༄༅། །ཕྱི་ལོ་ ༢༠༢༤ ཟླ་བ་ ༢ ཚེས་ ༡༥ ཉིན་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་ཚད་མཐོའི་མང་མོས་ཀྱི་ཐོག་ནས་གཏན་འབེབས་གནང་ཡོད།
གྲོས་ཆོད་དེས་བོད་དང་བོད་མིའི་རྩ་དོན་ལ་ཨ་རིའི་སྲིད་དོན་ཚོགས་པ་ཕྱོགས་གཉིས་ཀའི་རྒྱབ་སྐྱོར་ཤུགས་ཆེ་ཡོད་པ་མཚོན་གྱི་ཡོད་པ་དང་། ཨ་རིའི་གཞུང་ནས་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་བམ་བོད་ཀྱི་དབུ་འཁྲིད་རྣམས་དང་ལྷན་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་བོད་རྒྱའི་དཀའ་རྙོག་སེལ་བའི་ཐད་གྲོས་མོལ་བྱེད་རྒྱུར་རྒྱབ་སྐྱོར་མཚོན་གྱི་ཡོད།
དེ་ཡང་གྲོས་ཚོགས་ནང་གྲོས་འཆར་འདི་གཏན་འབེབས་བྱས་པའི་རྗེས་སུ། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་དོན། གྲོས་ཚོགས་འཐུས་མི་ཇིམ་མེག་གྷོ་ཝན་ (Jim McGovern) མཆོག་དང་། གྲོས་ཚོགས་འཐུས་མི་མེ་ཁལ་མེ་ཀོལ་ (Michael McCaul) མཆོག་རྣམ་གཉིས་ཀྱིས་གྲོས་ཚོགས་ནང་དུ་གྲོས་འཆར་འདི་ངོ་སྤྲོད་གནང་བ་དང་། གྲོས་ཚོགས་འཐུས་མི་ཡོངས་ནས་རྒྱབ་སྐྱོར་གནང་བར་ངས་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་ཡིན། གྲུབ་འབྲས་འདི་བརྒྱུད་གྲོས་འཆར་འདི་ཁྲིམས་ལུགས་སུ་འགྱུར་བར་ཐག་ཇེ་ཉེར་འགྲོ་གི་ཡོད་པ་མ་ཟད། ད་ཆ་ང་ཚོས་གྲོས་འཆར་འདི་གྲོས་ཚོགས་གོང་མས་གཏན་འབེབས་གནང་རྒྱུར་རེ་སྒུག་བྱེད་ཀྱི་ཡོད། ཅེས་དང་། གྲུབ་འབྲས་འདི་ནི་བོད་མིའི་སྒྲིག་འཛུགས་དང་། རྒྱལ་སྤྱིའི་བོད་དོན་ལས་འགུལ་ཁང་། གཞུང་འབྲེལ་མ་ཡིན་པའི་ཚོགས་པ། དེ་བཞིན་བོད་ལ་རྒྱབ་སྐྱོར་གནང་མཁན་གྱི་ཚོགས་པ་ཁག མི་སྒེར་བཅས་མཉམ་རུབ་ཀྱིས་གྲོས་འཆར་འདི་གྲུབ་འབྲས་སོན་པ་ཞིག་མཚོན་གྱི་ཡོད།
ཁྲིམས་འཆར་འདི་གཏན་འབེབས་གནང་བ་དེས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལྟར་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་ཐབས་དེ་སྲ་བརྟན་དུ་གཏོང་རྒྱུར་ཕན་འབྲས་ཡོད་པ་བཅས།།
