊི་ཁུལ་དུ་གཞིས་ཆགས་པའི་བོད་མི་ཐོག་མའི་གྲས་སུ་ཡིན་པའི་ཡོན་ཏན་རྒྱ་མཚོ་ལགས་ཀྱིས་རང་ཉིད་སྐྱབས་བཅོལ་བ་ཞིག་ནས་ཨ་རིའི་བོད་མི་ཞིག་ཏུ་འགྱུར་བའི་རང་གི་མི་ཚེའི་ལོ་རྒྱུས་སྐོར་གསུངས་ཡོད། ཁོང་གི་ལོ་རྒྱུས་འདིས་ཨ་རིའི་ནང་གི་བོད་པའི་སྤྱི་ཚོགས་ཀྱི་རེ་བ་དང་། ཕུགས་བསམ་མཚོན་གྱི་ཡོད་པ་རེད།
གྲོས་ཚོགས་འཐུས་མི་བྷར་ནི་ཕ་རེང་ལགས་དང་། ཨེམ་ཧར་སི་ཊི་བོད་རིགས་གཞིས་སྤོའི་ལས་གཞིའི་དང་བླངས་དང་། ཁྱིམ་བདག་བཅས་ལ་བོད་མིའི་སྒྲིག་འཛུགས་དང་། བོད་མི་མང་སྤྱི་འཐུས་ལྷན་ཚོགས་གཉིས་ནས་གཟེངས་བསྟོད་ཕྱག་ཁྱེར་ཕུལ་གྲུབ་མཚམས། མི་མང་རྣམས་ཡར་བཞེངས་ནས་ཁོང་རྣམས་ལ་དགའ་བསུ་ཞུས་ཡོད།
མཛད་སྒོ་འདི་ནི་ཨ་རིའི་ནང་དུ་བོད་མི་གཞིས་སྤོ་བྱས་པའི་ལོ་རྒྱུས་ཀྱི་ནང་དུ་གལ་འགངས་ཆེ་བའི་དུས་དྲན་ཞིག་ཡིན་པ་རེད། དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕུགས་བསམ་ལྡན་པའི་དབུ་ཁྲིད་དང་། ཨ་རིའི་གྲོས་ཚོགས་ཀྱི་རྒྱབ་སྐྱོར། གྲོས་ཚོགས་འཐུས་མི་བྷར་ནི་ཕ་རེང་ལགས་དང་ཨ་རིའི་ས་ཕྱོགས་གང་སར་གནས་པའི་མི་སྒེར་པ་མང་པོ་ཞིག་གིས་བཀའ་དྲིན་ལས་བརྟེན་ནས་གྲུབ་པ་ཞིག་ཡིན་པ་བཅས།།
