༄༅། །འདི་གར་ཨོསྟྲེ་ལི་ཡཱའི་སྐུ་ཚབ་དོན་གཅོད་ནས་བཏང་གནས་ནང་འཁོད་དོན། བོད་ཤིང་འབྲུག་ལོའི་གནམ་ལོ་གསར་པའི་ནང་རང་ཅག་རྣམས་ཀྱི་མགོན་སྐྱབས་འཇིག་རྟེན་ཞི་བདེའི་དེད་དཔོན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། རིས་མེད་བསྟན་བདག་བླ་ཆེན་རྣམས་སྐུ་ཚེ་ཞབས་པད་བརྟན་པ། སྐུ་ཚེ་མཛད་འཕྲིན་རྒྱས་པ། འཛམ་གླིང་སྤྱི་དང་ཡང་སྒོས་ཁ་བ་གངས་ཅན་པའི་ཆོས་སྲིད་ལུགས་གཉིས་ཀྱི་དབུ་འཕངས་དགུང་དུ་འདེགས་པ་དང་། གོ་ལ་འདིར་ནད་ཡམས་དང་དམག་འཁྲུག་སོགས་བསྟུད་མར་བྱུང་དང་འབྱུང་བཞིན་པའི་སྐབས་འདིར་༧གོང་ས་རྒྱལ་བའི་དབང་པོ་མཆོག་གིས་སྤྱི་སྨན་དུ་བོད་མི་ཡོངས་ཀྱིས་རྗེ་བཙུན་འཕགས་མ་སྒྲོལ་མའི་བསྟོད་པ་དང་གཟུངས་སྔགས་གསོག་སྒྲུབ་དགོས་པའི་བཀའ་སློབ་སྤྱི་སྒེར་གཉིས་ཀར་ཡང་ཡང་ཕེབས་པའི་དགོངས་དོན་བཞིན་སིཌ་ཎི་བོད་རིགས་མཐུན་ཚོགས་ཀྱིས་ཕྱི་ལོ་ ༢༠༢༤ ཟླ་ ༠༢ ཚེས་ ༢༡ རྒྱལ་བའི་བླ་གཟའ་ལྷག་པ་དཀར་པོའི་ཉིན་སེར་སྐྱ་མི་མང་བརྒྱ་དང་ལྔ་བཅུ་ཙམ་ལྷན་འཛོམས་ཀྱིས་ཕྱི་ལོ་ ༢༠༢༤ ལོ་ཧྲིལ་པོར་སྒྲོལ་མ་འབུམ་ཐེར་གསོག་སྒྲུབ་གནང་རྒྱུ་འགོ་འཛུགས་ཞུས་ཡོད་པ་བཅས།།