༄༅། །བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་གནམ་ལོ་གསར་བཞད་ཀྱི་དགའ་སྟོན་ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་གཞིས་བྱེས་གཉིས་སུ་བཞུགས་པའི་བོད་རིགས་སྤུན་ཟླ་ཡོངས་ལ་འཚམས་འདྲི་གནང་དོན། དེ་རིང་ལོ་གསར་གྱི་འཚམས་འདྲི་ཚིག་འགའ་ཤས་ཞུ་རྒྱུར། བོད་ཕྱི་ནང་གཉིས་སུ་བཞུགས་པའི་བོད་རིགས་སྤུན་ཟླ་ཡོངས་དང་། བོད་ཀྱི་གྲོགས་པོ་གྲོགས་མོ་ཚང་མར་བོད་མི་མང་སྤྱི་འཐུས་ལྷན་ཚོགས་དང་། ང་རང་སྒེར་གྱི་ངོས་ནས་རབ་གནས་ཤིང་འབྲུག་ལོའི་གནམ་ལོ་གསར་དུ་ཚེས་པའི་དགའ་སྟོན་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་གསར་ཟེར་དུས་མི་རིགས་ཤིག་གི་རིག་གཞུང་ལྟ་བུ་ཆགས་ཡོད། དེང་སང་འཛམ་གླིང་ནང་དུ་ཡོངས་གྲགས་ལྟ་བུར་ Happy New Year ཞེས་མི་ཚང་མས་དགའ་བསུའི་རྣམ་པའི་ཐོག་ནས་ལོ་གསར་པ་བསུ་གི་ཡོད། ལོ་གསར་པའི་ནང་ལ་བྱ་བ་བཟང་པོ་མང་པོ་ཞིག་འགོ་བརྩམ་རྒྱུའི་གོ་སྐབས་བཟུང་དགོས། དེ་ཡང་ཉིན་མ་གཅིག་གཉིས་རིང་དགའ་དགའ་སྤྲོ་སྤྲོ་གནང་བ་ཙམ་མ་ཡིན་པར་ལོ་ཧྲིལ་པོ་དོན་སྙིང་ལྡན་པ་ཡོང་ཐུབ་པར་འབད་རྩོལ་ཞུ་རྒྱུ་དེ་གལ་ཆེན་པོ་རེད། རྩ་བའི་བོད་ལྟ་བུར་མཚོན་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། དེ་བཞིན་སྐྱབས་བཅོལ་བོད་མི་མང་ཤོས་གནས་ཡུལ་རྒྱ་གར་ཡིན་དུས། རྒྱ་གར་གཞུང་གི་མཐུན་འགྱུར་ལ་བརྟེན་ནས་བོད་ཀྱི་ཆོས་དང་རིག་གཞུང་། སྐད་ཡིག་ཐོག་བྱས་རྗེས་འབུར་དུ་ཐོན་པ་བྱུང་ཡོད་དུས། བོད་མི་ཙམ་མ་ཡིན་པར་མི་རིགས་མང་པོ་ཞིག་གིས་བོད་ཀྱི་ཆོས་དང་རིག་གཞུང་ལ་དོ་སྣང་གནང་རྒྱུ་དང་། ལྷག་པར་དུ་དེང་སྐབས་སློབ་སྦྱོང་བྱ་རྒྱུ་ཤུགས་ཆེ་རུ་འགྲོ་གི་ཡོད། དེ་ང་ཚོ་བོད་མིའི་གཟི་བརྗིད་རེད་བསམ་གྱི་འདུག
དེ་བཞིན་ཕྱོགས་གཅིག་ནས་ཞུས་ན། བོད་ཕྱི་ནང་གཉིས་ཆགས་ནས་ཆབ་སྲིད་ཐོག་ནས་བསམ་ན་ང་ཚོར་གྱོང་རག་པ་ལྟ་བུ་ཆགས་ཡོད། འོན་ཀྱང་དེང་སྐབས་དུས་རབས་ཉི་ཤུ་རྩ་གཅིག་གི་འཛམ་གླིང་ནང་ལ་རང་དབང་དང་མང་གཙོ་ཞེས་པ་མི་ཚང་མས་དགའ་ཞེན་བྱེད་པའི་དུས་ཚོད་ཅིག་ལ་སླེབས་ཡོད་དུས། ང་ཚོ་བོད་མི་རྣམས་ལ་ཡིན་ནའང་དམིགས་བསལ་གྱི་གོ་སྐབས་གསར་པ་ཞིག་ཆགས་ཀྱི་ཡོད། དེ་བཞིན་འཛམ་གླིང་ནང་ལ་ཆབ་སྲིད་ཀྱི་ལངས་ཕྱོགས་འགྱུར་བ་ཤུགས་ཆེན་པོ་འགྲོ་གི་ཡོད་རེད། དེ་མཚུངས་རྒྱ་ནག་ནང་ལའང་འགྱུར་བ་ཤུགས་ཆེན་པོ་འགྲོ་བཞིན་ཡོད། དེ་དང་བསྟུན་ནས་བོད་མི་ཚང་མས་ལྷག་བསམ་དང་སྙིང་སྟོབས་ཞུམ་མེད་ཀྱི་ཐོག་ནས་རྩ་དོན་འཐབ་རྩོད་ཐོག་ལ་ཤུགས་སྣོན་རྒྱག་དགོས། རྩ་དོན་འཐབ་རྩོད་ཟེར་དུས་བདེན་པ་དང་རྒྱུ་མཚན་ཡོད་པའི་འཐབ་རྩོད་ཅིག་ཆགས་ཡོད་དུས། ཉིན་མ་གཅིག་ཏན་ཏན་གཞིས་བྱེས་མཉམ་འཛོམས་ཡོང་ཐུབ་པའི་གནས་སྟངས་ཏན་ཏན་ཡོང་གི་རེད་བསམ་གྱི་ཡོད། དེ་ཡིན་དུས་དེ་ཚོའི་ཐོག་ལ་འབད་རྩོལ་གནང་དགོས། དེ་བཞིན་ང་ཚོར་ཕ་མེས་ནས་ཡོད་པའི་བོད་ཀྱི་ཆོས་དང་རིག་གཞུང་། སྐད་ཡིག་དེ་དག་དེང་སང་གི་དུས་སུ་བོད་མི་རྣམས་ལུང་པ་མང་པོ་ཞིག་ཏུ་ཁ་འགྲམ་ནས་གནས་ཡོད་པ་ཡིན་དུས། སྐབས་རེ་ང་ཚོས་སྣང་ཆུང་ཤོར་ནས་འཐུས་ཤོར་འགྲོ་བའི་ཉེན་ཁ་ཆགས་བསྡད་ཡོད། དེའི་ཐོག་བོད་མི་རྒན་གཞོན་ཚང་མས་དགའ་ཞེན་དང་། ཉིན་རེའི་འཚོ་བའི་ནང་ལ་བེད་སྤྱོད་གཏང་རྒྱུ་དེ་གལ་ཆེན་པོ་རེད། ཕྱི་རྒྱལ་ཁག་ཏུ་ཡོད་པའི་བོད་རིགས་ཚོགས་པ་མང་པོ་ཞིག་གིས་གཟའ་མཇུག་སློབ་གྲྭ་བཙུགས་ནས་བོད་རིགས་གཞོན་སྐྱེས་ཚོར་བོད་ཀྱི་སྐད་ཡིག་བསླབ་སྟེ་རིག་གཞུང་ལ་ཞབས་འདེགས་ཧ་ཅང་ཆེན་པོ་ཞུ་གི་འདུག དེ་བཞིན་བོད་ཀྱི་སྐད་ཡིག་དང་། རིག་གཞུང་། ཆོས་ཐོག་ལ་དམིགས་བསལ་གྱི་ཐུགས་སྣང་གནང་ནས་མི་ཉམས་གོང་འཕེལ་ཉམས་པ་སོར་ཆུད་ཡོང་བར་ཚང་མས་འབད་རྩོལ་ཞུ་ཐུབ་དགོས་རྒྱུ་དེ་གནད་དོན་ཞིག་ཆགས་ཡོད།
དེ་མཚུངས་ལོ་འདིའི་ནང་ལ་གལ་ཆེ་བ་ཞིག་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལུགས་ལྟར་ན། དགུང་ལོ་དགུ་བཅུར་ཕེབས་ཀྱི་ཡོད། དེ་ཡིན་དུས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བཞུགས་རྒྱུ་དེ་ང་ཚོ་བོད་མི་ཚང་མའི་བསམ་འདུན་གཅིག་མཚུངས་ཆགས་ཡོད་པ་རེད། དེས་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ཁག་བསྒྲུབ་ཐུབ་རྒྱུ་དང་། སྐུ་ཚེ་ཡུན་རིང་པོ་བཞུགས་ཐུབ་པའི་ཆེད་དུ་བོད་མི་ཚང་མས་རྣམ་དཀར་དགེ་སྒྲུབ་སྡིག་སྤོང་གནང་ཐུབ་རྒྱུ་དང་། དམ་ཚིག་འོ་ཆུ་གཅིག་འདྲེས་གྱི་རྣམ་པ་ཡོང་ཐུབ་རྒྱུར་ཚང་མས་འབད་རྩོལ་ཞུ་དགོས། ང་ཚོ་གཞུང་འབྲེལ་དང་གཞུང་འབྲེལ་མ་ཡིན་པའི་ཐོག་ནས་གོ་སྟོན་གྱི་གྲ་སྒྲིག་གནང་བཞིན་ཡོད། བོད་མི་སྒེར་སོ་སོའི་ངོས་ནས་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་མཛད་འཕྲིན་ཁག་དང་། ཐུགས་རྗེ་བཀའ་དྲིན་སྐྱོང་བ་རྣམས་མཚོན་ཆེད་དུ་སོ་སོའི་ངོས་ནས་རང་ནུས་གང་ལྕོགས་ཀྱིས་རྣམ་པ་འདྲ་མིན་ཐོག་ནས་གོ་སྟོན་སྲུང་བརྩི་ཞུ་རྒྱུའི་གོ་སྐབས་ཏན་ཏན་ཡོང་གི་རེད་བསམ་གྱི་འདུག དེ་ཚོའི་ཐོག་ལ་ཐུགས་སྣང་གནང་རྒྱུ་དེ་གལ་ཆེན་པོ་ཆགས་ཀྱི་འདུག སྤྱི་ཡོངས་ཀྱི་བསམ་བློ་གཏང་ན། བོད་མི་ཟེར་དུས་རྣམ་དཔྱོད་དང་ལྡན་པའི་མི་རིགས་ཤིག་ཆགས་ཡོད། མི་རིགས་དེའི་ཆེ་བརྗོད་དེ་ང་ཚོའི་བཙན་པོ་གོང་མ་རྣམས་ཀྱི་སྙིང་སྟོབས་དང་། འབད་རྩོལ་ལ་བརྟེན་ནས་སྐད་ཡིག་དང་། རིག་གཞུང་། ལོ་རྒྱུས་ཕྱུག་པོ་ཡོད་མཁན་གྱི་མི་རིགས་ཤིག་ཆགས་ཡོད།
དེ་བཞིན་ང་ཚོ་བོད་རིགས་སྤུན་ཟླ་གངས་ཅན་པ་ཞེས་གཅིག་འགྱུར་གྱི་འདུ་ཤེས་ཤིག་སླེབས་ཡོད་པ་རེད། ང་རང་ཚོ་བཙན་བྱོལ་ལ་ཐོག་མར་སླེབས་པའི་དུས་ནས་བཟུང་སྟེ། ཆོལ་ཁ་གསུམ་སྐྱིད་ན་མཉམ་སྐྱིད་དང་། སྡུག་ན་མཉམ་སྡུག་བྱ་རྒྱུ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གལ་ཆེན་བ་ཞིག་ཆགས་ཡོད། དེ་ཡོང་བར་བཀའ་སློབ་རིམ་པ་མང་པོ་ཞིག་ཕེབས་ཡོད། དེ་ཡིན་དུས། ང་ཚོས་ལུང་ཚན་དང་། ཆོལ་ཁ་རྒྱུ་མཚན་དུ་བྱས་ནས་བོད་མི་ནང་ཁུལ་གྱི་མཐུན་ལམ་ལ་རྡོག་རོལ་མ་འགྲོ་བ་བྱ་རྒྱུ་དེ་ཧ་ཅང་གལ་ཆེན་པོ་ཆགས་འདུག དེས་ན། དེ་རིང་གི་ལོ་གསར་གྱི་འཚམས་འདྲི་དང་མཉམ་དུ་དེ་ལྟ་བུའི་ཚིག་ཁ་ཤས་ཞུས་ན་བསམ་བྱུང་། གོང་དུ་ཞུས་པའི་གནད་དོན་དེ་དག་གི་ཐོག་ལ་ཚང་མས་འགན་ཁུར་དང་འབད་རྩོལ་གནང་བ་ཡིན་ན། ང་ཚོ་བོད་སྤྱི་པའི་བསོད་ནམས་དང་རླུང་རྟ་གོང་འཕེལ་ཡོང་བར་ཡིད་ཆེས་བྱེད་ཐུབ་ཡ་ཞིག་ཆགས་ཀྱི་ཡོད། བསྐྱར་དུ་ལོ་གསར་པ་ལ་འཚམས་འདྲི་ཞུ་རྒྱུ་དང་། ལོ་གསར་པའི་ནང་ནད་མེད་ཚེ་རིང་བདེ་སྐྱིད་ཕུན་སུམ་ཚོགས་པ་ཡོང་བ། དེ་བཞིན་བྱམས་པ་དང་། བརྩེ་བ། སྙིང་རྗེ་དེ་དག་གོང་འཕེལ་གྱི་ཐོག་ནས་འཛམ་གླིང་ཞི་བདེ་ཡོང་བ། ལྷག་པར་དུ་བོད་མི་ཡོངས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་སུ་མ་ཆད་པའི་བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཚེ་བརྟན་ཞིང་། རླབས་ཆེན་ཐུགས་ཀྱི་དགོངས་གཞི་བསྒྲུབ་རྒྱུ་དང་། བོད་དོན་བདེན་མཐའ་མྱུར་དུ་སེལ་བའི་སྨོན་འདུན་ཞུ་རྒྱུ་ཡིན། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་གསུངས་ཡོད་པ་བཅས།།
