༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༢༡ ནས་ ༢༣ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཁྱིམ་ཐོ་ཞིབ་བཤེར་བའི་སྦྱོང་བརྡར་དབུ་འཛུགས་གནང་ཡོད།
དེ་ཡང་སྤོན་ཊ་ཆོལ་གསུམ་གཞིས་ཆགས་ཀྱི་ས་གནས་འགོ་འཛིན་དགེ་ལེགས་འཇམ་དབྱངས་ལགས་སྐུ་མགྲོན་གཙོ་བོར་ཕེབས་ཏེ་སྣང་གསལ་མར་མེ་ཞལ་ཕྱེ་གནང་སྟེ་སྦྱོང་བརྡར་དབུ་འཛུགས་གནང་ཡོད། སྐབས་དེར་ཁོང་གིས་ཁྱིམ་ཐོ་ཞིབ་བཤེར་ལས་གཞིའི་དགོས་དམིགས་སྐོར་ངོ་སྤྲོད་གནང་བ་མ་ཟད། བཙན་བྱོལ་བོད་མིའི་གནས་སྟངས་རྒྱུས་ལོན་ཆེད་ལས་གཞི་འདི་གལ་ཆེ་བརྩིས་ཏེ་མཉམ་ཞུགས་པ་རྣམས་ནས་ཕྱར་གྲུ་མཉམ་འདེགས་གནང་རྒྱུའི་རེ་སྐུལ་ཞུས་ཡོད། དེ་བཞིན་མཉམ་ཞུགས་པ་རྣམས་ནས་དམངས་ལ་གོ་རྟོགས་སྤེལ་སྐབས་བཟོད་བསྲན་ངང་ནས་འགྲེལ་བརྗོད་གནང་དགོས་གལ་སྐོར་གསུངས་ཡོད།
དེ་རྗེས་སྦྱོང་བརྡར་ནང་མཉམ་ཞུགས་གནང་མཁན་ཚོས་སོ་སོའི་ངོ་སྤྲོད་གནང་གྲུབ་མཚམས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱི་ཁྱིམ་ཐོ་ཞིབ་བཤེར་ཀྱི་ལས་གཞིའི་སྐོར་ངོ་སྤྲོད་གསུང་བཤད་ཞིག་བརྙན་ཐུང་བརྒྱུད་ཚོགས་བཅར་བ་ཡོངས་ལ་གཟིགས་འབུལ་ཞུས་ཡོད།
སྦྱོར་བརྡར་འདིར་རྒྱ་གར་བྱང་ཕྱོགས་བོད་མིའི་གཞིས་ཆགས་ཁག་བརྒྱད་ཀྱི་ལས་བྱེད་དང་། དང་བླངས་བཅས་ཁྱོན་བསྡོམས་མི་གྲངས་ ༢༢ མཉམ་ཞུགས་གནང་ཡོད་དང་། ཟབ་ཁྲིད་གནང་མཁན་བློ་བཟང་ལགས་དང་། སའི་ཁད་གྷོཥ་ལགས། ཤི་ཇིཏ་དཔལ་བཅས་ཡིན།
ལས་གཞི་འདི་ནི་ཨ་རི་རོགས་ཚོགས་ (USAID) དང་བོད་ཀྱི་ཐེབས་རྩ་གཉིས་ཀྱི་མཐུན་འགྱུར་གནང་བ་བཅས།།
