དཔལ་ལྡན་སྲིད་སྐྱོང་མཆོག་གིས་བེལ་ཇམ་གྱི་རྒྱལ་ས་སྦར་སེལ་དུ་བོད་མིའི་མང་ཚོགས་དང་ཐུགས་འཕྲད་གནང་བ།

གསར་ལས་ཁང་གི་གསར་འགོད་པས།

༢༠༢༤-༠༢-༠༧

དཔལ་ལྡན་སྲིད་སྐྱོང་མཆོག་བོད་མིའི་མང་ཚོགས་ལ་གསུང་བཤད་གནང་བཞིན་པ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་སྤེན་པ་ཚེ་རིང་མཆོག་ཨིན་ཡུལ་དང་ཕིན་ལེནྚ། བྷལ་ཌིག་རྒྱལ་ཁབ་ཁག་ནང་གི་གཞུང་འབྲེལ་ཕྱོགས་བསྐྱོད་ལས་རིམ་ཁག་ལེགས་པར་སྒྲུབ་ནས་ཕྱི་ལོ་ ༢༠༢༤ ཟླ་ ༠༢ ཚེས་ ༠༤ ཉིན་བེལ་ཇམ་གྱི་རྒྱལ་ས་སྦར་སེལ་དུ་ཕེབས་འབྱོར་གནང་ཡོད་པ་རེད། གནམ་ཐང་དུ་ཕེབས་འབྱོར་སྐབས་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་བོད་རིགས་ཚོགས་པའི་ཚོགས་གཙོ་གཙོས་བོད་མི་རྣམས་ཀྱིས་ལག་ཏུ་ཕྱེ་མར་དང་ཁ་ཏག་ཐོགས་སྟེ་ཕེབས་བསུའི་སྣེ་ལེན་གཟབ་རྒྱས་ཞུས་འདུག

དཔལ་ལྡན་སྲིད་སྐྱོང་མཆོག་ལ་སྦར་སེལ་གནམ་ཐང་དུ་ཕེབས་བསུ་ཞུ་བཞིན་པ།

གོང་ཚེས་ཉིན་དཔལ་ལྡན་སྲིད་སྐྱོང་མཆོག་བེལ་ཇམ་གྱི་གྲོང་ཁྱེར་ཨེནྚ་ཝར་པི་ཏུ་ཕེབས་ཏེ་བོད་པའི་གཞོན་སྐྱེས་རྣམས་དང་ལྷན་མཇལ་འཕྲད་སྐབས། བོད་ཀྱི་ལོ་རྒྱུས་གནས་འབབ་དང་། བོད་ཀྱི་རིག་གཞུང་། ཁོར་ཡུག་གི་གལ་གནད། ད་ལྟའི་བོད་ཀྱི་གནས་སྟངས་བཅས་ཀྱི་སྐོར་ནན་བརྗོད་གནང་བ་མ་ཟད། གཞོན་སྐྱེས་ཚོར་བོད་ཀྱི་རང་དབང་འཐབ་རྩོད་མདུན་སྐྱོད་བྱེད་པའི་འགན་འཁྲི་ཡོད་པའི་སྐོར་དྲན་གསོ་གནང་ཡོད། ཨེནྚ་ཝར་པིན་ནི་བེལ་ཇམ་ནང་གི་བོད་མི་གནས་སྡོད་བྱེད་ཡུལ་མང་ཤོས་གྱི་གྲོང་ཁྱེར་དེ་ཡིན།

དེ་བཞིན་ཕྱི་དྲོར་བེལ་ཇམ་གྱི་ས་གནས་འདྲ་མིན་ནས་ཕེབས་པའི་བོད་རིགས་རྣམས་ལ་མཇལ་འཕྲད་དང་འབྲེལ། བོད་མིའི་སྒྲིག་འཛུགས་ཀྱི་ལས་དོན་གནད་ཆེ་བ་ཁག་ངོ་སྤྲོད་དང་འབྲེལ་མང་ཚོགས་ཀྱི་བཅར་དྲིར་དང་ལེན་གནང་ཡོད། དེ་བཞིན་དཔལ་ལྡན་སྲིད་སྐྱོང་མཆོག་ལ་བེལ་ཇམ་ལྷག་དཀར་ཚོགས་ཆུང་དང་ཤེས་རབ་སྣང་འབྱེད་ཉིན་མོའི་སློབ་གྲྭ་གཉིས་ནས་དགོངས་མོའི་གསོལ་སྟོན་གོ་སྒྲིག་ཞུས་ཏེ། རིག་གཞུང་འཁྲབ་སྟོན་གཟིགས་འབུལ་ཞུས་ཡོད་པ་རེད།དཔལ་ལྡན་སྲིད་སྐྱོང་མཆོག་གི་ཐེངས་འདིའི་གཞུང་འབྲེལ་ཕྱོགས་བསྐྱོད་ཁག་ལེགས་པར་གྲུབ་སྟེ་ཕྱི་ཚེས་ ༥ རེས་གཟའ་ཟླ་བ་ཉིན་སྦར་སེལ་ནས་རྒྱ་གར་དུ་ཕེབས་ཐོན་གནང་ཡོད། དེ་ཡང་སྐབས་འདིའི་དཔལ་ལྡན་སྲིད་སྐྱོང་མཆོག་གི་གཞུང་འབྲེལ་ཕྱོགས་བསྐྱོད་རིང་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ལྷན་བཅར་ཞུས་ཡོད་པ་བཅས།།