༄༅། །བོད་ཤར་ཕྱོགས་སྡེ་དགེ་ཁུལ་དུ་བོད་པའི་ཞི་བའི་ངོ་རྒོལ་པ་ཚོར་དྲག་གནོན་ཤུགས་ཆེན་བྱེད་བཞིན་པའི་གནས་ཚུལ་དེས་སྦེལ་ཇམ་གྱི་རྒྱལ་ས་སྦར་སིལ་དུ་ཚོགས་བཞིན་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དགུ་པའི་ཚོགས་བཅར་བ་རྣམས་ལ་དངངས་འཚབ་ཆེན་པོ་བསླངས་ཡོད་པ་རེད། སྡེ་དགེ་ཁུལ་དུ་བོད་པའི་གྲྭ་པ་གཙོས་པའི་ས་གནས་བོད་མི་ཚོས་འབྲི་ཆུའི་སྟོད་རྒྱུད་དུ་ཆུ་རགས་རྒྱག་རྒྱུའི་ལས་འཆར་ལ་འཚེ་མེད་ཞི་བའི་ངོ་རྒོལ་གནང་ཡོད།
འཛུགས་སྐྲུན་རྐྱེན་པས་བོད་མི་ཉིས་སྟོང་ཙམ་གནས་སྤོ་བྱེད་ཀྱི་ཡོད་པ་དང་། ཕྱོགས་གཅིག་ནས་དུས་རབས་བཅུ་གསུམ་ནས་བྱུང་བའི་རིན་ཐང་བྲལ་བའི་རིག་གཞུང་གི་ཤུལ་ནོར་གྱི་གནས་སུ་གྱུར་པའི་ས་ཁུལ་འདིའི་དགོན་སྡེ་རྣམས་གཏོར་བཤིག་གཏོང་གི་ཡོད།
ཞི་བའི་ངོ་རྒོལ་གྱི་ལས་འགུལ་ནང་བོད་མི་ཚོས་ས་གནས་སྲིད་གཞུང་གི་ལས་ཁུངས་མདུན་དུ་ཞི་བའི་ངོ་རྒོལ་དང་། ས་གནས་མི་མང་གིས་པུས་མོ་སར་བཙུགས་ནས་ངུ་འབོད་གནང་པའི་བརྙན་རྣམས་ས་གནས་བོད་མི་ཚོས་སོ་སོའི་བདེ་འཇགས་ལ་ཉེན་ཁ་ཡོད་མེད་ལ་མ་ལྟོས་པར་བོད་ནང་ནས་བསྐུར་འདུག རྒྱ་ནག་གི་དཔོན་རིགས་ཚོས་གནས་ཚུལ་དེ་ཁྱབ་སྤེལ་བྱེད་མཁན་ཚོར་དྲག་གནོན་ཤུགས་ཆེན་བྱེད་ཀྱི་ཡོད།
དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྡེ་དགེ་ཁུལ་དུ་འཚེ་མེད་ཞི་བའི་ངོ་རྒོལ་ཁྲོམ་སྐོར་བྱེད་མཁན་ཚོར་དྲག་གནོན་བྱེད་ཕྱོགས་ནི་ཚད་ལས་བརྒལ་བ་ཞིག་རེད། རྒྱ་ནག་གི་འགོ་ཁྲིད་ཚོས་བོད་མིའི་རང་དབང་དང་ཐོབ་ཐང་ལ་སྣང་མེད་གཏོང་བ་ནི་ཐབས་ལམ་གང་འདྲ་ཞིག་གི་ཐོག་ནས་ཀྱང་ངོས་ལེན་བྱེད་ཐབས་མེད་པ་ཞིག་ཡིན། ཉེས་ཆད་གཅོད་པའི་བྱ་སྤྱོད་འདིས་འགྲོ་བ་མིའི་ཐོབ་ཐང་ལས་རྒྱ་ནག་གིས་ལྟ་གྲུབ་དང་ཁེ་ཕན་གལ་ཆེ་བར་བརྩིས་པའི་རྣམ་པ་གསལ་པོར་བསྟན་ཡོད།
ང་ཚོས་རྒྱ་ནག་གཞུང་ལ་འཛིན་བཟུང་བྱས་པའི་བོད་མི་ཚང་མ་མྱུར་དུ་གློད་གྲོལ་གཏོང་དགོས་པ་དང་། བོད་མིའི་ཐོབ་ཐང་དང་མངོན་འདོད་ལ་བརྩི་བཀུར་བྱེད་དགོས་པའི་འབོད་སྐུལ་ཞུ་བཞིན་ཡོད། འཛམ་གླིང་མི་མང་ཚོས་ཀྱང་བོད་མིའི་སྐད་སྒྲ་ཐོས་དགོས་པ་དང་། རྒྱ་ནག་གིས་བོད་ནང་ལོག་སྤྱོད་བྱས་པའི་བདེན་དོན་ལ་གདོང་ལེན་བྱེད་དགོས་པའི་འབོད་སྐུལ་ཞུ་བཞིན་ཡོད།
རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དགུ་པའི་ཐོག་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་འགོ་ཁྲིད་དང་འཐུས་མི་བརྒྱ་དང་བདུན་ཅུ་ལྷག་འཛོམས་ནས་བོད་རང་དབང་འཐབ་རྩོད་ཀྱི་མདུན་ལམ་སྐོར་གྲོས་བསྡུར་བྱེད་བཞིན་ཡོད། །
