༄༅། །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༠༢ ཚེས་ ༢༦ རེས་གཟའ་ཟླ་བ་ཉིན་ལྦིག་ཊོ་རི་ཡ་མངའ་སྡེའི་གྲོས་ཚོགས་ཀྱི་ཚོགས་ཁང་ནང་བོད་རིགས་སྤྱི་མཐུན་ཚོགས་པའི་གཙོ་འགན་ཐོག་བོད་དོན་ཞུ་གཏུག་ལས་འགུལ་ཁང་དང་། ལྗང་ཁུ་ཚོགས་པའི་གྲོས་ཚོགས་འཐུས་མི་ (Sam Hibbins) ལགས་ནས་བོད་ཀྱི་ལོ་གསར་དང་རིག་གཞུང་འགྲེམས་སྟོན་གྱི་མཛད་སྒོ་ཞིག་གྲོས་ཚོགས་འཐུས་མི་དང་ལྷན་དུ་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་སྐུ་མགྲོན་རྣམ་པ་དང་མི་མང་བཅས་ཚོགས་ཁང་དུ་འཛོམས་རྗེས་དགེ་འདུན་པ་རྣམས་ཀྱིས་ཞལ་འདོན་སྐར་མ་བཅུ་ཙམ་གནང་ཡོད། དེ་ནས་སྔར་སྲོལ་ལྟར་རྣམ་ཐར་འཐེན་པའི་སྒོ་ནས་བསང་གསོལ་མཚོན་ཆེད་དུ་ཕྱག་ལ་ཁ་བཏགས་བསྣམས་ནས་ལྷ་རྒྱལ་འཐེན། དེ་རྗེས་ཨོསྟྲེ་ལི་ཡའི་རྒྱལ་གླུ་དང་བོད་ཀྱི་རྒྱལ་གླུ་བཏང་རྗེས་སྐར་མ་གཅིག་རིང་རྒྱལ་གཅེས་པ་རྣམས་ལ་མྱ་ངན་གུས་འདུད་ཞུས།
དེ་རྗེས་བོད་རིགས་སྤྱི་མཐུན་ཚོགས་པའི་ཨིན་དྲུང་ཀུན་བཟང་ལགས་ཀྱིས་ཕེབས་བསུའི་གསུང་བཤད་གནང་རྗེས་བོད་དོན་ཞུ་གཏུག་ལས་འགུལ་ཁང་གི་ས་གནས་ཚོགས་གཙོ་ནོར་འཛིན་ལགས་ཀྱིས་བོད་ཀྱི་ལོ་གསར་མཚོན་པའི་རིག་གཞུང་ཁག་ངོ་སྤྲོད་གནང་རྗེས་སྐུ་མགྲོན་གཅོ་བོ་གྲོས་ཚོགས་འཐུས་མི་ (Dr. Samantha Ratnam) ལགས་ཀྱིས་བོད་ཀྱི་རིག་གཞུང་ལ་རྒྱ་ནག་གཞུང་གི་སྲིད་བྱུས་འོག་དཀའ་ངལ་ག་ཚོད་ཡོད་མེད་ཤེས་ཀྱི་ཡོད། ཡིན་ནའང་ཁྱེད་ཚོས་ལས་འགུལ་སྤེལ་སྟངས་དང་རིག་གཞུང་སྲུང་སྐྱོབ་ཐོག་ལ་དཀའ་ལས་བརྒྱབ་པ་དེ་དེ་རིང་འགྲེམས་སྟོན་འདིའི་ཐོག་ནས་ང་རང་གིས་དངོས་སུ་མཐོང་བྱུང་།
༸གོང་ས་མཆོག་གིས་བཀའ་སློབ་གནང་བ་བཞིན་སྙིང་རྗེ་ཟེར་བ་དེ་འཛམ་གླིང་གི་གཅེས་ནོར་ཆགས་པར་བརྟེན་དེ་རིང་ང་ཚོ་མཉམ་དུ་མཉམ་སྤྱོད་བྱེད་པ་མ་ཟད། འཛམ་གླིང་ལ་ཁྱབ་སྤེལ་གནང་བར་བཀའ་དྲིན་ཆེ་ཞུ་པ་དང་། དེ་རིང་ང་སླེབས་ནས་ཤེས་པ་ནི་མིའི་ནུས་པར་ཤུགས་ག་ཚོད་ཡོད་མེད་ཤེས་སོང་། ནུས་པ་དེ་ཡོད་ན་ལས་འགུལ་གང་ཞིག་སྤེལ་ན་ཡང་འགྲུབ་ཐུབ་པ་ཞིག་རེད། ཅེས་སོགས་གསུངས།
གྲོས་ཚོགས་འཐུས་མི་ (Tim Read) ལགས་ཀྱིས་བོད་ཀྱི་སྐད་ཡིག་སྲུང་སྐྱོབ་བྱེད་རྒྱུ་དེ་ཧ་ཅང་གལ་ཆེན་པོ་རེད། དཔེར་ན་ཨོསྟྲེ་ལི་ཡ་གདོད་མའི་མི་རིགས་ཀྱི་སྐད་ཡིག་རྩ་མེད་འགྲོ་བཞིན་ཡོད་མེད་དང་། དེ་བཞིན་རྒྱ་ནག་གིས་བོད་ཀྱི་སྐད་དང་རིག་གཞུང་རྩ་མེད་བཏང་དང་གཏོང་བཞིན་ཡོད་སྟབས། ང་ཚོ་དེ་དག་སྲུང་སྐྱོབ་བྱེད་རྒྱུ་གལ་ཆེན་པོ་ཡིན། ང་རང་གྲོས་ཚོགས་འཐུས་མི་ཞིག་ཡིན་པའི་ཆ་ནས་ཁྱེད་ཚོར་རྒྱབ་སྐྱོར་བྱེད་རྒྱུ་ང་ཚོའི་ལས་འགན་རེད། དུས་ཚོད་གཅིག་ལ་ཁྱེད་རང་ཚོས་སྐད་ཡིག་དང་རིག་གཞུང་གི་རིན་ཐང་དེ་མཐོང་གི་རེད་གསུངས།
དེ་ནས་བོད་རིགས་སྤྱི་མཐུན་ཚོགས་པའི་ཚོགས་གཙོ་གྲོང་ཤར་བསམ་གྲུབ་ལགས་ཀྱིས་སྐུ་མགྲོན་རྣམ་པར་ཐུགས་རྗེ་ཆེ་ཞུའི་མཇལ་དར་དང་། ༸གོང་ས་མཆོག་གི་བཀའ་སློབ་འཁོད་པའི་ཐང་ཀ་རེ་ཕུལ་ཏེ་སྐུ་མགྲོན་རྣམས་དང་ལྷན་དུ་སྐུ་པར་སྒྲོན།
དེ་ནས་བཀྲ་ཤིས་གཞོལ་པ་ནས་འགོ་འཛུགས་གནང་སྟེ་བོད་པའི་སློབ་ཕྲུག་རྣམས་ནས་བོད་པའི་རིག་གཞུང་དང་འབྲེལ་བའི་འགྲེམས་སྟོན་ལ་འགྲེལ་བཤད་གནང་རྗེས་སྐུ་མགྲོན་དང་མི་མང་རྣམས་ལ་གསོལ་ཇ་དང་ཞལ་ལག་ཕུལ་ཡོད་པ་བཅས། །
