༄༅། །བོད་རྒྱལ་ལོ་ ༢༡༥༡ རབ་གནས་ཤིང་འབྲུག་ལོའི་གནམ་ལོ་གསར་ཚེས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཞིས་བྱེས་བོད་མི་ཡོངས་ལ་འཚམས་འདྲིའི་བཀའ་སློབ་སྩལ་དོན། བོད་ལོའི་ལོ་གསར་ལ་གཞིས་བྱེས་བོད་མི་ཚང་མར་འཚམས་འདྲི་དང་བཀྲ་ཤིས་བདེ་ལེགས་ཞུ་གི་ཡོད།ང་ཚོ་བོད་པ་བཙན་བྱོལ་བ་ཆགས་ཏེ་དཀའ་ངལ་ཆེན་པོ་ཞིག་གི་འོག་བསྡད་པ་རེད།རྒྱ་གུང་བྲན་སྟོབས་ཤུགས་ལྡན་པ་ཞིག་གི་འོག་བསྡད་པ་རེད་དེ།བོད་རྒྱ་ཆེའི་མི་མང་གིས་དད་མོས་སེམས་ཤུགས་ནམ་ཡང་འགྱུར་མེད་དུ་བསྡད་པ་རེད་ལ།ངོས་ནས་ཀྱང་འདིར་འགོ་ཁྲིད་དེ་བསྡད་པ་རེད།དེ་སྔ་བོད་བཅིངས་འགྲོལ་ཟེར་བ་བཏང་སྟེ་རྒྱ་གུང་བྲན་ནས་བོད་དབང་བསྒྱུར་བྱེད་སྐབས།བོད་ཀྱི་ཆོས་དད་སོགས་ལ་འགྱུར་བ་འགྲོ་རྒྱུའི་རེ་བ་བརྒྱབ་པ་རེད་དེ་ང་ཚོ་བོད་མིའི་ཆོས་དང་རིག་གཞུང་གི་དད་མོས་ཇེ་བརྟན་ཇེ་བརྟན་དུ་གྱུར་ཏེ་ཧ་ཅང་ཡག་པོ་ཆགས་ཡོད།
བོད་ཙམ་མ་ཟད་དེང་སང་རྒྱ་ནག་རང་གི་ནང་དུའང་ནང་ཆོས་ལ་དོ་སྣང་གསར་པ་ཞིག་སླེབས་འདུག་ལ།འཛམ་གླིང་ས་ཁུལ་མང་པོའི་ནང་དུའང་བོད་ཀྱི་ཆོས་དང་རིག་གཞུང་ཟེར་དུས་དངོས་གནས་རྒྱུ་མཚན་ལྡན་པ།རིགས་པ་དང་ལྡན་པ།བསམ་བློ་བཏང་བ་ཡིན་ན་སེམས་ཀྱི་ཞི་བདེ་ཡོང་བ།སེམས་བཟང་དུ་འགྲོ་བ་སོགས་ཀྱི་ཐད་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་མངོན་སྟབས།དེང་སྐབས་ནུབ་ཕྱོགས་ནས་ཀྱང་ཚན་རིག་པ་གཙོས་བོད་ཀྱི་ཆོས་དང་རིག་གཞུང་ལ་དགའ་མོས་བྱེད་མཁན་ཇེ་མང་རེད།རྒྱ་གུང་བྲན་ནས་ང་ཚོའི་ཆོས་དང་རིག་གཞུང་དེ་ནག་བསུབ་གཏོང་རྒྱུའི་ཐབས་ཤེས་རིམ་པར་བྱས་པ་རེད་དེ།ནག་བསུབ་འགྲོ་རྒྱུའི་ཚབ་ཏུ་འཛམ་བུ་གླིང་འདིའི་སྟེང་བོད་ཀྱི་ཆོས་དང་རིག་གཞུང་དོ་སྣང་གསར་པ་སླེབས་ས་ཞིག་ཆགས་ཡོད་པ་ཧ་ཅང་གསལ་པོ་རེད།
དེས་ན་སླད་ཀྱང་ང་ཚོ་བོད་ཀྱི་ཕ་མེས་ནས་བཟུང་གི་སེམས་པ་བཟང་པོ་བྱེད་པ་དང་།ཐ་ན་འབུ་སྲིན་ཚུན་ལ་བརྩེ་བ་བྱེད་པའི་གོམས་གཤིས་ཤར་ནུབ་གང་ས་ནས་དོ་སྣང་གསར་པ་བྱེད་བཞིན་པ་འདི།ཕ་མེས་ནས་བརྒྱུད་པའི་ང་ཚོ་བོད་ཀྱི་གཅེས་ནོར་ཞིག་ཡིན་བསམས་ཏེ་མུ་མཐུད་བདག་པོ་རྒྱག་རྒྱུ་གལ་ཆེན་པོ་རེད།
ངོས་ལ་ཆ་བཞག་ན།ཟི་ལིང་ནས་སྐྱེས།ཆུང་ཆུང་སྐབས་ལྷ་སར་ཡར་སླེབས།སེམས་པ་བཟང་པོ་བྱེད་རྒྱུ་དང་བོད་ཀྱིས་བདག་པོ་བསྐྱོན་པའི་ནང་ཆོས་སྤུས་དག་ཤོས་དེར་སློབ་གཉེར་བྱས་པ་རེད།ཐའེ་ལེནྜ་དང་འབར་མ་སོགས་ནང་པའི་ཡུལ་གྲུ་རེད།ཧ་ཅང་ཡག་པོ་ཡོད་རེད།སློབ་སྦྱོང་གཏིང་ཟབ་པོ་བྱས་ཏེ་འགྲོ་མཁན་ནི་བོད་དང་སོག་པོ་རེད།ཡིན་ནའང་སོག་པོ་ཉམས་ཆག་ཕྱིན་ཚར་བ་རེད།ང་ཚོ་བོད་ཀྱི་གོམས་གཤིས་བཟང་པོ་ཡོད་པ་དེ་འཛམ་གླིང་གི་གཅེས་ནོར་ཆགས་བསྡད་ཡོད་སྟབས།མུ་མཐུད་ནས་ཚང་མས་དོ་སྣང་བྱོས།
འཛམ་གླིང་ཤར་ནུབ་ལྷོ་བྱང་གང་སར།ཕྱག་མཆོད་འབུལ་དང་།ཞབས་བརྟན་བྱེད་ཚུལ་ཙམ་ཁྱབ་སྤེལ་བཏང་བ་མ་ཡིན་པར།ང་ཚོའི་བསམ་བློ་གཏོང་ཕྱོགས་ཀྱི་ཐད་ནས་བྱམས་སྙིང་རྗེ་གོང་མཐོར་གཏོང་བའི་གོམས་གཤིས་ཤིག་ཡོད་པ་དེར་འཛམ་གླིང་གང་སར་དོ་སྣང་བྱེད་ཀྱི་ཡོད་པ་རེད།མུ་མཐུད་དོ་སྣང་ཡོང་ཐབས་སུ་ང་ཚོ་ཚང་མས་སོ་སོའི་ངོས་ནས་ཉམས་ལེན་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད།ང་ཚོ་སྐྱེས་པའི་སྐབས་ནས་དམིགས་བསལ་མི་འདྲ་བ་མེད་ཀྱང་།ང་ཚོར་གོམས་གཤིས་སེམས་ཅན་འབུ་སྲིན་ཚུན་གྱི་སྲོག་གཅོད་ལ་འཛེམ་པའི་སེམས་པ་བཟང་པོ་ཞིག་ཡོད་པས།གོམས་གཤིས་དེ་དག་མུ་མཐུད་བརྒྱུད་འཛིན་དར་སྤེལ་ཐུབ་པ་དགོས་རྒྱུ་ཧ་ཅང་ཆེན་པོ་རེད། ཆོས་དད་ཡོད་མེད་ལ་མ་ལྟོས་པར།བོད་ཀྱི་གོམས་གཤིས་སེམས་པ་བཟང་པོ་ཟེར་བ་དེ་འཛམ་གླིང་ཤར་ནུབ་གང་སར་རྒྱ་སྐྱེད་རྒྱུ་སེམས་ལ་ཞོགཧུར་ཐག་བྱོས།
ང་ཚོ་བོད་ཀྱི་སེམས་ཁམས་རིག་པའི་སྐོར་དེ་ནང་པའི་ཡུལ་གྲུ་ཚོའི་ནང་ནས་ཟབ་ཤོས་རེད།བསམ་བློའི་འགྲོ་སྟངས་ཅི་ལྟར་ཡིན་མིན་དེ་སྔ་བོད་དུ་སེ་འབྲས་ཚོ་གཙོས་དགོན་སྡེ་ཁག་ནས་གཞུང་ཆེན་སློབ་གཉེར་བྱེད་ཀྱི་ཡོད་པ་རེད།དེ་ནི་འཛམ་གླིང་གི་གཅེས་ནོར་ཁ་ཡོད་ལག་ཡོད་ཕན་ཐོགས་ཡོད་པ་ཞིག་རེད།ང་ཚོས་ཁ་ནས་བཤད་པ་ཙམ་མིན་པར།ལག་ལེན་བསྟར།ཆོས་སྐད་དུ་བཤད་ན་བཤད་སྒྲུབ་ཟུང་འབྲེལ་བྱས་ཏེ་ད་བར་བདག་པོ་རྒྱབ་པ་རེད།དེ་སྔའི་བཤད་སྒྲུབ་ཟུང་འབྲེལ་གྱིས་བདག་པོ་རྒྱབ་པའི་སེམས་པ་བཟང་པོ་བྱེད་ཚུལ་དེ།ད་ཆ་འཛམ་གླིང་འདིར་དོ་སྣང་གསར་པ་དང་ཁྱབ་ཐུབ་པའི་གནས་ཚུལ་ཞིག་ཆགས་ཀྱི་ཡོད།དེར་བརྟེན་བོད་པ་ཚང་མས་སྙིང་སྟོབས་དང་སེམས་ཤུགས་སྐྱེད་དེ་ཧུར་ཐག་གནང་རོགས་ཞེས་བརྗོད་རྒྱུ་དེ་ཡིན།
ལྷག་པར་བོད་ནང་དུ་བཞུགས་པའི་གཞིས་ལུས་རྒྱ་ཆེའི་མི་མང་དད་པ་དང་དམ་ཚིག་གཡོ་བ་བ་མེད་པ་ཧ་ཅང་ཡག་པོ་རེད།ད་དུང་བོད་ལ་ལོ་ངོ་སྟོང་ཕྲག་རིང་གི་གོམས་གཤིས་བཟང་པོ་ཡོད་པ་དེ་དག་རྒྱུ་མཚན་གང་ཡིན་གཏམ་རིང་པོ་ཞིག་བསམ་བློ་གཏོང་རྒྱུ་དེ་ང་ཚོ་བོད་པ་མི་རབས་གསར་པ་ཚོ་དོ་སྣང་གསར་བྱེད་དགོས་ཞིག་ཆགས་འདུགང་ཚོའི་གོམས་གཤིས་ཡིན་ཟེར་བ་ཙམ་མིན་པར་རྒྱུ་མཚན་གང་ཡིན་པ་དང་།དངོས་ཡོད་གནས་ཚུལ་ལ་དེང་སྐབས་འཛམ་གླིང་ཤར་ནུབ་གང་སར་ཚན་རིག་པ་གཙོས་ཆོས་ལ་འབྲེལ་བ་མེད་མཁན་སོགས་མི་སྣ་ཧ་ཅང་མང་པོས་དོ་སྣང་བྱེད་ཀྱི་ཡོད་པ་འདིར་དོ་སྣང་གསར་པ་ཞིག་བྱེད་དགོས་པ་ནི་གལ་ཆེན་པོ་ཆགས་ཡོད་ལ།དེ་འདྲའི་ལོ་རྒྱུས་ལྡན་པའི་གཅེས་ནོར་ངོས་ཟིན་དགོས་པ་ནི་གལ་ཆེན་པོ་རེད།
ང་ཚོ་ཚང་མས་ཁ་ནས་ཞི་བདེ་དང་ཞི་བདེ་ཟེར་གྱི་ཡོད་པ་རེད། ཞི་བདེ་ཟེར་བ་དེ་སེམས་ཀྱི་ནང་ནས་བཟོ་དགོས་པ་རེད་མ་གཏོགས། གོ་མཚོན་མེད་པ་གཅིག་པུའི་སྐད་ཆ་མ་རེད། ང་ཚོ་བོད་ཀྱི་རིག་གཞུང་གོམས་གཤིས་དེ་སེམས་ཀྱི་ཞི་བདེ་བཟོ་བའི་རྒྱུ་ཆ་ཡག་ཤོས་རེད། དེ་ང་ཚོ་ཚང་མས་ཤེས་པ་བྱས་ཏེ་བདག་པོ་ཡག་པོ་རྒྱོབ། གཞན་ཞུ་རྒྱུ་མེད། ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན།། །།
