༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༩ ཉིན་གྱི་ཕྱི་དྲོར་ལི་ཐུ་ནི་ཡཱའི་བོད་དོན་རྒྱབ་སྐྱོར་བ་ཚོས་བོད་ཀྱི་ལོ་གསར་ལ་དགའ་བསུ་མཚོན་བྱེད་དུ་ཝིལ་ནི་ཡ་སི་གྲོང་ཁྱེར་དུ་བོད་ཀྱི་ལོ་གསར་སྲུང་བརྩི་ཞུས་ཡོད་པ་རེད། གནས་ཚུལ་འདི་ལི་ཐུ་ནི་ཡའི་གསར་འགྱུར་བརྒྱུད་ལམ་ཁག་ཏུ་ཁྱབ་བསྒྲགས་བྱས་ཡོད།
དེ་ཡང་ཉེ་ལམ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་། སྐུ་ཚབ་དོན་གཅོད་རྣམ་གཉིས་ཝིལ་ནི་ཡ་སི་ཁུལ་དུ་ཕྱོགས་བསྐྱོད་ཕེབས་སྐབས་བོད་དོན་རྒྱབ་སྐྱོར་བས་དཔལ་ལྡན་སྲིད་སྐྱོང་མཆོག་དང་། སྐུ་ཚབ་དོན་གཅོད་ཕར་སི་བསོད་ནམས་ལགས་གཉིས་མཇལ་འཕྲད་བྱུང་ཡོད། དེ་བཞིན་ལྡི་ལིར་ཡོད་པའི་ལི་ཐུ་ནི་ཡཱའི་གཞུང་ཚབ་ལྕམ་སྐུ་ཌི་ཡཱ་ན་མི་ཁི་ཝི་ཤི་ཨེན་ལགས་ཀྱང་ལྡི་ལི་སྐུ་ཚབ་དོན་ཁང་དུ་ལོ་གསར་གྱི་དགའ་སྟོན་ལ་མཉམ་ཞུགས་གནང་ཡོད་པ་རེད།
ཕྱི་ཚེས་ ༩ ཉིན་ལི་ཐུ་ནི་ཡཱའི་ཡུལ་མི་དང་འགྲུལ་བཞུད་པ་རྣམས་བོད་ཀྱི་བཞི་མདོར་འཛོམས་ཏེ་རླུང་དར་གསར་བརྗེ་དང་། བདུག་སྤོས་སོགས་སྤར་བ་མ་ཟད། བོད་ཀྱི་སྲོལ་རྒྱུན་གྱི་ཇ་འདྲེན་པ་སོགས་ཀྱི་སྒོ་ནས་བོད་ཀྱི་ལོ་གསར་སྲུང་བརྩི་ཞུས་ཡོད། སྐབས་དེར་ནང་པའི་ལྷན་ཚོགས་ཀྱི་ཚོགས་མི་ཡང་མཉམ་ཞུགས་གནང་ཡོད་པ་རེད།
མཛད་སྒོ་འདི་ནི་ཝིལ་ནི་ཡ་སི་དང་བོད་བར་ཆོས་དང་རིག་གཞུང་གི་འབྲེལ་ལམ་མཚོན་བྱེད་དང་། བོད་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་གནས་སྟངས་ལ་དོ་སྣང་ཡོང་བའི་དམིགས་ཡུལ་ཡང་ཡིན་པ་བཅས།།
