༄༅། འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  ལྦར་མོཎ་ཊ་(Vermont) བོད་རིགས་སྤྱི་མཐུན་ཚོགས་པས་བྱང་ཨ་རི་སྐུ་ཚབ་དོན་གཅོད་ལས་ཁུངས་སུ་གནས་ཚུལ་མཁོ་སྤྲོད་གནང་བར་གཞིགས་ན།  ཨ་རིའི་ལྦར་མོཎ་ཊ་མངའ་སྡེའི་གྲོས་ཚོགས་ནས་གདན་ཞུ་གནང་བ་ལྟར་ལྦར་མོཎ་ཊ་བོད་རིགས་སྤྱི་མཐུན་ཚོགས་པས་གྲོས་ཚོགས་ཀྱི་ཁང་ཆེན་ནང་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་གནང་འདུག   

ལྦར་མོཎ་ཊ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་དབྱངས་སྐྱིད་ལགས་ཀྱིས།  ལྦར་མོཎ་ཊ་མངའ་སྡེའི་གྲོས་ཚོགས་ནས་ལོ་ལྟར་དགུན་དུས་སུ་ཞིང་པའི་དགོང་དྲོའི་རོལ་དབྱངས་འདུ་འཛོམས་ (The Farmers Night Concert Series) ཞེས་པའི་མུ་སྦྲེལ་བྱེད་སྒོ་ཞིག་གོ་སྒྲིག་གནང་གི་ཡོད་པ་དང་།  ཐེངས་འདིར་ས་གནས་བོད་རིགས་སྤྱི་མཐུན་ཚོགས་པར་རིག་གཞུང་འཁྲུབ་སྟོན་ཡོང་བའི་རེ་སྐུལ་མགྲོན་འབོད་གནང་བ་ཐེངས་དང་པོ་རེད།  ཅེས་དང་།  ཚོགས་གཙོ་ཚེ་རིང་དབྱངས་སྐྱིད་ལགས་ནས་མུ་མཐུད་གསུང་དོན་ལ།   སྤྱི་མཐུན་ཚོགས་པས་ཐེངས་འདིའི་གོ་སྐབས་བཟང་པོ་དམ་འཛིན་བྱས་ཏེ།  བོད་ཀྱི་ཐུན་མོང་མ་ཡིན་པའི་རོལ་དབྱངས་གཟིགས་འབུལ་ཞུས་པ་མ་ཟད།   རོལ་དབྱངས་གཟིགས་པར་ཕེབས་མཁན་གྲོས་ཚོགས་འཐུས་མི་དང་།  ཕྱི་རྒྱལ་སྐུ་མགྲོན་རྣམས་ལ་རྒྱ་ནག་གུང་ཁྲན་གཞུང་གི་བཙན་གནོན་འོག  བོད་ནང་གི་བོད་མི་རྣམས་ལ་དཀའ་ངལ་འཕྲད་བཞིན་པའི་ད་ལྟའི་གནས་སྟངས་དངོས་དང་།  ཐུན་མོང་མ་ཡིན་པའི་བོད་ཀྱི་རིག་གཞུང་སྐོར་གླེང་སློང་བྱེད་པའི་གོ་སྐབས་ཡག་པོ་བྱུང་སོང་།  ང་ཚོའི་ངོས་ནས་མ་འོངས་པར་ཡང་ལོ་ལྟར་འཆར་ཅན་གྱི་བྱེད་སྒོ་དེར་མཉམ་ཞུགས་ཐུབ་པའི་རེ་བ་བྱེད་ཀྱི་ཡོད།  ཅེས་འགྲེལ་བརྗོད་གནང་བྱུང་། 

རིག་གཞུང་འཁྲབ་སྟོན་ཚར་རྗེས་ཚོགས་ཁང་ནང་གི་མི་ཚང་མ་ཡར་ལངས་ནས་དགའ་བསུ་ཞུས་པ་དང་།  གྲོས་ཚོགས་འཐུས་མི་ཁ་ཤས་འཁྲབ་སྟོན་པའི་སར་ཕེབས་ནས་བསྟོད་བསྔགས་དང་སྦྲགས།  བོད་ཀྱི་རིག་གཞུང་འཁྲབ་སྟོན་བལྟས་རྗེས་ཁོང་ཚོར་སེམས་འགུལ་ཆེན་པོ་ཐེབས་ལུགས་དང་།  མ་འོངས་པར་བསྐྱར་དུ་འཁྲབ་སྟོན་བྱེད་པར་ཡོང་རྒྱུའི་རེ་བ་ཡོད།  ཅེས་གསུང་མཁན་བྱུང་འདུག  

བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ནས་ལྦར་མོཎ་ཊ་བོད་རིགས་སྤྱི་མཐུན་ཚོགས་པས་གོ་སྐབས་ལེན་ཐུབ་པར་བསྔགས་བརྗོད་དང་།  མ་འོངས་པར་སྤྱི་མཐུན་ཚོགས་པ་ཚང་མས་དེ་ལྟའི་གོ་སྐབས་དམ་འཛིན་ཐུབ་པ་བྱུང་ན།  དེ་ནི་བོད་ངོ་སྤྲོད་བྱེད་པའི་ཐབས་ལམ་གྱི་གྲས་ཤིག་རེད། ཅེས་གསུངས་ཡོད་པ་བཅས།།