༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕིན་ལེནྚ་གྱི་འོས་བསྡུ་ཆེན་མོའི་ཁྲོད་སྐུ་ཞབས་ཨེ་ལེག་ཛེན་ཊར་མཆོག་ལ་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་སྩལ་ཡོད།
དེ་ཡང་འཚམས་འཕྲིན་ནང་མགོན་པོ་མཆོག་གིས། འདས་པའི་ལོ་ངོ་འདི་དག་གི་རིང་ལ་ངོས་རང་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ཏུ་ཐེངས་འགའ་བསྐྱོད་རྒྱུའི་གོ་སྐབས་བྱུང་། སྐབས་དེར་ཕིན་ལེནྜ་གྱི་མི་དམངས་ནས་ངོས་ཀྱིས་ཆོས་ལུགས་མཐུན་སྒྲིལ་དང་། འགྲོ་བ་མི་གཅིག་གྱུར་གྱི་འདུ་ཤེས། བྱམས་སྙིང་རྗེ་གོང་འཕེལ་གཏོང་བའི་སྐོར་བཤད་པ་རྣམས་ལ་དོ་སྣང་ཆེན་པོ་གནང་བར་ངོས་ཀྱིས་རྗེས་སུ་ཡི་རང་ཞུ་བཞིན་ཡོད།
ད་ལྟ་འཛམ་གླིང་གི་ཡུལ་གྲུ་འདྲ་མིན་དུ་མི་མང་པོ་ཞིག་དྲག་སྤྱོད་འོག་སྡུག་བསྔལ་མྱོང་བཞིན་ཡོད་པ་ནི་ཡིད་སྐྱོ་དགོས་པ་ཞིག་ཡིན། ངོས་རང་དྲག་སྤྱོད་དང་མཚོན་ཆ་མེད་པའི་འཛམ་གླིང་ཞིག་སྐྲུན་པར་ཡིད་ཆེས་བྱེད་ཀྱི་ཡོད་པས་རྒྱལ་སྤྱིའི་སྤྱི་ཚོགས་ཀྱིས་གྲོས་མོལ་དང་ཕྱི་འབྲེལ་གྱི་ཐབས་ལམ་བརྒྱུད་ནས་རྩོད་རྙོག་རྣམས་སེལ་ཐབས་ལ་མཉམ་རུབ་བྱས་ཏེ། སྔར་ལས་ལྷག་པའི་ཞི་བདེ་དང་སྙིང་རྗེ་ཅན་གྱི་འཛམ་གླིང་ཞིག་སྐྲུན་པའི་ངོས་ཀྱིས་རེ་བ་ཆེན་པོ་བྱེད་ཀྱི་ཡོད།
མཐར་མགོན་པོ་མཆོག་གིས། སྐུ་ཉིད་ཀྱིས་ཕིན་ལེནྚ་མི་མང་གི་རེ་འདོད་དང་དཀའ་ངལ་རྣམས་ལ་གདོང་ལེན་གནང་ཐུབ་པའི་ཐུགས་སྨོན་མཛད་ཡོད་པ་བཅས།།
