༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༢༦ ནས་ ༢༨ བར་ཉིན་གསུམ་རིང་རྒྱ་གར་ནུབ་བྷང་གྷལ་མངའ་སྡེའི་ས་ལུ་གྷ་རའི་ས་ལུ་ཇ་ (Saluja) གསོལ་མགྲོན་ཁང་དུ་ཁྱིམ་ཐོ་ཞིབ་བཤེར་བའི་སྦྱོང་བརྡར་དབུ་འཛུགས་གནང་ཡོད། 

དེ་ཡང་དབུ་འབྱེད་མཛད་སྒོར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་དང་། ཟུང་དྲུང་བསྟན་འཛིན་མཁྱེན་རབ་ལགས། ཀ་སྦུག་ས་གནས་འགོ་འཛིན་ཀརྨ་དགེ་ལེགས་ལགས། རྒྱ་གར་སམ་བྷོ་དི་ཚོགས་པའི་ཁེ་ལས་པ་སན་དཱིབ་གྷོཤ་ལགས། ཤི་ཇིཏ་པཱལ་ལགས། བོད་ཀྱི་ཐེབས་རྩ་ཁང་གི་ལས་བྱེད་ཉི་མ་རྡོ་རྗེ་ལགས་བཅས་ཕེབས་གནང་ཡོད།སྐབས་དེར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཁྱིམ་ཐོ་ཞིབ་བཤེར་ལས་གཞིའི་གལ་གནད་དང་། མ་འོངས་པར་བོད་མིའི་སྒྲིག་འཛུགས་ཀྱི་བཙན་བྱོལ་བོད་མིར་སྨན་པའི་ལས་གཞི་སྤེལ་སླད་ཁྱིམ་ཐོ་སྤུས་གཙང་ཞིག་དགོས་གལ་ཆེན་པོ་ཡིན་ཚུལ་སྐོར་ངོ་སྤྲོད་གནང་ཡོད།སྦྱོང་བརྡར་དུ་མེའོ་ཆོས་འཕེལ་གླིང་དང་། ཏེ་ཛུ་དར་རྒྱས་གླིང་། ཀ་སྦུག རྡོ་རྗེ་གླིང་། བསུ་ན་མདའ་བཀྲ་ཤིས་གླིང་། སྒང་ཏོག ར་ཝང་ལ་ཀུན་ཕན་གླིང་། བསྟན་འཛིན་སྒང་། འབུམ་སྡེ་ལ་བཅས་ཀྱི་གཞོན་སྐྱེས་མཉམ་ཞུགས་གནང་འདུག

སྤྱིར་ཁྱིམ་ཐོ་ཞིབ་བཤེར་གྱི་ལས་གཞི་ནི་ཨ་རི་རོགས་ཚོགས་ (USAID) དང་། བོད་ཀྱི་ཐེབས་རྩ་གཉིས་ཀྱིས་མཐུན་འགྱུར་གནང་བ་ཡིན། དེ་བཞིན་ཕྱི་ཟླ་ ༣ ཚེས་ ༡ ནས་ ༣ བར་ཀྲུ་ཀྲིང་དང་། བལ་ཡུལ་ཁུལ་གྱི་བོད་མི་རྣམས་ལ་ས་ལུ་ཇ་གསོལ་མགྲོན་ཁང་དུ་སྦྱོང་བརྡར་གནང་རྒྱུ་ཡིན་པ་བཅས།།