༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༧ རེས་གཟའ་སྤེན་པའི་ཉིན་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་སྟོན་སྲུང་བརྩིའི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་དུ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཕེབས་གནང་ཡོད།
གཞན་ཡང་མཛད་སྒོའི་ཐོག་བོད་མི་མང་ཕྱོགས་བཞུགས་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་དང་། ཕྱོགས་བཞུགས་སྤྱི་འཐུས་དངོས་གྲུབ་རྡོ་རྗེ་ལགས། ཁྲིམས་ཞིབ་པ་ཆེ་བ་ཟུར་པ། དྲུང་ཆེ་ཟུར་པ། སྦེང་ལོར་ལྷོ་སྤྱི་གཙོས་ལྷོ་ཕྱོགས་གཞིས་ཆགས་ཁག་གི་ས་གནས་འགོ་འཛིན་རྣམ་པ། ས་གནས་ཀྱི་གནད་ཡོད་མི་སྣ་སོགས་ལྷན་ཞུགས་གནང་ཡོད།
དེ་ཡང་སློབ་གྲྭའི་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བླངས་གྲུབ་མཚམས་ལྔ་བཅུའི་དུས་སྟོན་གོ་སྒྲིག་ཚོགས་ཆུང་གི་ཚོགས་གཙོ་ས་གནས་འགོ་འཛིན་དགེ་ལེགས་འབྱུང་གནས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་སྒྲོགས་སྦྱང་གནང་དོན། ཀོ་ལི་གྷལ་དོན་ལྡན་གླིང་གཞིས་ཆགས་ཚུགས་ནས་མི་ལོ་ ༥༠ འཁོར་བའི་དུས་དྲན་སྲུང་བརྩི་བྱེད་བཞིན་ཡོད་པར་གཞིས་མི་ཡོངས་དང་ཕྱི་ནང་གི་སྐུ་མགྲོན་བཅས་པར་མཛའ་བརྩེའི་འཚམས་འདྲི་ཡོད།
རང་ཅག་བཙན་བྱོལ་དུ་འབྱོར་རྗེས་གཞིས་ཆགས་ཟུར་འཛུགས་དགོས་པའི་དམིགས་དོན་ནི། མི་འབོར་ཆེ་ཞིང་ས་རྒྱ་ཆེ་བའི་རྒྱ་གར་གྱི་ཡུལ་གྲུ་ཁག་ནང་རིམ་གྱིས་སིམ་སྟེ་ཁ་འཐོར་དུ་མི་འགྲོ་བ་དང་། བོད་མིའི་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས་བཅས་པ་མི་ཉམས་རྒྱུན་འཛིན། ངེས་བརྟན་མེད་པའི་འཚོ་བའི་དཀའ་ངལ་སེལ་ཐབས་བཅས་ཀྱི་ཆེད་དུ་ཡིན་པ་ལྟར་ཕྱོགས་ཚང་མ་ནས་ངལ་ཁུར་དང་ལེན་ཕྱར་གྲུ་མཉམ་འདེགས་བྱས་པའི་འབྲས་བུ་རང་རེའི་མིག་གི་སྤྱོད་ཡུལ་དུ་གྱུར་པ་འདི་ཡིན།
སླད་གཞིས་ཆགས་ཁག་གི་ནང་རྒན་རྒོན་ནད་གཅོང་ཉམ་ཐག་ཧྲེང་པོ་ཡོད་རིགས་ཀྱི་འཚོ་བའི་གནས་སྟངས་ཐོག་དམིགས་བསལ་དོ་སྣང་ལྟ་རྟོག་རོགས་རམ་དང་འབྲེལ། ནང་དོན་རིག་པ་སེམས་ཀྱི་འཕྲོད་བསྟེན་དང་། གསོ་བ་རིག་པ་ལུས་ཀྱི་འཕྲོད་བསྟེན་ཡིན་ལུགས་བཤད་སྲོལ་ཡོད་པ་ལྟར་རྒན་རྒོན་དེ་དག་ལ་ཟས་སྤྱོད་འཕྲོད་བསྟེན་ཐོག་ལའང་ལྟ་ཞིབ་མི་ལྷོད་པ་དགོས་གལ། བོད་གཞིས་ལུས་མི་མང་རྣམས་གཞན་དབང་འོག་ཏུ་ཚུད་ཡོད་ཀྱང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཆོལ་གསུམ་ཁ་བྲལ་གཏོང་ཐུབ་མེད། འོན་ཀྱང་འདི་ཕྱོགས་རང་རེ་བཙན་བྱོལ་ནང་སྤྱི་སེམས་ཀྱིས་ཕོངས་པའི་ཅོལ་ཆུང་ཁག་གཅིག་གིས་ཕྱོགས་རིས་འཐེན་འཁྱེར་གྱི་བྱ་བ་སྤེལ་བ་དེ་ནི་ཞབས་འདྲེན་བློ་ཕམ་གྱི་གནས་ཡིན་པས་སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས། ཞེས་བཀའ་སློབ་ཕེབས་ཡོད།
སྐབས་དེར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལྔ་བཅུའི་དུས་སྟོན་ཐོག་ཕེབས་པའི་གསུང་འཕྲིན་གྱི་འབྲུ་དོན་རེ་རེ་བཞིན་འགྲེལ་བརྗོད་དང་འབྲེལ། མང་ཚོགས་ནས་༸མགོན་པོ་གང་ཉིད་ཀྱི་བཀའ་སློབ་སྙིང་ལ་བཅང་སྟེ་ཤར་སྐྱོད་གནང་དགོས་གལ་སྐོར་གསུངས་ཡོད་པ་རེད།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་བཀའ་ཤག་སྐབས་ ༡༦ ནས་རྒྱལ་སྤྱིའི་སྟེང་དབུ་མའི་ལམ་གྱི་སྲིད་བྱུས་ལ་གདེང་འཇོག་ཡོང་སླད་བོད་དེ་ལོ་རྒྱུས་ཀྱི་ཐོག་ནས་རང་བཙན་རྒྱལ་ཁབ་ཅིག་ཡིན་པ་གསལ་བཀྲོལ་ཐུབ་ཐབས་ཁྲོད། ཉེ་ལམ་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་བའི་རྒྱབ་སྐྱོར་གྱི་ཁྲིམས་འཆར་ལ་ཚད་མཐོའི་རྒྱབ་སྐྱོར་དང་གཏན་འབེབས་གནང་ཡོད་པའི་ཁྲིམས་འཆར་དེའི་བརྒྱུད་རིམ་སྐོར་གསལ་བཤད་དང་སྦྲགས། རིང་མིན་ཨ་རིའི་གྲོས་ཚོགས་གོང་མའི་ནང་དུའང་གཏན་འབེབས་དང་ཁྲིམས་སུ་གཏན་འབེབས་ཐུབ་པའི་ཐུགས་རེ་ཡོད་སྐོར་གསུངས་ཡོད་པ་རེད། །
