༄༅། །བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་གནམ་ལོ་གསར་དུ་བཞད་པའི་དགའ་སྟོན་རྟེན་འབྲེལ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་འདྲི་གནང་དོན། དེ་རིང་བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་གནམ་ལོ་གསར་བཞད་ལ་བོད་ཕྱི་ནང་གཉིས་ལ་ཡོད་པའི་བོད་མི་ཚང་མར་ངས་བཀའ་ཤག་སྐབས་བཅུ་དྲུག་པ་དང་ང་རང་སྒེར་ངོས་ནས་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ང་ཚོ་བཙན་བྱོལ་ལ་སླེབས་ནས་ལོ་ངོ་ ༦༤ དང་། རྒྱ་ནག་གིས་བོད་ལ་བཙན་འཛུལ་བྱས་ནས་ལོ་ ༧༤ ཙམ་འགྲོ་གི་ཡོད་པ་རེད། བོད་ནང་དུའང་འདས་པའི་ལོ་ངོ་དེ་དག་ནང་གནས་སྟངས་ལ་འགྱུར་བ་ཤུགས་ཆེན་པོ་ཕྱིན་ཡོད། ལྷག་པར་བོད་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུ་དང་། བོད་མི་རིགས་ཀྱི་ངོ་བོ་ཟེར་དུས་ཆོས་དང་སྐད་ཡིག་སོགས་པ་གཅེས་སྲུང་བྱ་རྒྱུ་དེ་རེད། བོད་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུར་རྒྱ་ནག་གཞུང་གིས་སྲིད་བྱུས་འཛིན་སྟངས་དེ་རྩ་མེད་གཏང་རྒྱུའི་སྲིད་བྱུས་བཟུང་གི་ཡོད་དུས། ང་ཚོས་སྔར་དང་མ་འདྲ་བའི་གདོང་ལེན་བྱ་དགོས་པའི་གནས་སྟངས་འོག་སླེབས་ཡོད་པ་དྲན་གྱི་ཡོད།
བཙན་བྱོལ་སྤྱི་ཚོགས་ནང་དུ་ཡིན་ནའང་འགྱུར་བ་ཤུགས་ཆེན་པོ་ཞིག་འགྲོ་གི་ཡོད་པ་རེད། མི་འབོར་གནས་སྤོ་དང་། གཞིས་ཆགས་ཁག་ཏུ་མི་ཉུང་དུ་འགྲོ་བཞིན་པ་སོགས་ཀྱི་གནས་སྟངས་ལ་གདོང་ལེན་བྱ་དགོས་པ་མང་པོ་ཞིག་ཡོད་ལ། དེ་མཚུངས་གོ་སྐབས་ཀྱང་མང་པོ་ཡོད། དེ་འདྲ་ཡིན་དུས། ཐོག་མར་བོད་ནང་ལ་བཞུགས་མཁན་ཁྱེད་རང་ཚོར་དཀའ་ངལ་མང་པོ་ཞིག་ཡོད་པ་རེད། རྒྱ་ནག་གཞུང་གི་སྲིད་བྱུས་འོག་ནས་སོ་སོའི་བསམ་པ་ནང་བཞིན་ལས་ཀ་བྱེད་མི་ཐུབ་པོ་མང་པོ་ཡོད་རེད་དེ། སོ་སོའི་སྲོག་ཡན་ཆད་འབེན་ལ་བཙུགས་ནས་དཀའ་ལས་རྒྱག་གི་ཡོད། གཙོ་བོ་༸རྒྱལ་བ་རིན་པོ་ཆེའི་ཐུགས་རྗེ་བཀའ་དྲིན་དང་། དེའི་ནང་གཙོ་བོ་ཁྱེད་ཚོ་བོད་ནང་དུ་ཡོད་མཁན་ཚོས་ཞུམ་པ་མེད་པའི་སྙིང་སྟོབས་ལ་བརྟེན་ནས་ད་ལྟ་བར་དུ་བོད་ཀྱི་གནད་དོན་དེ་འཛམ་བུ་གླིང་སྒང་ལ་གནས་ཐུབ་པ་བྱུང་བ་རེད། དེས་ན། དེ་རིང་ལོ་གསར་གྱི་དུས་སྟོན་འདི་དང་སྟབས་བསྟུན་ནས་མ་འོངས་པ་ཡིན་ནའང་བོད་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུར་སོ་སོས་གནས་སྟངས་གང་འདྲ་ཞིག་གི་འོག་ལ་ཡིན་ནའང་འབད་རྩོལ་ལྷོད་མེད་བྱེད་ཀྱི་ཡིན་བསམ་པའི་ཆོད་སེམས་བརྟན་པོ་དགོས་རྒྱུ་གལ་ཆེན་པོ་རེད། ང་ཚོ་བཙན་བྱོལ་ནང་དུ་ཡིན་ན་ང་ཚོའི་སྒྲིག་འཛུགས་བརྒྱུད་ཡིན་ནའང་རེད། སོ་སོའི་ངོས་ནས་གང་ཐུབ་ཅི་ཐུབ་འབད་རྩོལ་ཞུ་གི་ཡོད། ལྷག་དོན་དུ་སྒྲིག་འཛུགས་ཀྱི་འགན་འཁུར་མཁན་ཞིག་ཡིན་པའི་ཆ་ནས་སྤྱི་ཚོགས་ནང་གང་ཐུབ་ཀྱིས་འབད་རྩོལ་ཞུ་བཞིན་པ་ཡིན།
དེ་རིང་གི་ལོ་གསར་གྱི་འཚམས་འདྲི་འདི་བརྒྱུད་བཙན་བྱོལ་ནང་དུ་ཡོད་པའི་བོད་པ་ཚོས་ཀྱང་སོ་སོའི་མི་རིགས་ཀྱི་ངོ་བོ་སྲུང་སྐྱོབ་བྱ་བར་སྔར་ལས་ལྷག་པ་འབད་རྩོལ་བྱ་རྒྱུ་གལ་ཆེན་པོ་རེད་ཅེས་ཞུ་འདོད་བྱུང་། ལོ་གསར་འདི་དང་སྟབས་བསྟུན་ཏེ་ང་ཚོ་གནས་སྟངས་གང་འདྲ་ཞིག་ལ་ལྷུང་གི་ཡོད་ནའང་མ་འོངས་པར་བོད་རྒྱའི་དཀའ་རྙོལ་བསལ་རྒྱུ་དང་། བོད་ལ་ཞི་བདེ་ཡོང་བའི་ཐབས་ལམ་ཉག་ཅིག་དེ་འཚེ་བ་མེད་པ་ཡིན་པ་གསལ་པོ་རེད། དེ་ཡིན་དུས་༸རྒྱལ་བ་རིན་པོ་ཆེས་དུས་རྒྱུན་དུ་བཀའ་གནང་གི་ཡོད་པ་ལྟར། ང་ཚོ་བོད་ཀྱི་ས་ཆའི་ཆགས་བབས་ཀྱི་ཐོག་ནས་གལ་གནད་ཆེན་པོ་ཡིན་པ་གཅིག་པུ་མ་ཡིན་པར། བོད་ཀྱི་ཁོར་ཡུག་དེ་བོད་ཙམ་མ་ཡིན་པར་ཁྱིམ་མཚེས་རྒྱལ་ཁབ་མཚོན་པའི་རྒྱལ་སྤྱི་ཁྱོན་ལ་ཕན་གནོད་ཤུགས་ཆེན་པོ་འདྲེན་ཐུབ་པའི་གནས་སྟངས་ཤིག་ཡིན་པ་དང་། ལྷག་པར་དུ་བོད་པའི་ནང་ཆོས་ལ་བརྟེན་པའི་འཚེ་བ་མེད་པའི་རིག་གཞུང་དེ་༸རྒྱལ་བ་རིན་པོ་ཆེས་གལ་ཆེན་པོ་བརྩི་གནང་གི་ཡོད་པ་རེད། དེ་ཡིན་དུས་ང་ཚོས་འཐབ་རྩོད་ཀྱི་ཐབས་ལམ་ཡིན་ནའང་འཚེ་བ་མེད་པའི་ཐོག་ནས་མུ་མཐུད་འགྲོ་དགོས་པ་ཡིན། འཚེ་བ་མེད་པའི་ཐོག་ནས་ང་ཚོས་ཐབས་ལམ་ཞིག་བསྟན་ཐུབ་པ་ཡིན་ན། རྒྱུན་གནས་ཐུབ་པ་ཞིག་ཡོང་གི་རེད། དེ་མ་གཏོགས་འཚེ་བའི་ལས་བྱས་ནས་དེའི་འབྲས་བུ་འཚེ་བ་མ་གཏོགས་ཡོང་ཐབས་མེད།
དེ་ཡིན་དུས་དེ་ལྟ་བུའི་ལམ་ལ་མི་འཇུག་པར་༸རྒྱལ་བ་རིན་པོ་ཆེའི་བཀའ་གཞིར་བཟུང་བསྒྲུབ་རྒྱུ་དེ་གལ་ཆེན་པོ་རེད་ཅེས་ཞུ་རྒྱུ་ཡིན། བོད་ནང་ལ་ཡོད་མཁན་ཚོ་ཡིན་ནའང་བློ་བདེ་པོ་བྱས་ཏེ་བཞུགས། བར་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྒང་ཏོག་དང་། ས་ལུ་སྒར། རྡོ་རྗེ་གདན་དུ་ཆིབས་བསྒྱུར་གནང་བའི་སྐབས་སྐུ་གཟུགས་བདེ་ཐང་ཡག་ཐག་ཆོད་བྱུང་ཡོད། ༸རྒྱལ་བ་རིན་པོ་ཆེའི་ངོས་ནས་ཀྱང་སྐུ་ཚེ་ཞབས་པད་བརྟན་པའི་ཐུགས་བསྐྱེད་བརྟན་པོ་ཡོད་ལ་བཀའ་ཡང་ཡང་གནང་ཡོད་པ་རེད། གལ་ཆེ་ཤོས་དེ་བླ་མ་སྐུ་ཚེ་ཞབས་པད་བརྟན་མ་བརྟན་དེ་ང་ཚོ་སློབ་མ་ཚོའི་བྱེད་ལས་དང་། བླ་མ་དང་སློབ་མའི་དམ་ཚིག་ལ་རག་ལུས་ཡོད་པ་སོང་ཙང་། བླ་མའི་དགོངས་པ་ཇི་བཞིན་རྟོགས་པ་བྱ་རྒྱུ་དང་། རྟོགས་པ་ཙམ་མ་ཡིན་པར་ཉམས་ལེན་ལ་ཁྱེར་ཐུབ་པ་བྱ་རྒྱུ་དེ་དོན་གྱི་སྙིང་པོ་རེད་ཅེས་ཞུས་པའི་ཐོག་ནས་བོད་ཕྱི་ནང་གཉིས་ཀྱི་བོད་མི་དང་། དེ་བཞིན་བོད་མིར་དགའ་ཞེན་དང་བོད་ཀྱི་ལོ་གསར་སྲུང་བརྩི་ཞུ་མཁན་ཚང་མར་བོད་མིའི་སྒྲིག་འཛུགས་བཀའ་ཤག་ངོས་ནས་སླར་ཡང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཐུགས་རྗེ་ཆེ། ཞེས་གསུངས་ཡོད་པ་བཅས།།
